Воштӥськонъёс котьма ласянь шӧдӥсько

Бадӟым Лӧзя гуртлэн 1-тӥ люкетаз улӥсьёс понна таиз ар кемалы тодэ кылёз: быдэсмиз калыклэн одӥгез чебер малпанэз – гуртэ асфальт сюрес вӧлдӥзы.

Веранэ та гуртысь Голубев нимо урам сярысь. Табере татын улӥсьёс понна со сюрес шобретэз выльдон гинэ ӧвӧл, со зэмос праздник, кудзэ соос кемалась возьмазы.

Чилясь сюрес

Бадӟым Лӧзя гуртлэн 1-тӥ люкетаз кык урам: Голубев нимо но Новая урам. Котькуд пичи гуртын сямен татын но сюресъёс трос сюлмаськонъёс вайылӥзы: сӥзьыл но тулыс радысь потылӥзы. Югдур умой пала воштӥськиз самообложение амалэн люкам коньдонлы луыса: 2014-тӥ арысен кутскыса, кыказ ик та урамъёсын векчи из вӧлдэмын вал. Макем шумпотӥз соку калык, нӧдысь потӥськом шуыса. Нош табере тани эшшо но бадӟым шумпотон – асфальт сюрес.

Нялтас вераса, та ураме асфальт вӧлдонлы кутскон сётэмын вал 2025-тӥ арын, соку Покчи Лӧзя гуртысь Советской урамез но Бадӟым Лӧзялэн 1-тӥ люкетысьтыз Голубев урамысь сюреслэсь пичи люкетсэ асфальтэн шобыртӥзы.

Выль асфальт шобрет синэз шумпоттэ – сюрес чылкак шунды шорын чиля. Со вылтӥ нылпиослы но, мӧйыослы но гань-гань ветлыны луэ, дэрие нӧдэмлэсь яке гопъёсы канжаськемлэсь кышкатэк.

– Асфальтэн ураммылэн тусыз ик воштӥськиз, со туж чебер, чылкыт адске, сюрес чиля ик, – мылкыдъёссэс шараяло лӧзяос.

Адямиос верало, асфальт кылдэмен валче азьланезлы оскон но кылдӥз шуыса.

– Кин тодэ, дыр ортчемъя, оло, гуртмы пыр автобус но лэзёзы, – чебер малпанъёссэс верало куд-ог гуртоос.

Тау соослы, кин улонэз умойгес кариз

Бадӟым Лӧзя гуртлэн 1-тӥ люкетаз депутатъёслэн но вань улӥсьёслэн нимынызы сюлмысь таукарон кылъёс чузъясько ваньмызлы, кин та бадӟым уже пыриськемын.

– Нимаз таукарон – ёрос кивалтэтлы урамез тупатъян программае пыртэмзы понна. Та решение меӵак шӧдӥськиз адямиослэн улонзылэн ӟечлыкез вылын, сое каньылгес но кышкыттэмгес кариз.

Нимысьтыз таукарон кылъёс – «МДСУ-1»-лэн коллективезлы. Гуртын улӥсьёс сюрес лэсьтӥсьёслэсь профессионализмзэс сяна, адями ӟечлыкъёссэс но пусъё, — калыклэсь таукарон мылкыдъёссэ вуттыса вера Покчи Лӧзя гурт поселениысь депутат Иван Кузьмин.

Синмаськымон выж

«МДСУ-1» обществолы луыса улонэ пыӵам та одӥг гинэ объект ӧвӧл. Нимаз ик синмаськытэ но паймытэ Покчи Лӧзя гуртэз но «Романтик» нылпи лагерез герӟась выж.

– Сыӵе бадӟым выж! – пусъе Покчи Лӧзя гурт поселенилэн кивалтӥсез Лариса Михайлова. – Со бордаз кыскись интылы пӧрмиз ни. Милям табере отын быдэс экскурсиос ортчо – кузэн-кузэн, нылпиосынызы ӵош отӥ ветло, кӧня семинаръёс али радъясько лагерьын!
Солэн кылъёсызъя, котырысь вань сюресъёс – «МДСУ-1»-лэн тыршемез. Уж ӝикыт но ӟеч быдэстэмын: озьы, кызьы кулэ.

Лариса Михайлова пусъемъя, воштӥськонъёс котьма ласянь шӧдӥсько:

– Улон выль кужымен пӧзьыны но яркыт буёлъёсын шудыны кутскиз. Талы луыса Покчи Лӧзя гурт поселениын но улон улӟиз, соин ӵош «Романтик» гужем тазалыкез кыдатонъя нылпи лагерьлэн территориез но.

«Романтик» но выль сюрес

«Романтик» лагере пырон сюресэз рос-прос тупатъян – выльдӥськонлэн историяз эшшо одӥгез бадӟым бам. Покчи Лӧзя гуртын интыяськем лагерь умой сюрес сяна, выль инфраструктура но басьтӥз. Татын бадӟым выльдӥськон ортчиз. Лагерь пала выль сюрес та воштӥськонлэн йылпумъянэз луиз. Табере «Романтике» капчиен вуыны луэ арлэн котькыӵе вакытаз.

Оскон кылдэ: лэсьтэм уж – со кутсконэз гинэ ай. Голубев урамысь асфальт, выж, лагерь пала сюрес – ваньмыз со азьланяз азинскыны, поселениысь мукет гуртъёсын но улон условиосты умоятыны оскон сётэ.

Калыклэн но Покчи Лӧзя гурт поселенилэн кивалтӥсезлэн куронзы: автомобилен ветлӥсьёс, асфальт сюреслы шумпотыса, гурт сюрестӥ бадӟым ӝоглыкен «лобаса» медаз ветлэ вал.