Ву огазея пӧртэм калыкъёслэсь сюлэмъёссэс

Ву огазея пӧртэм калыкъёслэсь сюлэмъёссэс

Арлы быдэ Йӧвылэпотон дыръя Россиын сюрсъёсын адямиос шуръёслэн но тыослэн кезьыт вуосазы зымылон понна люкмесъёс, ошмесъёс дуре мыно. Та калык сям, кудӥз герӟаськемын православной праздникен, асьме шаерамы пумен калык огазеяськонлэн тодметэз луэ кадь ини. 

Люкмесэ зымылон сям вуиз асьме вашкалаосмылэсь, кудъёсыз вулы йыбыртъяло вал кужымлэн но тазалыклэн инъетэз шуыса. Кезьыт вуын пыласькон лулэз но мугорез чылкытатон, висёнъёслэсь бурмон но кужым сётӥсь амалэн лыдъяськем. 

Пӧртэм источникъёс верало, асьме шаерамы XVII-XVIII дауръёсы ини пыласьконъёс паськыт вӧлмо шуыса. Эксэй Россиын сыӵе зымылонъёс шоры осконтэм учкиллям, нош нылпиосты пылатэмзы понна воксё тюрьмае но пуктыны быгатӥллям вылэм. Совето Союз вакытэ но тросэн пыласьконъёс ӧй вал. Берло дасо аръёсы гинэ та практика калык пӧлы вӧлмиз, табере со трос мылкыд карисьёсты люка. Адямиослэн та нуналэ вуэ пырон понна мугъёссы пӧртэмесь. Одӥгъёсыз сям-йылоллы дурбасьтыны туртто, мукетъёсыз асьсэлэсь юнлыксэс эскеро, куинетӥосыз та ласянь кыӵе ке аспӧртэм дэлет, лулпуш каньыллык утчало. Пумисько пыласькыса сьӧлыкъёссылэсь куштӥськыны малпасьёс но. Но одӥгзэ пусйыны кулэ: туннэ та сям выль пуштрос но кулэлык басьтӥз, трос калыклэсь саклыксэ кыскись ужрад луиз.

Тунсыко:

Таӵе югдурез, куке черк традициос но сямъёс капчиен пыӵало калык йылолъёсы, адӟыны луэ ваньмаз сямен культураосын. Кезьыт вуэ пырон сям быдэс дуннеын пумиське. Япониын, кылсярысь, вань мисоги — Лулэз чылкытатон понна кезьыт вуын пыласькон. Скандинавиын кезьыт вуын пыласькон сямъёс мунчоен но выльдӥськонэн герӟаськемын. Индиын шуръёсын пыласькон ритуалъёс сакральной пуштросо луо, но соос йӧ кадь кезьыт вуэн герӟаськемын ӧвӧл.

Котькуд ар праздник азьын инмарлы оскисьёс люкмесъёс котыре но ошмесъёс доры люкаськыло. Пӧртэм арлыдо сюрсъёсын адямиос дась асьсэды эскерыны но вуэ зымыны, ӟырт кезьытъёс дыръя но. Покчи Лӧзя гуртысь купельын но 19-тӥ толшоре трос адями вал. Инмар Анайлэн Казанской обросэзлы сӥзем черкын праздник литургия ортчытэмез бере, иерей Георгий Павлов вуэз вӧсяз. Мылкыд карисьёс соку ик, 3 пол кирос карыса, «Атайлэн, Пилэн, Святой Духлэн нимыз понна. Аминь» («Во имя Отца, и Сына, и Святого Духа. Аминь») шуыса, дун-чылкыт вуэ пыризы, ымнырзэс, киоссэс, пыдъёссэс, чыртызэс коттӥзы. Котьку сямен ик сыӵеос пӧлын туэ но Покчи Лӧзя гурт поселенилэн главаез Лариса Михайлова но вал. Йӧвылэпотон дыръя пыласькон сярысь со но аслэсьтыз малпанъёссэ но мылкыдъёссэ вераз.

— Лариса Михайловна, Йӧвылэпотон дыръя пыласькон — ма со тӥ понна?

— Мон понна Йӧвылэпотон дыръя пыласьконэ пыриськон — со калык сям-йылолъёсын герӟаськон, мугорез кыдатыны луонлык но астэ физически но морально эскерон. Но нырысь-валысь кӧня ке нунал ӵоже та ужрадлы дасяськоно али. 

— Нош кызьы тӥ учкиськоды, кезьыт вуын пыласькон иммунитетэз юнматэ шуыса веранлы? 

— Та малпанлы уггес дурбасьтӥськы. Салкым ву сярысь, оло, луэ, дыр озьы вераны, но йӧ кадь кезьыт ву мугорлы кыӵе ке стресс луэ, кудӥз организмез сэзъялтэ, вырӟытэ. 

— Тӥ крещенской пыласьконъёсы азьвыл пыриськылӥды ни-а? 

