Выльысь ӧсъёссэ усьтӥз

Куинь ар борӟаськыса улэмез бере Сизнер гуртын клуб выльысь аслэсьтыз ӧсъёссэ усьтӥз но интыысь калык понна ужаны кутскиз. Шумпотымон, нырысетӥ ужрадъёс но ортчизы ини. 

— Ужаны интыяськи 2025-тӥ арысен Татарстанын «Земский работник культуры» шуыса нимаськем программая. Программа сӥземын лулчеберет удысысь ӧнерчиослы, кудъёсыз 50 сюрслэсь ӧжыт улӥсен гурт интые яке пичи карын ужаны малпало, — шуэ Сизнер клублэн выль кивалтӥсез, Дурга гуртысь Татьяна Ахмадиева. – Уж борды басьтӥськемлэсь азьло интыысь кивалтӥсьёс, азьветлӥсьёс гурт калыкен тодматскон ужрад радъязы. Калык шумпотыса, шуныт пумитаз, шӧдске вал, адямиос лулчеберет ужрадъёслэсь мӧзмиллям ни шуыса. Эшшо но матынгес тодматскон понна эктон ӝыт радъямы. Отчы вань мылкыд карисьёс пыриськизы — покчиез но, бадӟымез но. Собере, озьы ик вань мылкыд карисьёсын люкаськыса, «Сӥзьыл пуконъёс» ортчытӥмы: чай юимы, шудӥмы, кырӟамы но эктӥмы. Тани табере нылпиос понна шулдыръяськон — «Сӥзьыл бал». Шумпотымон, нылпиос трос люкаськизы. Тау анай-атайёссылы, песянай-песятайёссылы, огъя гурт калыклы: соослэн коньдонэн юрттэменызы ческыт сиёнъёсын ӝӧк дасяны но, нылпиосты шулдыртыны быгатӥсь аниматоръёсты ӧтьыны но быгатӥмы. 

6 шуркынмонэ гуртысь клуб, зэмзэ но, гурлаз: нылпиос мылысь-кыдысь шулдыръяськизы, аниматоръёсын дасям тунсыко вожвылъяськонъёсы пыриськизы, шулдыр крезьгур соос понна шудӥз. 

Нылпиоссэс, внукъёссэс келяса клубе лыктэм анайёслэн, песянайёслэн но мылкыдзы ӝутскемын вал.

— Клубмы лэсьтэмез дырысен, 1988-тӥ арысен, 2022-тӥ арозь умой гинэ ужаз. Собере куинь ар борӟаськыса улӥз. Тэк сылэ шуыса, туж сюлмаськиськом вал. Вӧзтӥз ортчыны ик мӧзмыт потылӥз. Гурласа ужан дырзэ тодэ вайыса, сюлэм ик вӧсь луэ. Праздникъёслы сӥзем концертъёс, выль ар маскарад, Удмуртиысь артистъёслэн концертъёссы, спектакльёс луыло вал. Оскеммы потэ, табере ми дорын но лулчеберет улон улӟоз шуыса, — мылкыдъёссэс усьто сизнеръёс.

Азьпалан Анайлэн нуналэз. Та чебер праздникез но Сизнер гурт калык, огазе люкаськыны, клубе потыны, шулдыр мылкыд басьтыны муг луоз шуыса, вите. Гурт калыклэн осконъёсыз мед зэмалозы вал. Юнме шорысь уг верало, дыр, клуб лулчеберетлэн кутскон интыез («очаг культуры») шуыса. Медаз кысы вал со «учогын» тылскем, выль кужым басьтыса, ялан мед ӝуасал.

P. S.: 6-тӥ шуркынмонэ ик Сизнер клубын Карек-Серма гуртысь выжись библиотека нылпиос понна Калык огазеяськон нуналлы сӥзем викторина но ортчытӥз. Отчы но пиналъёс туж мыло-кыдо пыриськизы.