Воштӥськем потэ. Воштӥськыны кулэ

Ильнур, 17 апрель 2014 - 17:45

1434

Туннэ нуналэ район газетлэн 6000-лы матэ («Хезмэт» газетлэн - 5000-лэсь, «Азьлане» газетлэн 800-лэсь уно) лыдӟисез вань.

Та бадӟым лыдпус, но со талэсь но бадӟым луыны быгатэ. Лыдӟисьёсмылэсь лыдзэс будэтон, газетмес лыдӟымон карон, гожтӥськон дунъёс будэм вакытэ но абонентъёсмес ыштонтэм понна, огъя вераса, газетмылэсь выл но пуш туссэ воштон понна ма ужано? Творческой коллектив луэмысь, ми та сярысь трос малпаськиськомы, вераськиськомы, утчаськиськомы. Мукетъёслэсь но малпанъёссэс тодон, ӵектон-мылкыд каронъёссэс кылзон вылысь, кемалась ӧвӧл редакцие тужгес активной селькоръёсмес ӧтимы.

Вераськонэз газетмылэн редакторез Вакиф Закиев кутскиз:

- Газетэз, зэмзэ но, воштэм, лыдӟымон карем потэ. Выль рубрикаос кылдытыны, пӧртэм темаосъя гожъяны тыршиськомы. Мукет район газетъёсын потӥсь выль иворъёслы но саклык висъяськомы. Но тросаз учыре газетлэсь пуштроссэ воштон милям мылкыд каременымы гинэ уг герӟаськы. Быдэстоно нимысьтыз куронъёс вань. Вералом, тросэз яратыса критиковать каро ньылетӥ бамысь ялонъёсты, ӟечкыланъёсты. Но та - туала улонлэн куронэз. Реклама газетлэсь ньыльдон процент люкетсэ басьтыны быгатэ шуэм курон пуктӥське.

Фарида Шакирова - гожъяськон удысысь ветеран: Тӥни со кылем ӧжыт люкетэз калыклы яратыса лыдӟымон карон понна журналистлэсь туж бадӟым устолык куриське уга. Пӧртэм темаосты, тунсыко геройёсты утчаса шедьтон... Газетын берло аръёсы ужась адями, солэн проблемаосыз ӧжыт югдытӥсько. Гурт хозяйство, дышетон, медицина удысын но проблемаос тырмыт. Зэмос улонэз югдытон уг тырмы. Зэм, берло дыре выль иворъёс тросгес адскыны кутскизы. Кӧня аръёс ӵоже куд-ог гуртъёс сярысь одӥг гинэ статья но ӧз поты ук.

Гарифзян Мухамметшин - кылбурчи: Газет шаблонъя улыны кулэ ӧвӧл. Со район улонэз югдытыны, солэн «синучконэз» луыны кулэ. Тани тӥ пумиськонэ ӧтемды бере, Магсум агай, Ахат агай («Хезмэт» газетлэн азьвыл редакторъёссы - ред.) вакытэ потэм район газетъёсыз учкыса пуки. Чылкак мукет газет ини. Та кинэ ке но курласа веран понна ӧвӧл, но берло аръёсы газетлэн лултылыз кысӥз, шӧмыз быдмиз. Солэсь аслэсьтыз вылтуссэ кылдытыны кулэ.

Ф.Шакирова: Берло дыре 90-95 арессы тырмем арлыдоос сярысь бадӟым карыса гожъяло. Огпӧртэм материалъёс лыдӟисез тунсыкъяськытыны нокызьы но уг быгато ини. Соосты, оло, вакчи ивор формаен гинэ сётыны кулэ, дыр?

Г.Мухамметшин: Шонер малпан. Асьме дорын нош одӥг маке сяме пыриз: кулэм адямиослэн матысьёссы район газетэ тау карон статья сётонэз одно быдэстоно ужпумен лыдъяны кутскизы. Паймымон югдур ук: «Атай яке анай милемыз простить карыса кошкизы меда, гуртоос «Таос анай-атайзэс кадырласа утизы меда» шуыса уз вералэ-а?» шуон интые, «Газетэ ӧй ке гожты, адями ма шуоз» шуыса, малпаны кутскизы. Вакчияк вераку, модалы пӧрмиз та. Таӵе гожтэтъёсты тросэн сётыса, калыкын висён кылдытымон.

Рафхат Зарипов - дышетон удысысь ветеран: Монэ статьяослэн кылзы, стильзы, янгышъёс туж сюлэмшугъяськыто. Вакчиесь гинэ иворъёсын но янгышъёс луо, лыдӟыса-лыдӟыса но валаны луонтэм предложениос кылё. Синме йӧтыса улӥсь янгышез адӟыса, «эх» шуиськод ини.

Резеда Зарипова - районысь центральной библиотекалэн кивалтӥсез: Ми дорын 1958-тӥ арысен район газетлэн подшивкаосыз возьмасько. Туннэ котырес ӝӧк сьӧрын вераськись гажамон куноос ваньзы шуымон, кулэ дыръя, соосын пайдаяськизы но кӧня адями отысь аслыз кулэ информация шедьтӥз. Али но со подшивкаосты юаса лыктӥсьёс трос. Мукет район газетъёсты лыдӟеме вань. Нош асьме район газет матынгес, чебергес потэ. Газетэз воштэмды, лыдӟисьёсты кыскемды потэ ке, тӥледлы одӥг ӵектонэ, кенеше вань. Лыдӟисьёс доры асьтэлы мыныны кулэ. Гуртъёсы потаса, интыосын пумиськонъёс ортчытъян - калыклы матын луонлэн самой умой амалэз. Калыкын туж визьмо адямиос вань. Конкурсъёс ортчытъян но лыдӟисьёсты меӵак газет борды кыскоз. Азьпалан но газетмес тунсыко карон понна огъя луыса, жадьытэк ужаны мед кылдоз.

