«Вордскем палъёсам улӥсько, со сярысь ик кырӟасько»

Карек-Серма гуртэ нырысетӥзэ гинэ ӧм вуылэ ини. Куать ар талэсь азьло нырысетӥзэ мынӥмы вал, нош 2017 арын ферма уженызы тодматскимы. Со пумиськонъёслэсь шуныт мылкыдъёс гинэ кылиллям вал, нош таяз учыре синмаськонмы эшшо но будӥз.

Шуг-секытъёс татын но вань

Карек-Сермаын нырысетӥез вераськоно муртэ гуртысь патриот, удмурт кылэз утён ӧрын верантэм уно уж лэсьтӥсь Василий Никитин луиз.

— Туннэ нуналэ гурт калыкез мар сюлмаськытэ? — юасько мон солэсь.

— Бадӟым шуг-секытъёсмылэн одӥгез — со ву башня. Вужез ини уг яра, вылез басьтэмын, но сое интыяно, — шуэ со. Ужпумъёсты радъянын самообложение коньдонлэн пайдаез бадӟым шуыса, гурт калык умой вала. Соин но со уксёез люкан ласянь ӝегатсконъёссы татын ӧвӧл вылэм. Кылсярысь, 2021 ар понна самообложение коньдонэз ваньзы ӵошен 7 февральлы люкаса быдтӥллям.

— Гуртысь урамъёсты но самообложение уксёен тупатэмын-а?

— Соос, программа вылэ пыкъяськыса, 2014 арын радъяськизы. Гурт урамъёсы Уралысь из тыремын. Табере боты дӥсяммы ӧвӧл ини, — валэктэ Василий Петрович.

Азьло, сюресъёссы луымтэ дыръя, йӧл сётыны но курадӟем калык туннэ сюресъёслы, капка азе лыктыса йӧл люкамзылы шумпотыса улэ. Гуртын кутьые ветлӥсь скалъёслэн лыдзы но берло дыре йылэ. Туннэ соос 34-е вуэмын.

Жаляса верано, кӧня ке ар талэсь азьло гуртын фермазы бырем. Татысь пудоез Бурнакысь фермае выжтӥллям. Ирина но Владислав Матвеевъёс, Иван Петров, Дмитрий Асаков табере бускель гуртэ ужаны ветло. Иван Петров гужем уморто бакчаын но ужа вылэм. Солы юрттыны азьло мушкасьсы Семён Шестаков но лыктэ, пе. Механизаторъёс Николай Рогожин, Николай Константинов, Алексей Якимов, комбайнёръёс Николай Асаков, Владимир Якимов, шофёръёс Николай Копаров но Андрей Игнатьев, ву кысконын ужась Николай Камаев вордскем гуртсылэн данъяськонэз луо.

Кылем сӥзьыл «Борнак» обществолэн кужыменыз ӟазег но ӵӧж будэтон понна вутымез сузяллям. Та тылобурдо вордӥсь гурт калык понна бадӟым юрттэт луэм. Обществолэн кивалтӥсезлы Рафкат Назиповлы соос та понна тау каро.

Гуртысь адӟем карымон семьяос

Гуртын школа, нылпи сад кемалась пытсаськемын ке но, туннэ нуналэ ужа клуб, библиотека, магазин но медпункт.

— Гуртмы пичи ке но, библиотекае ветлӥсьёс трос. Ӵемгес гуртлэн историез сярысь альбомъёсты куро. Историез эскерон, калыкез утён ӧрын туж уно уж нуиськом. Гуртлэсь историзэ люкан, библиотекамылэн одӥг люкетаз музей кылдытон но та ужпумен быдэстэмын, — шуэ атайзыезлэсь Александр Якимовлэсь ужзэ азинтыса ини дас ар татын тыршись Мария Якимова. Библиотека озьы ик Сизнер гуртын но ас услугаоссэ ӵектэ. Мария апай ачиз но Сизнерысь вылэм. Карек-Сермае кен луыса вуэмез дырысен трос ар ортчем ини. Куинь поколениез огазеясь выжы юртазы соослэн семьязы гуртооссылы адӟем карымон улэ.

Карек-Серма гуртысь эшшо одӥгез адӟем карымон Игнатьевъёслэн семьязы сярысь но туж шуныт малпанъёссэс веразы гуртооссы. Та семьяысь тужгес арлыдо муртлы — Аграфена Павловналы — 92 арес. Со Юрий пиеныз, Любовь кенэныз, Игорь но Яков внукъёсызлэн семьяосынызы ӵош улэ. «Зифа» организациын ужась Игорь Наталья кузпалэныз кык пи будэто. Яков — «Борнак» обществоын кышкыттэмлыкъя инженер, нош октон-калтон дыръя шофёр луыса тырше. Вероника кузпалэныз одӥг пи будэто. Гуртын районысь потребительёслэн обществозылэн магазинэз пытсаськем бере, Игнатьевъёс ас магазинзэс усьтӥллям. Любовь Игнатьева вузъёсты но нуллэ, ачиз ик вузкарись но луэ. Та семья гуртлэн улоназ но мылысь-кыдысь пыриське.

Нылпиос — гуртлэн вуоноез

Гуртлэн вуоноез — нылпиос сярысь — гуртысь фельдшерлэсь Лариса Никитиналэсь юалляськимы.

— Школа аресэн — сизьым, нылпи садэ ветлӥсь куинь пинал вань. Соос Шор Кушкетысь школае но нылпи садэ ветло. Нош куинез нылпиос али доразы, — шуэ фельдшер.

Лариса Никитина ӝыны штатэн та гуртын фельдшер луэ, ӝыны штатэн Сала Кушкетэ ветлыса ужа вылэм.

— Тросэз школаез йылпумъямъёс вылӥ дышетскон юртъёсы пыро, та шумпоттэ. Соос милям данъяськонмы. Виталий Анатольевич Петровез гинэ басьтомы. Ижевскысь гурт возёсъя кун академиын аспирантураын дышетске, со дыре ик студентъёслы но тодон-валан сётэ, — шуэ Василий Петрович.

«Удмуртский каждый день»

Василий Никитин гуртэз понна сюлэмзэ сётыса улӥсь адями. Кылэз утьыса кельтон ӧрын но бадӟым уж нуэ. 2016 арын ветеран дышетӥсь малпамтэ шорысь «Удмуртский каждый день» группаен тодматске, нош кӧня ке ар талэсь азьло, группаез радъям Украинаын улӥсь Полина Григорьевалэн ӵектэмезъя, редакторезлы тодмостӥське. Та группалэн ужез ма бордын луэ бен? Василий Петрович нуналлы быдэ инкуазь сярысь гожъямъёсты, ӟуч кылбуръёсты но соослэсь удмурт кылэ берыктэмъёссэс, вакчиесь выжыкылъёсты интыя. Туннэ нуналэ 9 сюрс пала гожтӥськисез луэм группа удмурт кылын дышетӥсьёс понна дась юрттэт шуыны кулэ.

— Ар ӵоже одӥг нуналэз но кельтытэк быдэстоно уж уг акыльты-а? — тунсыкъяськисько мон.

— Одӥг нуналлы гинэ но уж ке дугдӥз, лыдӟисьёсме сютэм кельтӥсько кадь потэ, — шуэ Василий Петрович.

Тӥни сыӵе тыршись, пуктэм ужпуме вутскись, ас гуртэзлэн патриотэз луись калык улэ Карек-Сермаын. Асьсэлэн верамзыя, вордскем гуртазы улыса вордскем кылынызы вераськыны шудо соос.