Вуж Кушкет — Геройлэн гуртэз

Вуж Кушкет гуртысь 208 воргорон Быдӟым Отечественной ожын шаермылэн эрикез понна нюръяськем. 120-ез соос пӧлысь ожлудын бырыса кылем.

Туннэ нуналэ Вуж Кушкет гуртын 50 хозяйство вань, кудаз 150 мурт улэ. Тросэз улӥсьёс «Яна тормыш» обществоын ужало, ас хозяйствоосазы уноен пудо вордо.

Вуж Кушкет — Россиысь Геройлэн Олег Исаевлэн вордскем гуртэз. Озьы ик ёросамы удмурт кылын потӥсь «Азьлане» газетэз кылдытӥсь но солэн нырысетӥ редакторез луэм Николай Чакмин но, Удмурт Республикаысь искусствоосъя Сӥё-дано ужась Пётр Данилов но гуртлэн данъяськонэз луо.

Ужез яратӥсь калык

— Улонмы умой, колхозын ужась муртлы коньдонзэ, государство арлыдоослы пенсиез дыраз сётэ, — шуо гуртысь апайёс. Гуртысь парсь вордон комплекс уноезлы ужан инты сётэ. Ужез яратӥсь муртлы уж вань, шуо татын тыршисьёс. Со дыре ик, валтӥсь ужзы сяна, пудо но уно вордо кушкетъёс. Гуртын таза сюро пудолэн лыдыз 141 йыр луэ, соос пӧлын сизьымдонлэсь трос скалзы. Пудо вордыса солэсь ватсэт коньдон поттӥсьёс йӧллы дунъёс медаз усе, вылӥ мед луозы но секыт уж кулэезъя мед дунъяськоз шуыса гинэ мылкыд каро.

Школа ке быриз, гурт быроз шуыса вераны яратӥськом. Нош Вуж Кушкетысь школалэн вуоноез вань-а, вордӥськем пиналъёслэн лыдзы кыӵегес? Гуртын школае ветлон аресэн 19 нылпизы вань. 11 дышетскись Шор Кушкетысь школае ветлэ, 8-эз Вуж Кушкетын тодон-валан басьтэ. Туннэ нуналэ дошкольной аресэн 8 нылпизы вань. Соос Янгулысь нылпи садэ ветло вылэм.

Гуртысь уноез социальной объектъёс вужесь, пӧлазы выжтыса пуктэмъёсыз но вань. Но отын, вордскем гуртысьтызы калыксы понна тыршыса, саесъёссэс пужалляса ужасьёсты адӟыны синмаськымон.

Чебер, ӟеч хозяйствоос но уно татын. Гуртлэн данъяськонэз луись синмаськымон семьяос но вань. Нош валтӥсез, Вуж Кушкетын тыршись, эшлыко калык улэ. Нош сыӵеос улонысь шуг-секытъёслэсь уг кышкало, котьку ас сюрессэс шедьто но ас малпанзэс мукет муртъёслы вуттыны быгато.

Батыр пиез будэтэм Исаевъёс

Вуж Кушкет котькуд лыктэм муртлэн тодаз уськытэ, Россиысь Геройлэн гуртэз луэ шуыса. Гуртэ пыронын ик татын Олег Исаев вордскиз но будӥз шуыса ивортӥсь пул интыямын. Ас улонзэ сётыса возьматэм батырлыкез анай-атаезлэн сюлэмъёсазы али но вирӟектӥсь яра луыса шӧдӥське. Вера Петровна но Николай Степанович Исаевъёсын тодматскеме дырысен дасо мында ар ортчиз ини. Соос доры ку гинэ ӧд лыкты, сайкыт ымнырын пумитало, гажаса куно каременызы сюлме йӧто. 2015 арысен Казаньысь Ратушаын Атаймузъемлэн Геройёсызлэн нуналзылы сӥзем сӥё-дано ужрад ортче, отчы Олег Исаевлэн анай-атаез арлы быдэ пырисько, Рустам Минниханов Президентэнымы но пумиськыло.

