«Вань улонэ школаын ортчиз», — Иван Ермаков

Опытэз ӧжытэн директор луыса ужаны кутскиз ке но (солы ваньзэ-ӧвӧлзэ  29 арес луэ), школае трос воштӥськонъёс, выльдӥськонъёс пыртыны, адями пӧлын гажамон луыны быгатӥз. Улон-вылонэз, школаын ужам аръёсыз сярысь Иван Васильевич милемлы но вераз.

— Иван Васильевич, тӥ — Ӟаны школалэн данъяськонэз. Татын вордскиды, татын будӥды, та гуртысь школалы ик 30 арлэсь тросгес гумырдэс сётӥды. Кылэме вань, тӥлесьтыд дышетскисьёс но дышетӥсьёс кышкало но,  тӥледыз ярато но вал шуыса...

— Директорез нокин но уг яраты (серекъя). Ма, мон ачим но ужасьёсылы весь верасько вал, тӥ мынэсьтым кышканы ке но кулэ шуыса. Гажасез гажам, дыр. Кышкасез — кышкам, дыр. Школаысь кошкон азьын мон верай: «Мон но адямиослэсь жади, адями но мынэсьтым жадем, дыр». Директор — со проклятой адями ни. Куддыръя школае пумиськонъёсы ветлӥсько. Соку дышетскисьёсы верало ни. Одӥгез шуэ:«Тон тодӥськод-а, монэ кабинетад пыртыса тышкаськид, удмурт кылъя урокъёсы пырымтэе понна». Кыкетӥез вера:«Яра али тон милемыз математикаен дышетӥд, тани внукъёсме но ачим дышетыны быгатӥсько табере математикаен».  Но та али директор луыса ужамелэн бервылызлэн одӥг пумыз гинэ...

— Нош мукет пумыз?

— Мон аслам нылпиосылы саклык висъяны ӧй быгаты. Таиз сярысь тужгес жалясько. Мон сомында кужымме та школалы сётӥськем, аслам нылпиосылы, кышноелы дыры но кыльымтэ... Мынам кыӵе ке но азарт выллем луэм ни со — удмуртлыкез, удмурт школаез ӝутыны тыршон.

Пичи дырысен татын, Ӟаныын будыса, дышетскыса, ужаса пенсие потӥ. Улон озьы ик ортчем...

— Озьыен, тӥ Ӟаны школалэн гинэ ӧвӧл, Ӟаны гуртлэн но данъяськонэз. Вань улонды вордскем гуртады ортчемын, кӧня та аръёс ӵоже калык понна лэсьтэмын.

— Бен, мон татын вордскемын, татын улэмын, будэмын. Анай-атае но татын ватэмын. Мон пичи дыръя Ӟаныын сизьым аръем школа вал. Али ке но син азьын школае нырысетӥзэ мынэме. Нырысетӥ классэ мыныку,  монэ школае бабае келяз. Книга-тетрадьёсыз кышетэн думыса монэ школае лэзиз. Со вал 1953-тӥ арын. Ачим мон 1946-тӥ арын вордскемын. Али тани 73 арес ини. Ӟаны школа бере бадӟым классъёсы Ципья школае лэзизы ни милемыз дышетскыны. 11-тӥ классэз йылпумъятозь отын вал. Школаез йылпумъяме бере Ижевске мыныса утиськем вал  механической институтэ дышетскыны пырыны малпай. Но уксё быдмемен берпуметӥ экзаменме сётытэк бертыса кошки. Собере Гришкин Иван Дмитриевич (соку Ӟаны школаын директор вал) монэ школае ужаны басьтӥз. Технологиен но физкультураен дышетӥсь луыса ужаны кутски, нокыӵе тодон-валанэ ӧй вал ке но. Иван Дмитриевич озьы уно адямиосты басьтӥз, образованимы ӧвӧл ке но. Ма бен карод — дышетскисьёс уно, дышетӥсьёс нош ӧй вал. 1949-тӥ арын кылдэм школалэн мукет интыосысь лыктэм дышетӥсьёсыз гинэ вал. Тани ми поколениысь Арча педучилищеез быдтыса Евгения Георгиевна Тихонова бертӥз. Мукет ӧй вал, лэся. Азьло образование ӧз луы ке но, дышетӥсь луыса ужаны пырыны проблема ӧй вал, малы ке шуоно дышетӥсез ик ӧй вал. Война аръёсы вордӥськемъёслэн дышетскем муртъёссы ӧвӧл, нош пиналъёс уно вордскизы. Мон директор луэм бере гинэ но али 447 дышетскись вал школаын, туннэ нуналэ 200 но ӧвӧл. Школа вуж вал, дышетскон инты ӧвӧл, вуж школаын дышетскыса курадӟизы. Школалы пристрой но асьмеос лэсьтӥмы. Иван Дмитриевич 5 классъем помещенизэ вуттӥз, собере ми асьмеос пристрой лэсьтӥмы.

