Зарни пыры уз ышы (+фото)

Шошма удмуртъёслэсь ортчем дауръёссэс эскерон ужъёсы вуттӥзы монэ Ципья шоръёзо школалэн история кабинетаз. Отысен мон тодматскыны быгатӥ Евгения Плотниковалэн ас киыныз гожтэм биографиеныз. 
Дано кышномурт улонысь кошкиз 2007-тӥ арын, 68 аресэн. Вераса быдтонтэм, кӧня этнографической материал люкамын Евгения Ивановналэн тыршеменыз, ваньмыз соос пыремын Удмурт радиолэн зарни фондаз. Евгения Плотникова ас дырзэ азьпалтыса улэм нылкышно, солэн ужез улэ но вамышъя азьлане. Бадӟым тау солы. Евгения Ивановнаез буре вайыса но вордӥськем дырысеныз 80 ар тырмемлы сӥзьыса, озьы ик «Азьлане» газетлэн 85 аръем юбилееныз валче ӵектӥсько солэсь со гожтэмзэ. 
«Мон, Плотникова Евгения Ивановна, вордски 1939-тӥ арын 20-тӥ мае Бигер Элькунысь (Татарстанысь) Сырья гуртын. Анае-атае колхозникъёс вал. Атае, Плотников Иван Фёдорович (вордскемын 1910-тӥ арын), ожын быриз. Ми, ньыль нылъёс, атайтэк будӥмы. Мон, Надя но Катя сое чик ум тодӥське. Дядяй шуонэз но ӧм валалэ. Анае, Плотникова Матрёна Григорьевна (вордскемын 1908 арын), мон тодэмъя, ялан фермаын ужаз: скалъёсты, валъёсты, ошъёсты сюдӥз. Отчы вань тазалыксэ понӥз. Пыдаз кутчаны сапегез ӧй вал, кӧкы быдӟа кутэн ветлылӥз. Кезьытын ужаса, огвадес киыз-пыдыз чутырмиз. Озьы улыса, 50 арес тырмон араз, 1958 арын улонысь кошкиз. Со вакытэ висисько, уг быгатӥськы шуыса ӝожтӥськемез санэ басьтӥсь ӧй вал. Кышкатон кылзы одӥг — фермаысь пудо кулӥз ке, вылад куштомы. Мискинь кышно мынэ ини, пыдзэ нюштыр кыскаса ке но. Сыӵе кӧшкемыт, секыт улон вал жугиськон бере аръёсы но. Мынам аслам но общество понна бушын ужанэ соку ик кутскиз. Фермаын дежурство дыръяз монэ анае, пичи ке но, луло адями шуыса, сьӧраз кӧланы нуллылӥз. Валесмы - гур вӧзы босток карыса тырем куро. Анае, керосин фонарь кутыса, уй куспын олокӧня пол пудоосты чакланы-эскерыны поталля. «Адӟонэд гинэ медаз луы: марысь мар ке, тюрьмае пуктозы, скал пудодэ басьтозы». Мон куро пӧлы месӥськисько но, кӧшкемаменым, шоканы дӥсьтытэк кыллисько, анаелэсь пыремзэ возьмаса. Ӵукна султыса, улын корказ бадӟым пуртыын макня сураны ву пӧсятӥськом. Пу ӧвӧл, куроен тылсконо. Мон, гур азе пуксьыса, корка пушкы пыртэм куроез, ӝикытак бинялляса, гуре донгасько. Анае ферма азбарысь чилит йӧэн син сузёнтэм шур голбечись вуэз ведраен пыртылыса ӵажлась пуртые киська. Огпол куроез мултэс уно донгаськем, шӧдске. Ӵын кошкон гумыез пытсаськыса, кужмо гыбдам куро тыл гур ыметӥ гомак тэтчыса потӥз но пырак ымнырам басьтӥськиз. Синкаӵъёсы но кӧня ке йырсие сутскизы, ымдуръёсы но тордыса улӥзы. Ярам ай корка пыртылэм куро кенжыны ӧз вуы. Та учыр мон понна вунонтэм кылиз. 
... Одӥг ӵукна Уди нюк дортӥ ужмес быдтыса бертӥськом. Куазь сокем кезьыт — векчиесь саес пумъёстӥ пырыса, суй посэз чепылля. Таӵе дыръя ма меда луэ кортэн? — йырам сыӵе юан чилектӥз. Кема малпаськытэк, капка пуннет бордысь кортэз кылме йӧттыса эскерыны чаклай. Кын корт монэ лап! гинэ бордаз кыскиз. Нокызьы мозмытскеме уг луы. Капка бордын бекыртӥськыса сылӥсько. Собере лэзьки, ӝыны кылы отчы кылиз кадь потӥз. Ну бен висиз ук бӧрысь. 
