Зэмлык-а, выжыкыл-а?

Таяз учыре туж тунсыко материалэн пумиськоно луи. Татын удмуртъёс сярысь куд-ог фактъёс сётэмын. Вераны уг луы, кызьы но кин пыр гожтэмын та материал, нокыӵе ссылкаос но пуктэмын ӧвӧл, соин тӥледлы но дунъяны, шонертэмзэ ивортыны ӵектӥськом.

1. Революцилэсь азьло удмуртъёс нуналмысь вераськонын зэмос нимъёсынызы ноку вазиськылӥллямтэ. Ним — со оберег шуыса лыдъяллям. Оскиллям, сое ӵем верад ке, адями лябгес луэ шуыса. Тодматскыкузы удмуртъёс одно ик кузьымъёсын вошъяськылӥллям, кыӵе кушемнимъёсын табере ог-огзылы вазиськозы шуыса кенешылӥллям. 

2. Куке но удмуртъёс язычникъёс луиллям но пӧртэм инмаръёслы вӧсяськиллям. Соос пӧйшуръёсты курбон сётӥллям, нош сӥльзылэсь нимысьтыз вӧсь лым но куриськон ӝук пӧзьтӥллям. Нялтас вераса, туннэ нуналэ но удмуртъёс пӧлын язычникъёс пумисько на. 

3. Удмуртъёс ошез курбон сётэмзылэсь азьло одно ик сое ошмес вуэн пазьгиллям. Пудо куалектыны кулэ, пе, вал. Ош ӧз куалекты ке, со урод пусэн лыдъяськылӥз. Инмаръёслэн, пе, та курбонэз кутэмзы уг поты.

4. Удмуртъёс ноку саламтэк куное ветлӥллямтэ. Вылаз ик, кузьымлэн куронъёсыз но луиллям: со, пе, туж бадӟым но, туж пичи но медам луы. Ӵемысь удмуртъёс ог-огзылы вандэм ӟазег кузьмало вылэм.

5. Удмуртъёслэн трос осконъёссы ӧс кусыпен герӟаськемын. Быдэс коркалэн лулэз отын улэ шуыса оско вал соос. Соин ик ӧс выжые лёгиськыны, со вылын пукыны уг яра вал. Алонэз тӥяд ке, со быгатэ вал анай-атайёслэн кулоназы, кус висёнэ вуттыны, сюанчиосты кышкатыны.

6. Семьялэн йырыз котьку нылкышно луэм. Нылкышноос юртъерысь вань ужъёсты быдэсъяллям, нылпиосты вордӥллям но пудо-животъёсты утиллям. Но валъёсын котьку пиосмуртъёс гинэ выриллям. 

7. Праздникъёсы нылкышноос чингылиен нимысьтыз пыдкутчан кутчаллям. Солэн жингрытэмез сьӧд кужымъёслэсь уте шуыса лыдъяськем. 

8. Удмурт сюан эмеспитэк но солэн анай-атаезтэк ортчем. Выль кен доры мукет ӵыжы-выжыосыз мынӥллям, отын вань йылолъёсты ортчытӥллям но кенэз эмеспилэн корказ вайиллям. 

9. Эмеспилэн корказ выль кенэз, шунды бергамъя, вал котыртӥ куинь пол котыръяллям. 

10. Сюан бере ӵуказеяз сюан юон луыны кулэ вал, но семьялы сое ӝыны арлы кельтыны лэзизы, луонлыксы соку ик ортчытыны ӧз лэзьы ке.

11. Сюан азьын нылмурт аслыз шорт дэрем вуриз. Сюан бере соин куинь нунал ӵоже ветлӥз, та дыр куспын со скалъёсты келяны но мукет пӧртэм ужъёсты быдэсъяны кулэ вал. Дэремлэн кузь саесъёсыз вылӥллям. Макем кузь саесъёс, сокем узыр семьяысь кен шуыса лыдъяськиз. 

12. Егит кузпалъёсты нырысетӥ уйзы азьын одно ик ӝукен сюдӥзы. Макем отын трос ю тысез, сокем трос нылпиоссы луозы шуыса лыдъяськиз. 

13. Кышномурт нылпи вайыны ӧз быгаты ке, сое анай-атаезлы берыктыны быгато вал. 

14. Сюан бере куинетӥ нуналаз егит кышно табань пыже вал. Со дыре егит пиос, липет йылэ тубыса, ӵынпотонэз пытсаны кулэ вал. Нылмурт ӵын пушкын ӝоказ, тыл кысӥз, нош мукетъёсыз ваньзы сое кузёяськымтэез понна тышкаськизы. Йыртэман кыстӥськиз, егит кышно йыртэмасьёсты кумышкаен куноятозь.

15. Удмуртъёс сяме пыремъя трос нылпи вордӥзы. Нылпитэк улон возьытэн лыдъяськиз. Со понна кылкутон но чакламын вал — кузпалъёсты музъем вылэ ымнырын выдтыса, ӵужонэн жугизы. 

16. Секытэн нылкышнолы но солэн кузпалэзлы пӧйшурлы но, мукет адямилы но вӧсь карыны уг яра вал. Нылкышно сӧсыр адями шоры синазькыль учкиз ке, солэн нылпиез но сыӵе ик луыны быгатэ шуыса оско вал.

17. Нылпи вайыны быгатымтэ кышномурт уйин нюлэскы мыныса, егит писпуэз гердэн керттыны кулэ вал.

18. Нылпиез вордскем бере егит атайлы мултэс сылалтэм ӝук сёто вал. Воргорон вань ӝукез сиыны ӧз ке быгаты, со ӝукез йыр вылаз кисьтӥзы. 

19. Нылпитэм семьяос калыклэн леземзыя муртлэсь нылпизэ басьтыны быгато вал. Басьтыны быдэ вуэм адямиез но лэзиськиз. 

20. Пельнянез удмуртъёс асьсэлэн йӧскалык сиёнэнызы лыдъяло. Вашкала дыре куддыр сӥль интые пушказ ӝук, ӝуйы, тамак тырылӥзы.

21. Россиын улӥсь калыкъёс пӧлын удмуртъёс — самой горд йырсиё калык.

Тани таӵе фактъёс шедё удмуртъёс сярысь интернет бамъёсын. Нош зэм-а та ваньмыз, яке выжыкыл, сое песянай-песятайёстылэсь юалэ. Кин тодэ, оло, асьме ёросысь удмуртъёс пӧлын эшшо но тунсыко фактъёс вылӥллям на.