Вера но Николай Исаевъёслэн семьяязы вить нылпизы вордске. Олег Николаевич кыкетӥез луэ, 1964-тӥ арын вордске. 8 классэз йылпумъямез бере Арчаысь педагогикая колледже дышетскыны пыре, отын покчи классъёсты дышетӥсьлэсь дипломзэ басьтэ. Ужан сюрессэ Саба районысь Иштуган гуртын кутске, отын кык толэзь гинэ ужа но Атаймузъем азьын ужпумзэ быдэстыны Чита городэ басьтэмын луэ. Служить карыкуз со лётчик луыны малпа. Малпанзэ улонэ пыӵатон понна дышетске но военной самолётлэн штурвалэз сьӧры пуксе. 1996 арын 5 мае нуназе 11 часэн быръем ӧнерез солэсь улонзэ куспетӥ каре. Чечняысь Урус-Мартан районын жугиськон дыръя со батырлыко бырыны шеде. Вера Петровна но, Николай Степанович но та иворез туж секытэн чидало, али но соос пизэс синвуаськыса тодазы ваё. Та кышкыт кайгу бере Николай Степанович кык пол одӥг кадь вӧт адӟем, солдат дӥсен коросын кыллись пиез султэ но: «Ялан эн бӧрды, атай», — шуэ. «Со вӧтъёс бере буйгатскыны кулэ шуыса малпай», — вера Николай Степанович. Али Вера апай но Николай агай укмыстон арессэс люкало ини, соос шуо: «Пимы ас улонзэ Атаймузъем понна, егитъёсты Атаймузъемез утьыны дышетон понна ӧз жаля. Соин но адямиос тае валаны мед быгатысалзы».

Олег Исаевез пыраклы тодэ кельтон понна солэн нимыз Шор Кушкет школалы сётэмын вал, нош Балтасьысь Атаймузъемез утисьёслэн парказы Олег Николаевичлы сӥзем стела пуктэмын.

Кырӟаса но эктыса уло

2017 арын Вуж Кушкет гуртын выль клубзы ужаны кутскиз. Пичи гуртын 500 интыен лулчеберет «ошмеслэн» ужаны кутскемез но 2019 арын Вуж Кушкетысь гурт клублэн республикаын «Тужгес умоез гурт клуб но Лулчеберет юрт» конкурсын вормись луыса пусйиськемез но таин валче 500 сюрс манетъем грант басьтэмзы гуртысь калык кырӟаны но эктыны усто шуыса возьматэ. 1991 арысен кутскыса клублэн кивалтӥсез луыса ужась Светлана Щербакова гурт калыклы гажамзэ но тау каронзэ вуттэ: «Гурт калыктэк мон нокин ӧвӧл. Ӵошен луыса гинэ вань праздникъёс туж шулдыр но пуштросо ортчо». Ар ӵоже ортчылӥсь огшоры праздникъёс сяна, 2015 арысен Гуртлэсь нуналзэ пусйыны кутскиллям. «Арысь аре шулдыргес Йӧвылэсултон праздникез пусйиськом. Туэ, кылсярысь, клуб сьӧры гурезь лэсьтӥмы, отын шумпотыса нискыласа, табань пыжыса, пӧсь чаен кунояськимы», — шуэ куке но кемалась татчы кен луыса вуэм, нош туннэ нуналэ ини ас адямизы луэм Светлана Петровна. Лулчеберет сяна, со гуртысь котькуд удыс понна сюлмаськыса улэ. Кылсярысь, самообложение программалэсь ужаны кутскемзэ туж пайдаёен лыдъя. Тужгес но соин гуртысь сюресъёсты лэсьтэмлы шумпотэ. Малы ке шуоно та гуртын но сюресъёссы туж начар югдуре вуиллям вылэм ини. Туэ но та ӧрын ужъёс азьланьтӥськозы али Вуж Кушкетын. Озьы ик Гагарин но Центральной урамъёсысь выж тупатӥськоз.

Света апаез гуртын магазинлэн быремез гинэ сюлмаськытэ. Машиназы луэм адямиос бускель гуртъёсы мыныса нуналмысь кулэ луись арбериосты басьтыны ке быгато, техникатэм муртъёслы арняяз кык пол лыктӥсь райпо машинаез витёно луо вылэм… Тӥни озьы эктыса но кырӟаса, шуг-секытъёсты сэрттон-пертчон амал шедьтыны тыршыса улэ гурт калык.

Гульзида Газизуллина,

Залия Файзрахманова