Визь кутэм сярысь... верано ӧвӧл?

Кӧня ке ар Удмуртиын улӥсько ке но ини, али но куддыръя «Азьлане» газетэз лыдӟись тодмоосы гожъяло. Кин ке улонэным тунсыкъяське, кин ке (шергес) газетамы мар ке но гожъя вал, шуэ. Шумпотӥсько, мазэ ватонэз. Гожъяны гинэ дыры уг тырмы. 

Ог куинь арня талэсь азьло Балтась ёросысь одӥг кышномурт ватсапам сообщение келяз. «Наташа, гожты вал газетамы визь кутон сярысь. Кемалась малпасько ни визез куто шуыса, мар бордысен кутскыны уг тодӥськы. Со сярысь адямиослэн но верамзы туж уг поты кадь... Мон кадь тодӥсьтэмъёс вань, дыр. Кинлы ке статьяед одно ик пайдаё луоз». 

Гожтыны мон пумит ӧй луы ке но, кышномуртлы та юанэн нырысь ик вӧсьчилы вазиськыны кенеш сётӥ. Солэн ответэз монэ паймытӥз: черке мыныса вӧсьчилэсь юаны возьдаськисько, пе. Та вераськонмы монэ малпаськонэ уськытӥз.

Аслым кыл сётӥ: та сярысь одно ик газетэ гожтыны кулэ. Кӧня ке нунал ӵоже ас поннам малпаса ветлӥ, кызьыгес умой луоз гожтыны шуыса (бен, интернетын визь кутонлэн секретъёсыз сярысь туж трос ивор, но сыӵе иворен гинэ пайдаяськыса тунсыко статья пӧрмытыны уг луы). Малпамтэ шорысь йырам туж умой малпан лыктӥз: черке ветлӥсь но визь кутӥсь адямиослэсь интервью басьто. Юаллясько, ку но малы соос визь кутыны кутскизы, капчиен-а со соослы сётске, нырысетӥзэ визь кутыны малпам адямиослы кенешъёс сётысалзы... Тунсыко луысал ук? Кутски статьяелы геройёсты утчаны. Тӥни соку ик вань мылкыдъёсы куашказы. Ёросысь пӧртэм гуртъёсысь черке ветлӥсь, визь кутӥсь кышномуртъёсты шедьтӥ, одӥгез но мыным интервью сётыны соглаш ӧз луы. Ваньзы тазьы валэктӥзы: «Малы визь кутэммы сярысь веранэз? Со ушъяськем кадь луоз ук». Нокыӵе верам аргументъёсы но кышномуртъёслэсь малпанзэс воштыны ӧз юрттэ.

Паймыса, ӵужанаелы жингыртӥ (со черке но ветлэ, визь но кутэ), малпай, со мынэсьтым мылкыдме валалоз, поддержать кароз шуыса. Но ӵужанае киыныз гинэ шонтӥз: шонер, пе, соос тыныд вераллям. Визь кутӥсь адямилэн со сярысь ушъяськыса верамез уз поты, пе. 

Ӧз вала монэ нокин, огъя вераса. Мынам ӧй вал малпанъёсы кинэ ке визь кутэмез понна ушъяны. Мынам соослэн примеразы лыдӟисьёслы возьматэме гинэ потӥз, кыӵе шуг-секытъёсын соос пумиськизы, кыӵе пайдазэ шӧдӥзы визь кутонлэсь. Интервью сётысалзы ке, соослэн визь-кенешъёссы, оло, кинлы ке юрттысалзы? Кин татын шонер? Та сярысь табере малпаны гинэ кыле на.

Озьы ке но, юанэн вазиськем кышномуртлэсь куронзэ быдэстэме потэ. Оло, зэмзэ но, кинлы ке та статья пайдаё луоз. 

Адямиос интервью сётыны пумит луэм бере, интернетысь иворен пайдаяськытэк ӧз луы.

«Фома» православной журналысь тунсыко материал шедьтӥ. Нимаське «Визь кутыны малпам адямиослы 10 кенеш» шуыса. Кенешъёсты сётэ протоиерей Максим Первозванский. 

НЫРЫСЕТӤЕЗ, мае йыразы возьыны кулэ визяны али гинэ малпам адямиослы: визяны кутскыны ноку бер ӧвӧл. Зэм, Инмарлы оскись но черке аръёс ӵоже ветлӥсь адямиос визез кутсконысеныз пумозяз кутыны тыршо, солы рос-прос дасясько. Но та визь тӥ понна нырысетӥез гинэ луиз шуыса, асьтэдыз эн пыкылэ. Талы дӥсьтэмды но ушъямон ини. 

