Визьнодан – дышетон удысын валтӥсь ужпум

2023 ар Россиын дышетӥсьлы но визьнодасьлы сӥземын. Арлэн пумыз вуэ ке но, ёросысь дышетон ӧнерысь усточиос котькуд вожвылъяськонъёсы пырисько. Туала дышетон но визьнодан удысъёс трос куронъёсын тырмемын, соин дышетӥсь но аслаз ужаз котькуд нунал вылезлы дышетскыны тырше.

Ципья шоръёзо школа - ёросын трос йӧскалыкъем дышетскон юрт луэменыз тодмо. Татын 17 гуртысь огъя 358 нылпиос дышетско. Ог-огзэс валаса но гажаса огкылысь ужало но ;дышетско удмуртъёс, бигеръёс, ӟучъёс, поръёс но мукетъёс. Шумпотымон, котькуд удысын Ципья шоръёзо школа вормонъёсы вутске но аслэсьтыз  "планказэ" ёросын данлыко возе. Али дыре школалэн директорез - Раниф Рифатович Ахатов. (Та дырозь директорлэсь ужзэ быдэстэм Сайдаш Талгатович Нурмиев Ципьяысь "Калыкъёслэн эшъяськонзы" шаертодон музейын директор луэ).

Школае пыриськод ке, соку ик адӟиськод: чылкыт выж, эшлыко ужасьёс, жингрес нылпи куара: школаын улон "пӧзе". Нина Николаевна ӵапак ужъёсыныз пуке вал. 

Нина Николаевна Давлекова вордӥськиз 1979 арын, шоро-куспо семьяын. Анаез но атаез тыршыса ужасьёс, нылпиоссылы соос ваньзэ умойзэ сётыны сюлмаськизы. 

Дышетскон вакытаз но Нина ассэ кылкутӥсь, серьёзной дышетскисен возьматӥз, дыраз косэм ужъёсты лэсьтыса, активной, но вылтӥяськон сямыз пырак ӧй вал. Жаляса верано, нылашлы атаез вӧзын кема нуныяськыны ӧз йӧты, 10 классын дышетскыкуз, атаез улонысь кошкиз. Анайзылы юрттэт луыса, ӝикытгес улоно луиз, озьы ке но, ваньмыз тырмыт вал. - Сыӵе огшоры семьяын вордӥськеме ик улонын юрттӥз, - шуэ ачиз Нина Николаевна. 

1996 арын зарни медален йылпумъяз Ципья шоръёзо школаез. 2001 арын Казаньысь ӟуч филологи факультетын ӟуч кылъя но литературая, англи кылъя дышетӥсьлэсь ӧнерзэ басьтыса, 1 куарусёнысен ик аслаз дышетскем школаяз ӟуч кылъя но литературая дышетӥсь луыса ужаны кутскиз. Дышетӥсь сяна, солы классэн кивалтонэз но оскизы. 

- Пинал луэме шоры учкытэк, мыным класс оскизы. Котьку шуг-секытъёсын тырмем класс сюре вал, куддыръя туж секыт луылӥз, мазэ веранэз. Но асме котьку буйгатӥ, ужын котьку выль амалъёс утчаны тырши. Аръёслэсь ортчемзэ шӧдытэк ик кыли. Нылпиосын валче дышетӥсь ачиз но вылезлы дышетске, соосты кылзыса, валаса ужаськод ке, емышъёсты кема возьмано уг луы, воштӥськонъёс котькинлэн син шораз йӧтыны кутско,- ужаны кутскем дыръёссэ тодаз вайиз Нина Николаевна.
Аслэсьтыз туннэ нуналлы одӥгзэ самой бадӟым данъетсэ но возьматӥз: Гарифзян Галиевич Галиевен ялэм преми утон конкурсын вормисе потэм пусъетсэ.

Редакцилэсь: Г.Г. Галиев нимо премия 2022 арын ялэмын вал. Со дышетон но лулчеберет удысын шӧдскымон ватсэстъёс лэсьтэм, пиналъёсты но ёросысь егитъёсты патриотизм мылкыд пыӵатыса визьноданын егит ужасьёсты пусъён ёзсӧзнэт (форма). 

- Мон понна та туж дуно данъет луэ, малы ке шуоно Гарифзян Галиевичез аслам визьнодасеным лыдъясько. Мон солэн дышетэмъёсыз пыр потэмын, аслэсьтым али ужме но троссэ солэн верамъёсыз вылэ пыкиськыса быдэстӥсько. Преми материальной вал ке но, мон понна таиз валтӥсез уг луы, самой дуноез - визьнодасьлэн пусъемез, аслаз киыныз сётэм данъет. Мынам вань трос грамотаос но дипломъёс, соос одӥг интые люкамын, но самой дунооссэ мон тани шкафын возисько. Али та борды итӥськиз Элькун конкурсын вормем данъет но.