... Гужемзэ кыед поттыны юрттӥськисько. Кужым нош чик ӧвӧл. Кыед поттылон пичи уробоез ке но кутыса сылӥсько. Огпол тазьы выронъям, пичи гинэ Ион ошлэн сюр йылаз ӧй шедьы. Вожомем синмо сьӧд ош монэ, пичи макеез, проходэтӥ уйыса нуллӥз. Мон бызи-бызи но, мар карыны ёрмеменым, куро тырон бӧлеме шуак кожи. Со куспын бӧрсям туж юн кеськем кылӥськиз. Анаелы кыед поттыны юрттӥськыны шуыса лыктэм Марья ӵужкенаке (Сьӧд Марья) ошлэсь мон сьӧры уйиськемзэ синйылтэм но, саниксэ урдыса бызьыса вуэм. Со ӧй адӟысал ке, Ион ош монэ куро пушкы ӟеч нелькысал, дыр. Нош

малы меда Ион ош? Жугиськон бырем бере но кема гинэ колхозникъёслэсь вордскем кунянъёссэс колхозэ басьтылӥзы. Соосты вандыны но, вузаны но лэземын ӧй вал. Тӥни со мон сьӧры уйиськись ош Ион Семонлэн луэм. 
... Улыса-вылыса, кезьытын ужаса, анаелэн одӥг гужем кизэ-пыдзэ выртэмез ӧз луы ини. Кор кадь кыллиз. Кин ке но вераз, сыӵе висисьёсты ӟырдам кыедын пукытоно шуыса. Соку ферма котыръёсын кабан ӝуждаесь кыедъёс сюриськыса парланыса кыллё вал. Мон анайме отчы кык пол пичи уробое пуктыса нулдӥ. Ӟырдам кыедэ гудӥськыса гоп лэсьтӥськом но гуре кадь пуктӥськом. Собере, зэмзэ но, киыз-пыдыз лэзькыны ӧдъяз. Пайдаез вал ик, лэся, сыӵе эмъяськонлэн. 
... Школае мынӥ 1946-тӥ арын. Ньыль ар ӵоже Екатерина Тимофеевна Сапожникова киын дышетски. Собере 1956-тӥ арын Ципьяысь шоръёзо удмурт школаез йылпумъяй. Со аръёсы директор луыса кема ужаз Удмурт шаерысь Глаз ёросысь лыктэм удмурт пи Леонид Васильевич Бабинцев. Сое гажало вал удмурт калыкын. История предметсэ туж тунсыко нуылӥз. 
...Ми, удмурт пиналъёс, туж урод тодӥм ӟуч кылэз. Бигерзэ нош чик ӧм тодэ. Окружение ӧй вал. Соин сэрен школаез йылпумъяса улонэ выжем бере, трос шуг-секытъёс кылдылӥзы. Но вал милям ас яратоно кылмы — удмурт кыл но литература, яратоно дышетӥсьмы Мария Петровна Барышникова. Мыным со туж чебер потэ вал. Ымныраз котьку пальпотон. Лякыт, визьмо, ӟеч сямо дышетӥсь но удмуртлыкез гажан мылкыд пыӵатылӥз удмурт литература пыр. 
... 10-тӥ классэз йылпумъяме бере, мон колхозын ужаны кутски. Гуртысь кошкыны уг лэзё, паспорт сётытэк ёрто. Котькуд егит мурт гуртысь кызьы ке но мозмытскон-пегӟон мылкыдын улӥз. Нош быжыз пачкатэмын. Озьы ик вал монэн но. Целинае кошкыны мылкыды вал — ӧз лэзе. Огпол итымысь кутсаськыса бертӥ. Дорамы Ципьяысь куно вань — Сырья гуртын будэм пи, егит дыръяз «Азьлане» газетын ужам маке, фронтовик Иван Петрович Петров. Со шуэ, «Азьлане» газетын декретной отпуске кошкись мурт интыын ужаны адями утчало. Отчы, пе, удмурт кылэз ӟеч тодӥсь адями кулэ. Мария Петровна тонэ, пе, ӵектэ. Тӥни озьы мынам яратоно дышетӥсе удмурт кыл пыр вань улонэлы сиёно няньме сётӥз. Бӧрысь ини мынам вань улонэ удмурт кылын, удмуртлыкез азинтонэн герӟаськыса мынӥз. Газетэз соку арняяз огпол гинэ редактор но секретарь потто вал. Мон луи секретарь. Тодымтэ-валамтэ уж капчи ӧй вал. Уйёссэ газет поттӥськом. Доре бертон но уг йӧтылы куддыр — кык иськеме. Гожъяськон быгатонлыке ӧвӧл на. Тужгес но секыт луиз бигер кылэз тодымтэен. Мон сое ас поннам дышетыса, ӝыны ар куспын вераськыны но, лыдӟиськыны но кутски. Татарстанын бигер кылэз тодытэк вамыш лэсьтыны уг луы. Бигер кылысь берыктыны но кутски. Котькыӵе секыт ке но, мынам мылкыды шумпотонэн тырмылӥз. Угось ӵош дышетскем эшъёсме кузь сюрес вылэ — Шемордан станцие - 10-15 валэн келяло удобрениос, кидысъёс вайыны, пу нуллыны. Нош мон шуныт коркан пукыса ужасько, коньдон басьтӥсько пичи ке но. Зэм, гуртъёсы корреспондент луыса потылонъёс капчи ӧй вал. Пыдын ветлӥськиз. Валэн но поталляме вань. Али со сярысь малпано ке — тумошо кадь. Угось табере машинаен гинэ ветлыло. Газет поттон удыс пумен паськытаз. Мыным но отын пыраклы уж шедиз. Кин но ӧй вал мон отын ужатозям: буква бичась, газет бам лэсьтӥсь (верстальщик), корректор, секретарь, литсотрудник. Ӝоген Ципья районэз Балтасен огазеязы. Ми отчы быдэс коллективен кошкимы. Кӧня ке гинэ отын ужаса вуимы — районэз нош ик Арске нуизы. Ми, егитъёс, ӧм кыле, выль интые кошкимы. Озьыен, ялан район сьӧры ветлыса улӥмы. 1963-тӥ арын мон Ижевске пединститутэ дышетскыны пыри. Кемалась малпанэ быдэсмиз. Филологической факультетлэн удмурт ёзэтаз туж мыло-кыдо дышетски. Яратоно дышетӥсьёслэсь, Таракановлэсь, Яшин кузпалъёслэсь, каникул дыръя но мӧзмыса лыктоно вал. 
