«Ужлэсь палэнскиськод ке, кинлы тон кулэ луод?» (Кутсконэз)

Таӵе ним улсын кылдытэм проект кубызэн шудӥсьёсты гинэ котыраз уг люка, со нырысь ик кубызэн тунсыкъяськись адямиосты данъя но вашкала крезьгуро инструментлэн азьпал улонэз сярысь сюлмаськисьёслэсь малпанъёссэс шарая. Оло, та аспӧртэмлыко инструментэн шудыны мылкыд карись адямиослэн лыдзы йылоз но кубыз выльысь чебер гуръёсын чузъяськоз. Ӵапак та сюлмаськытӥсь учкетъёсын (аспектъёсын) герӟаськемын луоз туннэез вераськонмы но.

Кубызэн шудӥсьёс сярысь ивортодэт утчаку, малы ке туж яркыт пуксиз гуртысь одӥгез ужрадмы. Со вал 2019 ар, инвожо толэзь. Куинетӥзэ радъяськиз гуртмылэн нуналэз. Гужем та ӝытэ милемыз шуныт куазен ӧз эркия ке но, шулдыръяськонъёс, эктон-кырӟанъёс, ӟеч кылъёс сюлэмез шунтӥзы. Семык азьын одӥг интые люкаськем калык кезьытэз палэнэ кельтӥз кадь. Таӵе вакытъёсы гуртысь адямиослэн матын луэмзы туж яркыт шӧдӥське. Шумпотонэн но тырмыт луиз та ӝыт: гуртысь клублэн тӥрлык мерасэз узыргес луиз йӧспӧртэм арберилы – киын лэсьтэм кубызлы. Сое Елена сузэрез пыр лэзем Николай Иванович Кумаев – Вуж Кушкет гуртын вордскем но будэм удмурт воргорон. Чиль-валь пиштӥсь инструмент бордаз кыске но ваньзэс синмаськытэ. Но, жаляса верано, соин шудӥсез ӧвӧл. Таӵе выллем ужъёслы кибашлы луись Николай Ивановичен вераськон телефон пыр гинэ луиз ке но, со туж трос тунсыкозэ вераны быгатӥз. Тӥледыз но та зарни киё усточиен тодматэммы потэ.

– Вордӥськи мон 1948-тӥ арын 25 шуркынмонэ. Художественно-графической факультетэз заочно йылпумъяса, заводъёсын, Москваысь заводын но ужай. Собере Ижевскын автозавод лэсьтыны кутскизы. Ижевскын кӧня ке ӧнерчиосты люкаса, Москвае, автомобильной заводэ дышетскыны лэзизы. Мон штамповщик луыса ужай отын. Москваысь бертыса, Ижевскын квартира сётӥзы. 23 арес гинэ вал мыным соку, гарантийной гожтэтъя квартира басьтӥ, ваньмыз паймо вал, кызьы озьы, 23 аресэн квартира басьтыны луэ. Нош соку куинь арлы гарантийной гожтэт сёто вал. Кыӵе ке тӥянъёсыд, янгышъёсыд ӧвӧл ке (татын мер радлык, заводской режим пумысен вераськон мынэ) квартира сётылӥзы. Пӧртэм ӧнеръёсын ужаны кылдӥз. Пичиысен ик ужаса будэмын ук ини ми. Нимысьтыз факультативъёсы ветлыса, школаез йылпумъяку, право сётӥзы. Нокыӵе ужлэсь но ум кышкаське вал. Ӟучъёс верамъя «по жизни всё пригодилось», котькыӵе кутскем ужез пумозяз вуттыны тыршиськом вал. Али но тани ужасько. Ваньмыз паймо: «али но ужаськод шат?» шуыса юало. Нош кин бен ужалоз, нокинлэн но ужамез уг поты, егитъёслэн нимаз ик. Нош ки ужен вырыны тужгес но мылкыд карисьёс ӧвӧл ни. Кыӵе ке кылкутонэз шӧдӥсько. «Удмурт Элькунысь культурая сӥё-дано ужась», «Ужысь ветеран» нимъёсын пусйизы. Мон та нимъёсты ӧй куры ук, адямиос асьсэос адӟо. Ужаны быгатӥськод но со ужлэсь палэнскиськод ке, кинлы тон кулэ луод, ужын но тонэ нокин уз возьы. Нош мыным оско али, лэземзы уг поты на (серекъяса).

Туннэ нуналэ Николай Иванович улэ Ижкарын, Йӧскалык музейын ужа. 76 аресъем воргорон али ке но сюлмысь тырше яратоно интыужаз, сое тросэз зарни киё усточиен лыдъяло.

– Ужаны кутскыкум, Капустин фамилиё ӟуч воргорон удмурт кубызъёсты лэсьтылӥз, пӧртэмзэ лэсьтэ вал, со сяна крезьёс но лэсьтыны быгатэ вал. Со мынам мастерскоям тыршиз. Мон ужамзэ, кызьы лэсьтэмзэ учкылӥ. Столярной ужъёслы солэн сокем умой быгатонлыкъёсыз ӧй вал ке но, со туж усто музыкант вал. Солэн крезьгуръёсыз но вань, лэсьтэм арбериосыз но ӧжыт ӧвӧл. Но, жаляса верано, солэн адӟонэз, удысужлыкез (профессионализмез) уггес тырмы вал. Музыкантъёслэн киоссы небыт ук, шӧдӥсь, нош пу арбериосты лэсьтон уж чурыт киез кулэ каре, тон ведь пуэн ужаськод. Учкыса ветлӥ-ветлӥ но малпасько: «Мон ведь умойгес лэсьтыны быгато». Тӥни озьы та ужен вырыны кутски. Пӧртэм крезьгуро инструментъёсты лэсьтылӥ. Дыр ортчемъя, ваньмызлы дыши. Мынам дорам но соос туж трос. Кубызъёс сяна, скрипка но лэсьтӥ. Та понна пӧртэм литература лыдӟыны тупаз. Ваньзэ пыр-поч тодоно вал: кыӵе материал кутоно, кызьы лэсьтоно. Сиоссэ (струнаоссэ) магазинысь басьтӥсько.