Амина Мухамметзянова - Шубан гурт поселениысь ветеранъёслэн советсылэн председателез: Газетын инты ӧжыт луэмен, селькоръёслэн статьяоссы трос учыре вакчиятӥсько. Таиз валамон. Но вакчиятоно луыку, авторен мед кенешысалзы. Тросаз учыре малпанлэн пуштросыз ыше, авторлэн стилез уг утиськы - соиз жалямон.

Леонид Сапожников - Балтась ёросысь удмуртъёслэн «Кенеш» НКА-зылэн Правлениезлэн тӧроез: Монэ тужгес но сюлэмшугъяськытэ, район газетын удмурт калык сярысь ӧжыт гожъяло шуыса. Нош удмуртъёслэн но быгатӥсь пиоссы но нылъёссы, ужысь азьмынӥсьёссы трос ук. Удмурт калыклэн улон-вылонэныз тодматон понна, журналистъёслы гуртъёсы потаны кулэ. Соку, мынам малпамея, лыдӟисьёслэн лыдзы но трослы будысал. Нош «Азьлане»-ез районын ӧжыт мурт уг басьты. 800-лэсь трос - та котькуд удмурт семьяе газет вуэ шуэм кыл.

Рамазан Фарзиев - районысь инвалидъёслэн обществоенызы кивалтӥсь: Та малпанэн мон но соглаш кариськисько. Асьме районысь удмурт гуртъёсты адӟыса, палэнысь бертэм куноос паймыса кошко ук. Соослэн куинь кылын эркын вераськемзы, асьсэлэсь сям-йылолъёссэс утемзы, куспазы тупаса, эшлыко улэмзы... - малпаськоно ке, темаос туж трос. Созэ гинэ вераме потэ: гуртъёсы потаса, калык сярысь гожтыку, со интыын улӥсь адямиослэсь асьсэлэсь, кивалтӥсьёслэсь но малпанъёссэс тодыны кулэ. Данъяськыны луонтэм адямиос сярысь гожтон газетлэсь данзэ куашкатэ, адямиослэсь вожпотон мылкыдзэ бугыртэ.

В.Закиев: Берло дыре «Азьлане» газетын та ласянь воштӥськонъёс трос луизы шуыса малпасько. «Хезмэт»-ысь гожъямъёсты берыктэм сяна, соос асьсэ материалъёссэс но сёто, калык но гожъяны кутскиз, тае, сяме пыртыса, азинтыны гинэ кулэ.

Нурзада Самигуллин - пичи но быдэ вуымтэ нылпиослэн спортъя школаысьтызы методист: Кинъёслы ке но спорт сярысь материалъёс трос кадь пото, дыр. Озьы ке но созэ вераны кулэ: районын туж трос ӵошатсконъёс ортчытӥсько. Соин улон-вылонмылэн та палыз но газетын югдытэмын луыны кулэ.

Эндже Закирова - дышетон удысысь ветеран: Мынам малпамея, котькуд поколениысь адями газетысь аслыз тунсыко потӥсь материал шедьтыны кулэ. Егитъёс сярысь но, арлыдоос сярысь но гожтэмын мед луоз. «Кузь гумыр - ачиз бадӟым кузьым» шуыса гинэ учконо ӧвӧл, мон сямен. Арлыдоослэн визьнодзы туж трос, соосты кылзыны, соослэсь пример басьтыны быгатыны гинэ кулэ.

Магсум Мухамметзянов - дышетон удысысь ветеран: Редакция аръем планъя ужа-а? Яке та кулэ ӧвӧл-а? Мон малпасько, котькытын, котькуд коллективын азинсконъя программа луыны кулэ. Районысь улон-вылонлэсь аспӧртэмлыкъёссэ пыр-поч одӥг журналист гинэ тодыса быдтыны уг быгаты ук. Та сярысь но вунэтыны кулэ ӧвӧл.

В. Закиев: Зэмзэ но, куддыръя милемлы малпанъёс уг тырмо. Ойдолэ, пӧртэм удысъёсъя, тани, кылсярысь, дышетон удыс сярысь, асьтэлэсь малпанъёстэс-ӵектонъёстэс вералэ. Зэм, али вань материалъёсты газетэ сётыса быдтыны уг луы. Троссэ сайтэ интыяськомы. Иворъёс гинэ ӧвӧл, кылбуръёс, фоторепортажъёс ялан сётӥсько. Темаосты но вошъяса, йылэтыса мынӥськом.

Ф.Шакирова: Электрон вариант ми кадь арлыдо адямиослы котьма ке но матын ӧвӧл ни. Милемлы кие кутыса лыдӟымон газет матынгес, ми солы дышемын. Соин но, дуныз будӥз ке но, тираж уз кулэсмы шуыса малпасько.