Ваньзэ адӟиз, чидаз, ӧз сётскы

Ми тодӥм, вуоз сыӵе нунал,
Гудыри, кулон пыртӥ,
дырзэ чик витьытэк,
Шунды ӝужанысен
Эрик но Тупаса улон вуоз.

80 ар ортчиз со дырысен, куке фашист Рейхстаг йылэ ӝутскиз Горд Знамя — Быдӟым Вормонлэн Знамяез, йылпумъяськиз Быдӟым Отечественной война. Советской калыклэн оскыны луонтэм кужыменыз, тыршеменыз вуим Вормонозь, асьсэ каразы кекатӥзы фашистъёсты.

Жаляса верано, кошкизы ни ваньмыз сямен Атыкай музъеммес утисьёс, кинъёс быдэс Дуннеез нацизм черлэсь мозмытӥзы, кинъёс уен-нуналэн тылын тыршизы: заводъёсын но фабрикаосын, ю-нянь будэтӥзы.

Но вань али мӧйыос, война дырысь нылпиос, кудъёсыз сюлэмазы, тодазы возё со секыт, курадӟем аръёсты. Нош асьмеос, туала дыре улӥсьёс но, тодамы возьыны кулэ со вакытэ тыршисьёслэсь быдӟым но быронтэм подвигъёссэс.

Мынам вераме потэ асьме гуртысь монэн одӥг фамилиен мурт сярысь — со Никитин Алексей Александрович, кудӥз войналэсь котыр шимес палъёссэ адӟиз.
А. А. Никитин вордскиз 1916 арын Карек-Серма гуртысь крестьян семьяын. Дышетскемез — 4 класс. 12 аресъем пияш ужаны кутскиз. Вазь кышнояськиз, 1937 арын нырысетӥ пизы вордскиз — Василий. 1938 арын Алексей Никитинэз колхозлы тӧрое бырйизы. Колхоз ляб ӧй вал. 1939 арын «Азьлане» газетлэн гожъямезъя, нырысьёсыз пӧлын октон-калтонэз, государстволы ю-нянь вузанэз, кизёнэз йылпумъяло. Но егит тӧроез 1939 арын декабре армие басьто. Службазэ Саратов областе интыяськем артиллерия полкын кутске, нош 1941 арын май толэзе ӝогак Белоруссиысь артиллерия дивизие вошто. Со фашистской Германиен жугиськыны дасяськон луэ. Ведь Германия асьме вылэ майлэн шораз ик урдскыны кулэ вылэм. «Асьмелэн Германиен ог-огед вылэ урдсконтэм сярысь договор вань, но тодэ, фашизм — тужгес лек тушмон но асьмелэн соин война луытэк уз кыльы», — И. В. Сталин 1940 арын март толэзе ик озьы вера.
Татын, белорус музъем вылын ик, красноармеец Никитин кышкыт виро войнаен пумиське. Западной фронтэ, кытын СО ожмаськиз, фашистской командование «Центр» армиезлэсь валтӥсь группазэ Москвае лэзе. Войналэн нырысетӥ нуналъёсаз ик тушмон бомбаосын пуштытъяз, Горд Армилэн дасяськыса вуымтэ армиез кир-пазь луиз, солдатъёс пӧлын валантэм югдур кылдӥз. Гудерианлэн танк частьёсыз пыдло пыро, асьмелэнъёсты нюр но нюлэс сюресъёстӥ чигнато, куддыр ожгар техникаез кельтылыса, котыртэме шедьылыса. Асьме солдатъёс лек ожъёсын тыршылӥзы шундыӝужан пала потылыны. Немецъёс котыртэмъёсты дугдылытэк миномётэн, авиациен ыбылӥзы, пехотаен ӝутскылӥзы. Но асьмелэнъёс котьку но пезьдэт сётылӥзы.

Красноармеец Никитинлэн кӧня вал таӵе котыртэмысь потэмез!

17 август. 1941 ар. Тушмон авиация асьме позициос вылэ ӵукна ик кӧня пол кужмо пуштытъяз. Пуштытъям бере, немецкой артиллерия Гомель дорын зол ыбылӥз асьме частьёсты. Собере артиллерилэн но бронетранспортёръёслэн юрттэменызы немецкой пехота потӥз. Немецъёс тросаз интыосын оборонаез пазяны быгатӥзы, кужмо шуккетъёслы чидатэк, нюлэсо нюро интыосы кошкыны тупаз. Но опытэн командиръёслэн кивалтэменызы, ялан пумитъяськизы. Трос вал ыштонъёс. Берло ини боеприпасъёс но бырон калэ вуизы. Нюръёс вамен потыны малпазы. Но ӧз пӧрмы. Таиз ожмаськон контузить карем красноармеец Никитин понна берпуметӥез луиз. 

Красноармеец Никитин пленэ шедиз. «Пленэ... аслам мылкыдыя ӧвӧл... О, вождэ эн вае!»

