Вормонлэн 72 арезлы сӥзем митинг

Луиз «Быронтэм полк» колонна, ветеранъёслэн туспуктэмъёсынызы транспарантъёс. Та туж сюлэмез бугыртӥз: быремъёс выльысь строе султӥзы кадь, соос нош ик егитэсь, осконъёсын но улонлы сайкыт малпанъёсын пачылмемын. «Быронтэм полк» - со асьме огъя Вормон понна улонзэс сётэм выжыосмес тодын возён. Асьмеос адӟыны кулэ ас улонэнызы вормонэз ваем тусъёсты.

Быремъёсты буре вайыны но ветеранъёсты сӥлы карыны лыктӥзы дышетскисьёс но дышетӥсьёс, нылпи садысь пиналъёс но визьнодасьёс, ФАП, культура юрт, черкогуртамы но бускель гуртъёсын улӥсьёс, «Сурнай» но «Ушма» обществоослэн кивалтӥсьёссы, гурт поселенилэн главаез. Ваньзы соос люкаськем калыкез Вормон нуналэн ӟечкылазы, нимысьтыз таукарон кылъёссэс ветеранъёслы веразы. Покчи Лӧзя гурт поселениын одӥг Быдӟым ожысь ветеран кылемын - Медведев Анатолий Кузьмич, 18 тылын тыршемъёс. Митинге лыктыны быгатӥзы тылысь ветеранъёс пӧлысь 10-эз гинэ.

Ож аръёсы бырем советской адямиосты лыктэм калык одӥг минут ӵоже чалмыса буре вайиз. Собере митинге пыриськемъёс синпелет доры гирлянда, венокъёс но сяськаос понӥзы.

Праздник азьланьтӥськиз Покчи Лӧзя школаын жӧк сьӧрын. Ветеранъёс ортчемзэ тодазы вайизы, концертэз нуисьёсын сюлэмез бугыртӥсь кырӟанъёс кырӟазы.