— Соку тӥ, егит воргорон, воксё школае дышетӥсь луыса ужаны мыныны малпаськымтэ вылысь, школае вуиды?

— Ма со котькинлэн но нырысетӥ быръем ӧнерез воксё малпамтэ шорысь луэ. Тӥляд но случайно луэм маке со (серекъя). 90 процент адямилэн озьы луэ. Мон но со 90 процентъёс пӧлысь луисько.

— Ноку но ӧд жалялэ-а школае вуэмды сярысь?

— Дышетӥсь луыса ужаны кутски шуыса мон ӧй жаля. 5-тӥ классын милям математикаен дышетӥсьмы но классэн кивалтӥсьмы Шляпкина Антонида Григорьевна вал. Тодам вайисько: милемыз Кисале палэзь люканы нулло классэн. Дышетӥсьмы «Синдбад-мореход» сказкаез вераса мынӥз. Ми, 5-тӥ классын дышетскисьёс, кӧня луиськеммы, дыр, ини, сое котыртыса Кисаль нюке палэзьлы мынӥмы. Кыкетӥ нуналаз нош милемыз нуизы, нош дышетӥсьмы со сказкаез ик вера. Куинь нунал ветлӥм ми со палэзез озьы бичаса. И ведь кылзӥським! Со дышетӥсе сярысь ӵем гинэ малпасько, макем со милемыз тунсыкъяськытыны быгатӥз. Мон понна со зэмос пример луиз. Мон берло, аръёс ортчыса, солы аслыз но та малпанъёсме верай. «Математикалы яратон мылкыд Тӥ пыӵатӥды», — шуи. Мон ведь математик вал. Нырысь дышетыны кутскыку технология но физкультура предметъёсты дышетӥ (1964-тӥ арын ужаны пыри), 1965-тӥ арын заочно Ижевске дышетскыны пыри — пединститутлэн математической факультетаз. Заочно быдтыса, 1971-тӥ арын армие кошки, 1972-тӥ арын бертӥ, Забайкальской военной округын служить карыса. Нош ик математикаен, физикаен дышетыны кутски. Кӧня ке толэзь завуч луыса но ужай. Собере ини, кызьы тодӥськоды, кема аръёс ӵоже директор луи.

— Тодэмея, тӥ вазь, егитысен ик директор луыса ужаны кутскиллямды.

— Бен, егит дырысен ик ини, 1976-тӥ арысен. Зэмзэ ке верано, мынам директор луэме воксё уг поты вал. Завроно доры ӧтизы, директор карыны турттыса. Огпол ӧтизы — ӧй мыны, кык пол ӧтизы — ӧй мыны. Иван Дмитриевич соку шуиз: «Мон школалэсь кирпич зданиоссэ лэсьтӥ, тон ужа». Тӥни собере гинэ соглаш луи.

— Малы бен тӥляд директор луэмды ӧз поты? Кышкады? Ас кужымдылы ӧд оске? Оло, мукет мугъёс вань вал?

— Бен, тодонэ но собыдӟа вал. Али мон соку 29 аресъем маке гинэ вал, егит на. Вылаз ик кемалась ӧвӧл гинэ кышнояськемын. Кӧня ке ар директор луыса ужаме бере Ӟаны школамес Тюнтерен валче каризы. Со вал 1982-тӥ ар, август толэзь. Ини Ӟаны школа дышетскон арлы дасяськем вал. Но Тюнтере выль школа пуктӥзы но, соослэн дышетскисьёссы ӧжыт луэмысь, школаосмес огазе каризы. Кӧня ке мон но отын, Тюнтерын, ужай — математикаез дышетӥ, директор но луи. Собере кӧня ке аръёс ортчыса анай-атайёс, дышетӥсьёс, Верховной Советэ гожтэтъёс гожъяса, школаез берыктӥзы (1985-тӥ арын школа выльысь вань кужыменыз ужаны кутскиз). Тӥни озьы 1985-тӥ арысен монэ нош Ӟаны школае директор каризы.

— Озьыен, куинь ар ӵоже школа буш сылӥз?

— Озьы. Начальной классъёс гинэ дышетскизы отын. Нош садик воксё ӧй вал.

— Иван Васильевич, азьло нылпиос но кылзӥськисьгес луиллям, дыр, туала дырен ӵошатыса. Соин луэ-а вераны, азьло дышетӥсьлы (директорлы) ужаны капчигес вал шуыса? Оло, секытгес луэм, дыр?