Зэмзэ ик, пиналъёсты дышетон но визьнодан - мерлыклэн (обществолэн) валтӥсь секыт ужпумъёсыз. Азьланяз нылпиосмы кунмылэн зэмос кунмуртъёсыз, патриотъёсыз мед луозы шуыса, соослы ас ужъёсыд вылын пример возьматыны кулэ. Нош дышетӥсь та ужын азьпал радын сылэ. Со нылпиез шонер сюрестӥ нуэ, солы аслэсьтыз тодон-валанъёссэ сётэ, сюлмо но йӧно адями луыны юрттэ. 

20 арлэсь кема дышетон удысын тыршись нылкышнолы 2021 арын оскизы директорлэн визьноданъя воштӥсезлэсь ужзэ. Солэн кивалтэмез улсын 21 классной руководительёс. Кивалтон ужын котькуд адямилы секыт луэ, ватонэз ӧвӧл, татын куронъёсыз но мукет, кылкутонэз но трослы бадӟымгес. Но, 3 ар куспын Нина Николаевналэн "копилкаяз" элькун, ёрос масштабен ортчись вожвылъяськонъёсысь данъетъёсыз трос гинэ люкаськизы ини. Та сяна, дышетонзэ но уг вунэты: урокъёсызлы рос-прос дасяськыса, ӟуч кылэз но литератураез аспӧртэмлыко амалъёсты кутыса дышетэ. 

- Ватытэк вераны кулэ, кивалтон ужын капчи ӧвӧл. Пиналъёсын, дышетӥсьёсын, ужасьёсын, анай-атайёсын огкылысь валаса ужано. Котькуд ласянь кылзоно, кылдэм югдурез умой пала берыктыны быгатоно. Ӵукна но, уйин но тон котьку "на связи" луыны кулэ, котькуд семьялэсь югдурзэ тодыса, эскерыса возёно. 

- Кемалась ӧвӧл тӥ "Лучший общественный воспитатель РТ" конкурсэ пыриськиды но "Воспитание на национальных традициях" номинациын вормись луиды. Вералэ вал кӧня ке, кызьы дасяськиды? Асьтэос мылкыд кариды-а кужымдэс эскерыны?

- Ачим уг тодӥськы вал та конкурс сярысь. Мон ноку асме вылӥ уг пуктӥськы вал, ужме гинэ ӟечлыко быдэстыны тырши. Ужъёсме ёросысь кивалтэт адӟем, вылды. Али ке но уг оскиськы, "Лучший общественный воспитатель" конкурсын вормись луи шуыса. Туж трос ӟечкыланъёс лыктӥзы. Вордӥськем нуналэ но сомында ӟечкыланъёс уг луо. Собере гинэ валай, кыӵе жингрес чузъяське - "Лучший общественный воспитатель Республики Татарстан". 

Та конкурслэн зональной этапаз пыриськыны шӧдтэк шорысь ӵектизы, со Арча карын ортчиз, отын 16 кузя вал ми. Куронъёсыз но туж чурыт пуктэмын вал: лэсьтэм ужлы видео яке презентация амалэн отчёт лэсьтон.

Нош ачиз конкурс 2 люкетлэсь луиз: нырысетӥез - лэсьтэм видеоя яке презентацияя жюриын пукись ёзчиослэн юанъёссылы валэктон сётон, кыкетӥез - "Котырес ӝӧк" - нылпиен герӟаськем секыт югдуръёсты эскерон. Та этапын самой секыт югдур мынамез луиз. Соин ик мыным ужъюлтошъёслэн юанъёссылы валэктонъёс утчано луиз, "утиськоно луиз" шуом, мукет сямен. Мынам малпамея, аслэсьтым адӟонъёсме возьматыны, югдуръёсты сэрттыны-пертчыны быгатонлыкъёсме усьтыны, ас ужъёслэсь мынэмзэ шараяны быгатӥ. Конкурслэн нимысьтыз 2-тӥ люкетэзлы туж шуг дасяськыны, малы ке шуоно тон уд тодӥськы, кыӵе юанъёс тон азе пуктозы. Татын тынад тодон-валанъёсыд юн луыны кулэ: ужан амалъёсыд, секыт югдуре вуэм нылпиосын ужам йылпумъянъёс. Мынам ноку но таӵе бадӟым элькун конкурсъёсы пыриськеме ӧй вал. Соин но мон туж паймисько, зональной но элькун этапъёсын вормись луи шуыса. Вераме потэ: мон понна та туж бадӟым данлык. Мыным оскемзы понна Ильгам Фидаелевичлэн командаезлы бадӟым тау шуэме потэ - Алиса Наилевналы, Зухра Гамилевналы. Соос мыным моральной юрттэт сётӥзы. Та мыным оскон сётӥз но мылкыдме ӝутӥз.

