Валтӥсез – семьялэн шунытэз

90 арес — трос-а, ӧжыт-а? Мон понна, та лул кужымлэн, тазалыклэн но сиён сямлэн бервылъёсыз. Туннэ асьмелы котькуд магазинлэн ӧсъёсыз усьтэмын, бакчаосамы пӧртэм будосъёс но емышъёс будо. Каньыл улонлэн буёлъёсыз куддыр кудӟыто, но трос адямилэн тазалыкез лябӟемын, асьмеос ки ужъёслэсь каллен палэнтӥськиськом кадь ини. Туннэ нуналэ улонысь трос ужъёсты машинаос но пӧртэм техника быдэсто.

1934 арын Вуж Турья гуртысь Кокровъёслэн семьяязы куинетӥ нылпи луыса вордӥське ныл, солы чебер Матрёна ним сёто. Улон мынэ, катъёс но воштӥсько. Матрёналы сюрес усьтӥське дышетскон дуннее. Та ӧнер секытэн сётӥськиз ке но, Вуж Кушкет гуртысь 7 классэз йылпумъя но у дас классъем школаысьжаны колхозэ интыяське. 

Атайзэ пӧртэм кышкыт эскеронъёс пыр поттӥзы ке но, семьялэн юнлыкез ӧз чигиськы. Кокровъёслэн лул кужымзы юрттӥз соослы азьлань сюрестӥзы мыныны.

— Туж секытэн вера вал анаймы ас пинал дырез сярысь. Шимес война дыръёсы троссэ адӟыса будӥллям соос. Атайзы репрессие но шедем, ма, бен, собере шонере поттӥллям ик, озьы ке но сюлэм яраоссы кылиллям, туж муресь луиллям соос. Котьма шуид ке но, улон пӧртэм сямен эскерем соосты, — вера Матрёна Александровналэн Лидия нылыз. 

Аслэсьтыз нылкышно шудзэ но яратонзэ Матрёна пумита аслаз гуртаз ик. Вуж Турья гуртысь пудо живот эмъясь Аркадий Кузьмич аслаз дышетскеменыз но каньыл, капчи мылкыдэныз егит нылмуртлэсь сюлэмзэ пыраклы басьтэ. Соос кузпалъясько но 4 нылпиослы улон кузьмало: соослэн вордӥсько 2 пиоссы но 2 нылъёссы. 

Выль бадӟым семьяын улон котьку ӧжытак секыт йӧтэ, вылаз ик, кык кенъёсын, анайзыен-атайзыен улон трос ужъёс но ватса. Ас кужыменызы корка лэсьтыса улыны кутскиллям. Матрёна Александровналэн верамезъя, атаезлэн тыршеменыз гинэ умой улӥзы. Татын соос пудо-живот но вордӥллям. Каб шукконлэсь но пегӟыны быгатымтэзы. Бызьытозяз но, ас семьяяз улыкуз но весяк каб шуккыса улӥллям. 

Аркадий Кузьмич матысь гуртъёсы ветлэм. Тодӥсь но ас ужзэ валась пудо-живот эмъясь котькуд гуртын гажамон адями луэм. Кузпалзэ возьмаса, кышномурт куддыр уйёссэ но изьытэк потылэм. Нош ачиз Матрёна Александровна колхозын пӧртэм ужъёсты быдэстэм. Мукет кузё кышноос сямен ик, колхоз ужъёсты быдэстон сяна, со семьязэ утьыны но, юрт котыр ужъёсты лэсьтыны, пудо-живот вордыны но, шутэтскон вис карыса, балалайкаен шудыны но дыр шедьтэм. Егит дыръяз гинэ ӧвӧл, пересьмон вакытаз но усто крезьгуръёс поттылэм. Солэсь аспӧртэмлыко ӧнерзэ Лидия нылыз но басьтэм. 