— Дышетскисьёсты дышетыны капчигес вал. Нош хозяйственной ужпумъёсты нуыны туж секыт вал. Али ведь ваньмыз газэн. Нош соку милемлы асьмелы, дышетӥсьёслы, пу утчано вал. Кытчы гинэ ӧм вуэ пу утчаса, Шеморданэ но, Марийское но ветлӥмы. Со сяна, Шеморданысь эгыр но нуллоно вал, соин но школаослэн директоръёссы со дыре нуналлы быдэ Шеморданэ ветлӥзы. Сыӵе вал директоръёслэн ужзы — кытчы пырод. Али капчи — газ, ву пыремын, шуныт, сюдыны умой условиос вань. А ми дыръя татын столовой гинэ но ӧй вал, интернат но начар югдурын вал.

— Зэм, туала дыре кадь нылпиосты ветлытӥсь автобус но ӧй вал...

— Бен. Тани Турьяысь арнялы куинь пол ветло вал нылпиос, 5-тӥ классысен кутскыса ведь! Али мон малпасько, пиналъёс кызьы чидаллям меда шуыса. Гуртэн-гуртэн ведь ветлӥзы. Турья гуртысь нылпиос ӵукна пото но татчы куасэн лыкто вал. Мукет гуртъёсысь но, Починкаысь, Кушкетысь, Кисальысь пыдын ветлӥзы.

— Азьло нылпиослэн асьсэлэн дышетскыны мылкыдзы бадӟым вал, дыр.

— Анай-атайёссы дышетсконлы бадӟым инты висъязы. Мон ужаны кутскыку, уноезлэн дышетскисьёслэн атайёссы фронтовикъёс вал. Тӥни соослэн улон шоры учконзы воксё мукет вал. Улон шоры жугиськон пыр потыса но положительно учко вал соос. Нылпиоссэс дышетыны туж бадӟым вал соослэн мылкыдъёссы. 

— Ӧжытак дышетскон амалъёс сярысь но вераськомы ай. Туала школаосын популярной луиз ФГОС шуэм дышетон система. Азьло, тӥ ужакуды, сыӵе нимысьтыз нылпиосты дышетон системаос вань вал-а?

— «Проблемной обучение» вал. Класс азе проблема пуктӥське, со проблемаез нылпиосын огазе сэрттыны-пертчыны тыршиськомы вал. Пиналъёслэсь йырзэс ужатон понна умой амал вал со. Азьло ведь гуртын улӥсь дышетӥсь ачиз котьмар карыны быгатӥз. Мон тазьы шуисько вал: «Гуртысь нылпиез школаын дышетӥсь ӧз ке дышеты, нокин но сое дышетыны уг быгаты». Гуртын ведь соку нокыӵе но дополнительной образованиос ӧй вал. Только дышетӥсь мае дышетыны быгатэ, тӥни сое тодыса потэ вал ини дышетскись школаысь. Дышетскись ачиз но дышетскыны тыршиз ини. Дышетӥсьёс милям туж тыршыса ужазы шуисько мон.

— Совето дырысь кыданэн дышетӥсьёс воксё мукет луиллям, шуо. Озьы ик вань, дыр, со. Ӟаныын бен кадръёс ласянь шуг-секытъёс вань вал-а? Егит дышетӥсьёс ужало вал-а соку?