1967-тӥ арын сое йылпумъяй. Монэ Можга районысь Юбери гуртэ удмурт кыллы но литературалы дышетӥсе ыстӥзы. Собере ужай Бигер Элькунысь Средний Кушкет школаын. Нош ик Удмуртие вуи но ужай Якшур-Бодья районысь Большие Ошворцы (удмурт нимыз Ӵошкыт) гуртысь шор ёзо школаын. Отысен Ижкаре кошки но Удмурт радиое переводчица луыса ужаны пыри. Мон удмурт кылэ берыктыса дасясько вал «Темтайп лентаысь иворъёс», «Дуннеысь странаосты»

(бӧрысь со луиз «Кунъёс, адямиос, сямъёс») передачаосты, собере нуыны кутски удмурт сямъёслы но йылолъёслы сӥзем «Тангыра» передачаез но, оже ветлэмъёс, ужын данэ потэм адямиос, мӧйыос сярысь очеркъёс лэсьтылӥ. Радиоверанъёсам пӧртэм палась удмуртъёслэн сямъёссы сярысь вералляй. Соосты ыстылӥ Йошкар-Олае, Казане. Мукет элькунъёсын улӥсь удмуртъёс сярысь нырысьсэ тодматыны кутскемен, дыр, мон малпасько, радио кылзӥсьёс «Тангырае» ӝог вазиськизы. Мон трос гожтэтъёс басьяй. Пумиськонъёсы ӧтчаллязы, куно карылӥзы. Ушъяськыса уг вераськы, мынам нимы Удмурт шаерын туж тодмо луиз. Пенсие кошкем берам но, кытчы пыриз, малы уг вераськы со Плотниковады шуыса юаллясько, шуо гуртъёсы потась корреспондентъёс. Удмурт калык понна лэсьтэм уже мынам сыӵе — мон нырысьсэ тодматыны ӧдъяй асьме палась калыклэн сямъёсыныз-йылолъёсыныз. Мукет элькунъёслы но соосты лэзьыса, мон ужай, гонорар басьтылытэк. Мыным та уже туж тунсыко вал. Нош огпол сыӵе учыр луиз: Кутешысь Самаева Лиза апай Казаньысь радиое гожтэм тау карон гожтэт тазьы: «... Ми туж ӧжыт калык, милемлы ас кылын передача сётыса, тӥ милемыз ӝутӥды, тӥ милемыз адями чотын адӟиды. Ми соосты кылзыса бӧрдӥськом но, эктӥськом но, кырӟаськом но...» Та кылъёс, валамон ини, Казань радиолы туж бадӟым мылкыд сётӥзы. Собере одӥг кышет тыр гонорар но вуиз. Но со коньдонэз почта пыр лэзё ке, со ӝуа-быре. Но нырысь-валысь ай отын, Казаньын, ыстэм передачаослы инты но ӧз шедьтылэ. Телефон пыр ченгешыса но вераськемъёс вал. Ми бигер сямен но радиоверанъёс сётӥськом, нош кытын милям интымы бигер радиоын, шуисько огпалаз. Бӧрысь, таӵе гожтэтъёс бере, Казаньысь радиоын ужасьёс асьсэос курыло вал ини радиоверанъёсты лэзьыны, малы ке шуоно, Лиза апайлэн гожтэтэз со Казань радиолы но вылӥ дунъет луиз. 
... Йылпумъяса вераме потэ, Удмурт радиоын удмуртлыкез азинтон бордын ужамме мон лыдъяй общество, удмурт калык понна лэсьтэм бадӟым ужен, малы ке шуоно мынам ужъёсы уноез фондэ кылемын.... 
Евгения Ивановна Плотникова, Ижкар, 2001 ар, май толэзь». 
(Туспуктэмъёс басьтэмын Сапожников Леонид Дмитриевичлэн коллекциысьтыз но «Радиовещание Удмуртии», 1997 ар, книгаысь). 

Алексей Шмелёв 
Санкт-Петербург