Туала улонлэн куронъёсыз туж ӵем вошъясько но чурытгес луо. Улонэ пыӵаса, адямилэсь йырсазьзэ копак вошто но улонлэсь радзэ мукет ӧре лэзё. Школа - со дышетон инты гинэ ӧвӧл, татын нылпиез зэмос улонлы дасяло. 

- Мон котьку пиналъёслы туала улонысь примеръёсты вераны тыршисько. Кылсярысь, Александр Суворов - кыӵе юн вал солэн лулкынар кужымез. Ӧз удалты шуыса, аслэсьтыз ужзэ ӧз кушты ук со, азьлань мынӥз, оскиз. Яке тани блогер Рустам Набиев, ки вылаз бадӟымесь гурезьёсы тубиз, вормиз. Куддыр нылпи огшоры вераськемез возьма. Ӵошен пуксьыса ас улонысьтым учыръёсты но верасько, собере нылпи валатске: дышетӥсь матэгес бордаз лэзе сое, уг палэнскы. Нылпилэн мылкыдэзъя, ассэ воземезъя ваньмыз шӧдӥське. 

-Туннэ нуналысь дунневыл югдурез (нимысьтыз ожгар операци) котькуд адями тодэ. Таин сэрен кызьы визьнодан пушсӧзнэтэз радъяно? 

- Туннэ нуналлы милям 13 нылпиослэн матысьёссы нимысьтыз ожгар операцие пырисько. Соосын ми туж матын ужаны тыршиськом. Троссэ классэн кивалтӥсьёссы соосын ужало ини. Дэмласько тросгес саклык висъяны, семьяенызы ужаны.

- Бадӟым классъёсысь нылпиос ожлэсь пуштроссэ валало ке, покчи классъёсысь пиналъёс понна со воксё валантэм суред на. Кызьы сыӵе нылпиосыз пумит влиянилэсь утёно? 

- Та учыре пиналъёслы аслэсьтыд малпанъёстэ кужмысь пыӵатоно ӧвӧл. Озьы ик кыӵе ке кун шонер, мукетыз шонер ӧвӧл шуыны уг яра, малы ке шуоно нылпи покчи аресысен ик адӟемпотостэм мылкыдъёсын будӥз ке, азьланяз солы туж секыт луоз. Со котырысь улонэз котьку сьӧд яке тӧдьы буёлъёсын гинэ адӟоз. Нош дунне вылын пӧртэмез луэ. Кин ке янгышъёссэ вала, тупатске, нош умоез урод пала берытскыны быгатэ. Доразы анай-атайёссылэсь юаллясько, дыр. Но дышетӥсьлэн валтӥсь ужез - югдурез пиналлы нылпи кылэн валэктыны. Дышетӥсьлэн кылыз бадӟым инты басьтэ, соин чакласа вераськоно, мултэссэ шараяно ӧвӧл. Покчи классъёсысь нылпиос нимысьтыз оскисесь али. 

- Кызьы малпаськоды, тӥляд уж шоры учкемды но ужан амалъёсты мукетъёслэсь маин висъясько?

- Котькуд адямилэн аслаз учконъёсыз, дышетон амалъёсыз. Кин ке ассэ чурыт возе, озьы ке но сое гажало, данъяло, кин ке анай кадь небыт луэ. Мынам вань аслам "кредо" выллем индылэтъёсы:

1. Огшоры семьяын вордӥськеме мыным юрттӥз шуг-секытъёсын нюръяськыны, лулын кужмо луыны. Ачим пичи ке но, асме утьыны быгатӥсьтэм, но лулын туж кужмо адями луисько.
2. Мынам визьнодасьёсы. Соос мыным кужым сёто, азьлань ужме быдэстыны "стимул" выллем луо. Али дыре туж бадӟым юрттэт сёто азьло директормы - Сайдаш Талгатович Нурмиев. Секыт учыръёсы али но вазиськисько, пумит уг луы, котьку лыктыны но юрттыны дась.
3. Тон янгышъёс лэсьтоно ӧвӧл. Туж кылкутӥсь интыуж луэ та. Мон нылпилэн лулыныз ужасько, сое вӧсь карыны туж капчи. 
4. Самой валтӥсез - изъянтоно ӧвӧл.
5. Ачид сярысь эн малпаськы, астэ нылпи интые пуктыны кулэ, соку тросэз валамон луэ. 
6. Нылпиез одно ик ушъяны кулэ. 
7. Патриотизм. Ас калыктэ но шаердэ яратон мылкыд пыӵатыны туж шуг туала дыре, соин та пунктлы эшшо но тросгес саклык висъяно.