КЫКЕТӤЕЗ, тӥледлы валаны кулэ, мар со визь. Висъялэ солэсь валтӥсь куронъёссэ. Сиён-юон, астэ возён ласянь сюбегатонъёс — визянлэн валтӥсь ужпумез ӧвӧл. Зэм, визяку адямиос постной сиёнъёсын гинэ кӧтсэс тыро, шулдыръяськонъёслэсь куштӥсько. Но лулусьтонтэк, вӧськылтэк визь кутонлэн пайдаез уз луы.

КУИНЕТӤЕЗ, улонысьтыды вань мултэсэзлэсь куштӥськыны тырше. Турттэ ӧжытгес телевизорез учкыны, компьютерен шудыны, соцсетьёсын пукыны. 
Со интые Евангелиез яке мукет черк книгаосты лыдӟыны быгатӥськоды. Тросгес семьядылы дыр висъялэ. 

НЬЫЛЕТӤЕЗ, нуналлы быдэ ӧжыт ке но вӧсяськыны дыр шедьтэ. Кутске пичиысен. Вӧсяськыны дышемын ӧвӧл ке, визь дыръя дышетскыны туж шонер луоз. Та дырозь вӧсяськонъёсты вакчияк яке асьтэлэн кылъёсыныды лыдӟиды ке, али черк правилоослы вазиськыны тырше, лыдӟе черк книгаосъя. Шутэтскон нуналъёсы ке но черке ветлыны дышысалды ке, умой луоз. Визь мыныку, черкын службаос но аспӧртэмесь, соослэн атмосферазы но мукетгес луэ.

ВИТЕТӤЕЗ, визяны малпады ке — со тӥляд асьтэлэн гинэ быръёнды. Та быръёнды матысь адямиосты понна эскеронлы медаз пӧрмы. Валамон, улонады ӧжыт ке но воштӥськонъёс луозы, но со воштӥськонъёс семья кусыпъёстэс йӧтыны кулэ ӧвӧл. Кылсярысь, кузпалэныды яке нылпиосыныды ӵош мае ке лэсьтыны дышиды ке — шуом, ӝытъёсы фильмъёс учкыны — соосты огназэ эн кельтэ, валче луэ.

КУАТЕТӤЕЗ, быгатэлэ улон-вылондэс шонер радъяны. Тӥ визяны малпады но со дыре ик тӥ кузпалдэс, нылпиостэс сюдон понна кылкутӥськоды ке, асьтэлы нимаз сиён пӧралэ, нош семьяосты дышем сиёнъёсын сюдэ. Но пӧраськонэн тӥ уд выриське ке, тодады возе: тӥледлы нокин нимаз сиён дасяны кулэ ӧвӧл, со тӥляд сюлмаськонды гинэ. 

СИЗЬЫМЕТӤЕЗ, тазалыктэс чаклалэ. Визясько шуыса, сӧзнэтты сярысь эн вунэтэ. Врачъёс тӥледлы визь кутыны уг ӵекто ке, кылзӥське соослэсь. 

ТЯМЫСЭТӤЕЗ, шутэтсконъёслэсь, путешествиослэсь куштӥськыны умойгес луоз. Шутэтскыкуды шулдыръяськемды потоз, нош визяку адямилы нырысь ик лулпуш дуннеез сярысь малпаськыны но сюлмаськыны тыршоно. 

УКМЫСЭТӤЕЗ, быгатэмдыя шулдыръяськонъёсты но выль ар корпоративъёсты кельтэ. Ӧтёнлэсь куштӥськыны уг яра ке, мынэ, но асьтэды шонер возе. Коллективлэсь эн люкиське. 

ДАСЭТӤЕЗ, визяны кутски шуыса, сьӧраз эн ортче (переборщить). Ушъямон, тӥляд ваньмызлы ӝог гинэ дышетскемды потэ ке: визь кутыны но, вӧсяськыны но, черке ветлыны но. Но ваньзэ асьтэ кужымдыя но быгатэмдыя быдэстэ, пичиен-пичиен ке но. Черке ветлӥсь эшъёстылэсь, тодмоостылэсь визь-кенеш курыны эн возьдаське, одно ик вазиське вӧсьчиослы но. Нош ялан сиён сярысь гинэ малпаськоды ке, со шонер ӧвӧл. Визь кутыкуды тӥ Инмар сярысь, асьтэлэн улонды сярысь малпаськыны но сое умойгес карон понна тыршыны кулэ. 

Тани таӵе пичи гинэ кенешъёс. Кинлы ке но статьяе пайдаё луиз ке, туж шумпото.