Фашист лагерьёсын улон кутскиз. Кӧня ке Белоруссиын возизы. Август пумын Польшаысь Любау городэ келязы. Ужъёс куспын, тужгес ик изьыны выдыкуз, Алексей тодаз вайылӥз дор палзэ, син азяз пуктылӥз гуртсэ, кышнозэ, Васьлэй пизэ. Кызьы соос отын?.. Ньылетӥ арзэ уг адӟы ук ини. 1942 арын 15 ноябрьысен 1945 арын 5 маёзь вал Бремен, Оснабрюк, Бюззюм фашист лагерьёсын. Лагерьын «улэмез» сярысь Эчи агай (озьы шуылӥзы сое) ӧз вералля. Юазы ке, синкылиосыз пызьырскылӥзы: «Адямиос сютэмен, кезьытэн, висьыса кулылӥзы. Секытэсь ужъёс быдэсъяллямы. Кулэмъёсты милемыз ватылытӥзы. Котькудӥз соку малпалляз, дыр: „Ӝоггес монэ но тазьы мед нуысалзы, мед бырысал таӵе курадӟон“. Сютэмен выжыен турын сиылӥм. Котькинлы изён инты ӧз тырмылы, гольык музъем вылын изьылӥм. Бременын (Германилэн уйпал-шундыпуксён палаз) жугиськон тӥрлык поттон заводын, чугун сюрес дурын ужамы. Висись, ляб военнопленнойёсты улэпен нуыса кошкылӥзы но бульдозерен гуэ согылӥзы. Та мыным но матынъяське ни вал. Но, оло шудлы, оло шудтэмлы, октон-калтон уже одӥг фермер арендае басьтӥз. Урод кузё ӧз тупа. Со дорын мырдэм катьяськыса вуи. Гурт ужъёс бырем бере, выльысь Бременэ келязы». 

...5 мае 1945 арын пленысь (Бремен) англи солдатъёс мозмытӥзы, нош 15 июне пыдын СССР-е келязы, Сталинской (Донецкой) областьысь Чистяков городэ. Феврале 1946 арын НКВД-лэн эскерон-фильтрация пунктаз эскерон ортчытӥзы, собере ялан ужан понна эгыр поттонэ интыязы.

Эчи агай дораз 1946 арын ноябре гинэ бертӥз ай. Ӧжытсэ сизьым ар со дораз ӧй вал. Армие кошкыкуз пиезлы аресэн ӝыны гинэ вал, бертӥз ке, со ини школае ветлэ. Тодаз вайылӥз: «Со аръёс виро, кулон, висён, куашкан аръёс вал».

Жугиськон бере аръёс но Эчи агай понна секыт луизы. Война бере кык ар шутэтскиз, 1948 арын октябре арестовать карыса, Магадан областе 10 арлы келяло. Жугиськон бере Эчи агай дуриськон куалаын дуриське. Кызьы ке но эшъёсызлы, оло нош пырись-потасьёс дыръя, Германиын улон сярысь мадем. Но кин ке со сярысь НКВД-лэн райуполномоченноезлы П. Овчинниковлы вуттэм. Солы со гинэ кулэ луылэм. Муртъёслэн куректонысьтыз со шумпотон басьтылэм. Овчинниковез ёросын мӧйыос тодо вал: бигерез но, удмуртэз но. Солэн гуртлы быдэ «пельёсыз» луэм, шуо.

...Сталин лагерь фашист лагерьлэсь номаин висъяськымтэ. Эчи агай дораз ноябре 1954 арын Сталин кулэм бере бертэ. Янгышысь 1993 арын поттэмын. Пытсэтысь потэм бераз дуриськись, лэсьтӥськон бригадалэн кивалтӥсез луэ. Плотник ужлы усто вал. Кӧня коркаос, гидъёс, капкаос лэсьтэмын солэн киосыныз, кудӥз-огез али но сыло на. Соос удмурт гуртъёсын гинэ ӧвӧл, бигер гуртъёсын но вань. Шуылоз, пе, вал: «Ужано озьы, асьмеос кошкем бере, медаз тышкаське, мед ушъялозы». Эчи агай нюлэсэз яратылӥз, ӵем нюлэскы ветлылӥз. Со пересьмытозяз туж чылкыт ветлэ вал.

Эчи агай усто семья кузё вал. Кышноеныз, Палагай апаен, 60 ар улӥзы, куинь пи будэтӥзы. Быдӟым пизы Василий ёросын азьмынӥсь шофёр вал, «Сельхозтехникаын» но «Сельхозхимиын» ужаз. Шоретӥ пизы Валентин трос аръёс ӵоже Вукогурт фермаен кивалтӥз, ёросын гинэ ӧвӧл, республикаын но одӥгез умоез ферма. Покчи пизы Геннадий Свердловской областьын улэ.

«Эчи агай!» — озьы каньыл, гажаса гинэ вазьылӥзы солы гуртоос но, палэнысьёс но. Кулытозяз пересь солдатлэн малпанэз вал: НОКУ МЕДАЗ ЛУ ВОЙНА!
(Гожтыны кутэмын архив документъёс но ӵыжы-выжыосызлэн тодэ ваёнъёссы).

Материалэз газетэ поттыны дасяз Карек-Серма гуртысь дано шутэтсконысь дышетӥсь Василий Никитин.