— 10 ар ӵоже ини пыласькисько, кылем аръёсы куинь нунал ӵоже радысь но пӧрмылӥз пыриськыны. Туж шулдыр ветлӥмы пиеным но солэн эшъёсыныз. Соос сыӵе шаплыесь. Сьӧрамы пӧсь чай, ческыт сиёнъёс басьтӥмы. Тӥни озьы праздник но удалтӥз. 

— Кезьыт вуэ нырысьсэ пыремды бере кыӵе мылкыдъёсты вал? 

— Шумпотон, капчи мылкыд, пыд ӵогъян. Нош собере быдэс мугорын шуныт луэ. Йӧвылэпотон дыръя пыласьконлэн эмъясь кужымезлы но мон оскисько. Пыласькем бере лул-сюлэм каньыл луэмез шӧдӥсько. 

— Кызьы семьяды пусъе Йӧвылэпотон праздникез? 

— Котьку сямен быдэс семьяен пыласькыны ветлӥськом. Туэ мукет сямен пӧрмиз. Пие Казаньысь Вылын Кабан тыын радъям люкмесын пыласькиз, нылы школа бере, нош мон уйшор бере, вуэз вӧсямзы бере ик. Тунсыко: купеле таяз радэ Арчаысь бигер выжыысь куноос но пыризы. Ми дорозь воргоронъёс вал: ӟучъёс, бигеръёс но удмуртъёс. Мусульман бускельёсы но пырало, озьы ик дун-чылкыт вуэз но юо. 

Зэмзэ но, тунсыко, но Йӧвылэпотон дыръя люкмесъёсын пыласькон сям туннэ православной осконэн улӥсьёс пӧлын гинэ вӧлмемын ӧвӧл, мыло-кыдо та сямез асьсэлы пыӵато мукет конфессиосысь адямиос но. Тросэзлы та праздник огъя лулчеберет мерасэн, историен герӟаськемзэс шӧдыны, ас калыксылэсь но мукет калыкъёслэсь сям-йылолъёссэс гажамзэс возьматыны луонлык кылдытэ.

Покчи Лӧзя гурт поселениын но пӧртэм калык выжыысь адямиос — удмуртъёс, ӟучъёс, бигеръёс, поръёс, армянъёс — куспазы тупаса уло, ог-огзылэсь праздникъёссэс, калык сямъёссэс гажало. Покчи Лӧзя гуртын улӥсь Гульнара Хайруллина но ӵапак сыӵеос пӧлысь луэ.

— Йӧвылэпотон нуналэ пыласьконэз трос аръёс ӵоже уг кельтӥськы ни. Ёросын одӥг гинэ шуымон пыласькон интыен гуртын улыны но пыласькыны мынытэк кыльыны, мон сямен, шонер ӧвӧл, уката ик умой эшеныд ӵош мыныса, со традиция ини. Гуртамы та трос йӧслыко ритуал луиз ни, вулэн эмъян свойствоосыз та нуналэ адямиосты уг люко, ваньмы огкадесь. Мылкыдъёсты кылын вераны уг луы: капчи, адреналин, сайкыт, сэзь, но, паймоно кадь, шуныт! 30 градус кезьытэн но пыласькылӥ, вож нунылэн анаез луыса но. Вуэ пырыкум тодӥсько вал: кынмыны уг шедьы, со интые дун-чылкыт вулэн эмъясь кужыменыз мугорме юнмато. Эшеным та нуналэз возьмаськом, туспуктэмъёс лэсьтӥськом но видеое уськытӥськом. Котьку пыласькон пӧртэм мылкыдъёсты кузьма, но соос котьку умоесь! — мылкыдъёссэ вера Гульнара Ильдаровна.

Бен, тросэз пыласькисьёс тол пыласьконъёслэсь адямилэн тазалыкезлы ӟечлыко луэмзэс пусъё, асьсэды но инкуазь условиосты вормон мылкыдэз но шумпотонэз шӧдо. Озьы ке но тодын возёно: кезьыт вуэ зымылон одно ик нимысьтыз дасяськемез но чакласькемез кулэ каре. Ялан кыдатон иммунитетэз юнматэ, вирзӥбетэз умоятэ но мугорлэсь паласькись висёнъёслы пумитъяськонзэ юнматэ ке но, эмчиос чакласькыны дэмлало, уката ик арлыдоослы но сюлэм но вирсэр сӧзнэтлэн хронической висёнъёсыныз курадӟисьёслы. Нырысь ик, толалтэ уяны кутскон азьын эмчиен кенешоно, улӥ температуралы пумен дышоно но пыласькем бере кынмонлэсь утиськоно.

Озьыен, Йӧвылэпотон туннэ нуналэ — со осконэз но калык сямъёсты огазеясь праздник, кудӥз юрттэ лулпуш дунлыкъёсты юнматыны, таза улон сямез азинтыны но пӧртэм выжыысь но конфессиосысь адямиос пӧлын тупаса улон но ог-огедлы юрттон мылкыд кылдытыны.