- Ас интыяды ужаськоды шуыса вераны быгатӥськоды-а?

- Одно ик! Мон валасько: та интыын мон кулэ шуыса. Огшоры дышетӥсь луыса, коньдонэ но тросгес луысал, уже но трослы капчиясал, но аслам школаелы, пиналъёслы умой лэсьтэм потэ. Вань та дипломъёс, грамотаос одно ик асдунъетэз (самооценкаез) ӝуто, ватонэз ӧвӧл, но валтӥсез - мынэсьтым вормонъёсме адӟыса, нылпи но умоезлы кыстӥське. Ачид вылын пример ӧд ке возьматы, нылпи ноку но тонэ уз гажа. 

- Дышетӥсьлэн трос дырыз школаын ортче, таин валче семьяяды валамтэос уг кылдо-а?

- Куддыр луо ини, сотэк уг лу. Дыр ортчемъя дышизы кадь ини. Нырысьсэ класс сётэм беразы, машинаос ӧй вал, нылпиос доры пыдын ветлӥсько вал. Собере одӥг пол машинамы ӧз ужа. Кузпалэ соку Тагашуре фермае ужаны ветлэ вал, вал кыткыса берпуметӥ урокъёсысь пегӟем дышетскисез вайыны бускель Вукогуртэ мынӥ. Котьку аслым шуисько: "Ужъёсты дыраз ик" лэсьтоно. Мукет нуналлы кельтӥд ке, со вунэ но кыле . Сыӵе выллем "кредоен" улӥсько. 

Котькуд ужзэ дыраз лэсьтыса, адями азьын ушъяськыны гинэ ӧвӧл, нылпиос азьын адӟем карымон адями луыны тыршись дышетӥсез котькуд удысын синйылто. 

Нина Николаевна ассэ шудо нылкышноен но дышетӥсен, кивалтӥсен лыдъяны быгатэ. Александр кузпалэнызы соос 2 нылпиосты будэто: пизы университетын 4-тӥ курсын дышетске, нош нылзы туэ 1-тӥ классэ вамыштӥз. Ужан удысаз но со гажамон луэ: ӵош ужасьёсыз солэсь кенеш куро (вераськон дыре но трос дышетӥсьёс со доры пыразы, юанъёс сётъязы, огзылы но "уг" ӧз шуы). Нылпиос сое гажало, юаллясько, кышкатэк дораз пырало. Соос валало: татын соослы кенеш сётозы, кылзозы, веранъёссы кабинетлэсь кыдёке уз кошке.

- Вераськонмес В.А. Сухомлинскийлэн кылъёсыныз йылпумъяме потэ вал: "Чтобы стать настоящим воспитателем детей, надо отдать им" своё сердце. Зэмзэ ик, нылпиез сюлэмад пыртӥськод ке, со но тыныд трос таукарон кылъёссэ вуттоз. Кин тодэ, оло дыр ортчыса, пенсие потӥ ке, нылпиос тау карыса дорам лыктозы, шумпотонъёссэс вералозы но индылонъёсты кулэ луисен лыдъялозы.

Мон понна та кылъёс мур пуштросо луо. Визьнодасьлэн сюлмыз одӥг ке но, со туж бадӟым, пумтэм-йылтэм, котькуд нылпиез ас бурд улаз басьтыса шунтыны но либатыны быгатӥсь, висъятэк котькуд нылпиез яратӥсь. Сыӵе ик луыны кулэ зэмос визьнодась. Нина Николаевналэн ас ужзэ быгатыса, тыршыса быдэстэмез котькин понна шӧдскымон адӟиське, аръёс ортчыса но элькун, ёрос, школа понна тыршемез улоназ бадӟымесь шумпотонъёсын гинэ мед берытскысалзы. 

Нина Николаевна - зэмос визьнодась, дышетӥсь. Сюлмысь ӟечкыласьком бадӟымесь вормонъёсы вутскеменыз! Азьланяз но нылпиос понна кулэ луись адями мед луоды. Ужады азинсконъёс, нош семьяяды тупаса но валаса улон сӥзиськом!