«Куддыр анай бертэ но, одӥг пуксеменыз, пӧсяса-пӧсяса 3-4 чаша чай юэ вал. — Анай, бен малы сомында чай юиськод?», шуыса юаку, «Мон, нылы, туннэ 72-73 пуйы картошка бичай, туж жади», шуыса валэктэ вал. Со дыре ужъёс туж секыт луиллям, али со ваньзэ техникаен быдэстыны луэ, — тодазы ваё нылпиосыз.

Туннэ нуналэ Матрёна Александровна гажамон песянай но яратоно анай. Солэн 8 внукез но 15 правнукъёсыз. Елена нылыз аслэсьтыз улон сюрессэ Саба ёросысь Иштуган гуртэн герӟаз, дано шутэтсконэ потыса но ужан мылкыдзэ ӧз на ышты. Лидия нылыз ас семьяеныз улэ бускель Карек-Серма гуртын, О.Н.Исаева нимо Шор Кушкет шоръёзо школаын покчи классъёсты дышетэ. Нылпиосты яратыса, соос понна матысь эш но визьнодась луэ. Виктор пиез аслаз семьяеныз Малмыж улосысь Калинино гуртын улэ. 

Дано юбилярез ӟечкыланы лыктӥзы «Борнак» обществолэн кивалтӥсез Рафкат Назипов но Бурнак гурт поселенилэн главаез Шамиль Хабибуллин. Соос Матрёна Александровналы Балтась ёрослэн главаезлэсь Таукарон гожтэтсэ но мукет дуно кузьымъёсты вайиллям. Гумырыз ӵоже колхозын тыршем кышномуртлы соос тазалык, шудо улон, Инмарен сётэм нуналъёссэ ӟечен пумитаны сӥзизы. Песянай соослэн шуныт кылъёссылы туж шумпотӥз, аслэсьтыз утисьёссэ но ушъяз. 

Арлыдоос понна самой валтӥсез — чылкыт но шуныт валес. Та пумысен юбилярлы ӝожтӥськымон ӧвӧл. Солэн юн пыкетъёсыз — Екатерина кенэз, Алексей внукез но солэн Юлия кузпалэз. Соос песянайлэсь улонзэ каньыл карыны тыршо, сюдо, утялто но улон дыръёссэ азьланьто. Егит поколенилэн арлыдоосты утён мылкыдзы медаз куашка вал но песянайлы трос аръёс ӵоже шундыё нуналъёс кузьманы луонлык мед кылдысал.
— Нимысьтыз тау шуэммы потэ Екатерина кенмылы, Алёша племянникмылы но Юлия кенмылы. Соос вылын туж бадӟым ужпум — анаймес утялтон. Сыӵе бадӟым арлыдэ вуэм адямиос эшшо но юнгес саклык висъямез кулэ каро. Юнме уг верало ук, пересьёс но пичи нылпиос одӥг визьем, шуыса. Зэмзэ, озьы ик вань. Соин, соослы котьку юрттэт луоно, куронъёссэс быдэстыны тыршоно но мылкыдзэс ӝутоно. Анаймы умой сие меда, чылкыт валесын изе-а, шуыса юанъёс уг кылдо. Солэн каньыллыкез понна ми ум сюлмаськиське. Соослэсь улон дырзэс Инмар мед будэтоз, семьязы но валаса, огкылысь мед улоз, соос милям осконмы. Соин соослы музъемозь йыбырттыны но дась, — таукарон кылъёссэ веразы песянайлэн нылпиоссы.

Зэмзэ но, улонлэн колёсаосыз туж ӝог бергало. Котькуд нунал асьмеос пӧртэм учыръёсын пумиськиськом. Туннэ героинямы та учыръёсысь выллань ӝутэм йырын но сазь йырын потылӥз. Улонысь чабкемъёсты но палэнтыны быгатӥз. Матрёна Александровналы азьпал кузьмам нуналъёссэ шудо ортчытыны сӥзиськом, матысьёсызлы тросгес дырзэс гажано адямизы вӧзын ортчытыны мед кылдоз.