— Милям поколениысь егит  дышетӥсьёс лыктыны кутскизы, средней образованиен ке но. Кӧня ке улыса бертылыны кутскизы Арча училищеез быдтыса егит специалистъёс. Институт быдтыса асьмелэн выпускникъёс но бертылыны кутскизы. Пусъеме потэ Муллагалиев Рашид Ахметовичез, со физкультурник вал, ачиз Сосна гуртысь. Кӧня ар дышетӥз со Ӟаны школаын, толалтэ но мотоциклэн ветлоз вал ужаны. Сосна Починкаысь трудэн дышетӥсь вал Ахмат Фаязович Фаязов. 12 часозь кезьыт мастерскойын пиналъёсын ужа вал ни со. Дышетскисьёс али но верало, кызьы мылыз потыса ужам со шуыса. Аръёс ортчемъя, Ӟаны школаын луыны кутскизы олимпиадникъёс но, медалистъёс но. Та дышетӥсьёсмылэн тыршемзылэн бервылыз. Али соку ведь удмурт понна, Ӟаны школаын дышетскись понна со туж бадӟым вормон вал... Асьмелэн выпускникъёсмы пӧлысь собере Камаев Виктор Павлович бертӥз ни, «школалэн шудэз» шуи мон сое, баянист. Ӟаны школалэн фольклор коллективезлэн возиськемез — только солэн заслугаез. Демеев Алексей Михайлович но асьмелэн выпускникмы вал ни, физкультураен дышетыны бертӥз, али дыре Ижевскын. Мон завучьёсты но нимаз пусйысал. Серекъяса верасько вал, аслэсьтым визьмогесъёссэ гинэ завуч карисько шуыса. Завуч луыса Тихонова Евгения Георгиевна (географ, солэн дышетскисьёсыз Россия масштабен олимпиадаосын вормылӥзы, район понна со бадӟым вормон вал), Прокопьева Анастасия Степановна (химбиолог, кужмо дышетӥсь вал, со доры трос гинэ дышетскисьёс репетиторствое Балтасьысен но ветлӥзы) ужазы. Таисия Павловна Семенова тыршыса начальной классъёсын ужаз. Куд-ог со дышетӥсьёслэн асьсэлэн нылпиоссы но ӧй вал, но муртлэсь нылпиоссэ дышетыны тыршизы соос, паймымон тыршись адямиос но дышетӥсьёс вал. Дышетӥсьлэн солэн маиз самой кышкытэз? Муртлэсь нылпизэ дышетыны сюлмаськыса, со аслэсьтыз нылпизэ дышетыса уг вуы. Сюлэмзэс сётыса ужасьёс туж трос вал, ваньзэсты вераса но уд быдты.

— Тӥляд ведь асьтэлэн сузэрды но, Антонина Васильевна, Ӟаны школаын дышетӥсь луыса ужам.

— Со трудэн дышетӥз. Ӟаны школаез быдтӥсь апайёс камали лэсьтыса потыса кошкыны кулэ вал. Мон сое традицие пыртытӥ. Валляна камалиосыд азвесь монетаослэсь ӧвӧллы потӥзы ук — сценае султыны камали ӧй вал ни. Собере берло потэм уксёосты усьто поттылӥмы но Антонина Васильевнаез, трудэн дышетӥсь луэмысьтыз, камали лэсьтытӥмы. Одӥгзэ лэсьтӥз, кыкетӥзэ, куинетӥзэ... Собере малпамы: Ӟаны школаез быдтӥсь апаймуртлэн камалиез луыны кулэ. Берло камалитэк нокин но ӧз кошкы школаысь (серекъя). Сценаез но возён понна колхоз вамен дӥсь дасятӥ, Казане мыныса спецзаказэн  вурытӥзы, одӥг Жигули тыр луиз ни со соку. Колхоз басьтӥз. Нырысетӥзэ ми выль дӥсен султӥм сценае. Адямиос макем паймизы, «ах» шуизы Балтасьын. Ини пенсиын ке но, сыӵе шуныт малпанъёс тодам кылемын на.

— Пенсие бен кыӵе арын потӥды?

— 60 арес тырмиз но кӧня ке толэзьскын кошки. Выль школаын куинь ар ужаны кылдӥз. Со вал 2006-тӥ арын. Выль школаез 2003-тӥ арын сдавать каримы. Гужем дырысен лэсьтӥськыса курадӟимы ни, туалет лэсьтыса кутским, пу зданиен столовой лэсьтӥм, интернат лэсьтӥм, кык этажъем школаез... Район кивалтэт но юрттӥз.

— Тӥ трос аръёс ӵоже школаын ужады. Со аръёс куспын мар гинэ луымтэ, дыр. Но озьы ке но ужан аръёсты, коллегаостэс шуныт мылкыдын гинэ тодады вайиськоды.

— Быдэс улон отын вал ни, школаын. Тани мынам юртэ но кыӵе начар  кылемын, школа территориез радъяны курадӟыса. Иван Дмитриевич кулэм бере ватыны мынӥмы, мон соку директор вал ни. Гидкуазяз гробын кылле, тӧдьы-тӧдьы йырсиез, нош котыраз — таркаськем юртъерез. Со но ведь ассэ школа улонлы сӥзиз. Юртъерзэ утьыны дырез ӧз ни кыльы. Тани мынам но со озьы. Удмурт калык понна туж сюлэм висиз. Кытын ке мар ке луэ вылэм — удмуртэз курлало. Ми ӧжыт ке но удмуртлыкез, удмурт адямилэсь асваланзэ ӝутон понна тыршим.

— Чик малпаськытэк вераны луэ: тӥ зэмзэ но Ӟаны школа понна туж трос лэсьтӥды. Кӧня дышетскисьёслы визьнод сётӥды, кӧня дышетӥсьёслы зэмос пример луиды. Тӥ тросэз туала дышетӥсьёс понна но пример луиськоды. Туж бадӟым тау, вераськыны соглаш луэмды понна.