Хезмәт

Балтач районы

16+
2024 - Гаилә елы
Азьлане

Жугиськон аръёсысь нылпиослэн одӥгез

Ӟаны гуртын улӥсь Николай Кунаевлы 90 арес тырмиз.

Агае сярысь мар ке но гожтыны уз луы меда шуыса, киям ручка кутӥськем вал. Кема малпаськыса пуки. Кинъёслэсь юалляськоно, кинъёслы вазиськоно? Паймымон, родной агаедлэсь ортчем улон сюрессэ эн тоды ай тон! Туннэ кинъёслэсь юалляськод солэн пинал, егит дырыз сярысь? Ӟаны гуртын, бускель гуртъёсын ӧвӧл шуымон ини соин ӵош будэм, ужам арлыдоос. Пукисько, пукисько но, мылкыд бугырске, синмысь синкылиос вияло. Эх, шуисько, азьвылгес мар малпаськи мон, юалляськоно, вал сое ӟеч тодӥсьёслэсь. Николай агайлэн пинал но егит дырыз сярысь тодон понна ас дыраз вераськоно вал анай-атайлэн нырысетӥ пиналэнызы — Люба апаен, кыкетӥ нылпиенызы — Аркадий агаен, югыт дуннеысь кошкытозяз сазь йырвизё луэм, ялан дуннеысь югдурен тунсыкъяськыса улэм Пор шаерысь Ондрышка гуртын гумыр карем Леонид агаен, улонысь туж вазь кошкем Ципьяын улэм Гриша агаен. Туннэ соослэн одӥгез но асьме пӧлын ӧвӧл ини... Яралоз ини, мае тодӥсько, кинлэсь мар кылӥ, тӥ доры вуттыны тыршо. Та тодэ ваёнъёс йырам кылемын анаелэн, аслаз Николай агайлэн верамъёсысьтызы.

Вордӥськем агае 1935-тӥ арын 25-тӥ январе куинетӥ пинал луыса. Быдӟым Отечественной ож кутскон азьын атаймы, Михаил Прокопьевич, вордскем юртэ покчи пи, выныз Алексей, мед кылёз шуэм малпанэн, Киров улосысь Ирека (туннэ нуналэ Марий Элысь Мари-Турек ёросысь Хозино гурт — ред.) гуртын улэм Матай агай (шонер нимзэ уг тодӥськы) доры кӧчыса кошкыны но отчы интыяськыны малпам. Но, атайлэн семьяез отчы пыр-поч интыяськыса вуымтэ: 1942-тӥ арын вить нылпиез луэм атаймес фронтэ басьтӥллям. Анаймы, Матрёна Ильинична, вить нылпиен огназ кылем. Бадӟым пиналзылы, Люба апайлы, соку дас кык арес луэм, нош кыкетӥ пиналзылы, Аркадийлы, дас арес, Николайлы сизьым, Леонидлы ньыль, нош самой покчиезлы, Гришалы, одӥг арес луэм. 

Тӥни озьы анаймылы кыкнапала ветлыны тупам. Ӟаны гуртысь атаелэн Анисия сузэрез агаезлэн семьяез шоры «кырыжгес» учкыны кутскем, лэся. Кыл пумысен атаелэн покчи выныз, Алексей, 1943-тӥ арын фронтэ басьтӥське. Куинь толэзь ортчыса, Украинаез мозмытон понна мынэм ожъёсын бырыны шеде. Со ватэмын Харьковской областьысь вынлыко (братской) шайгуослэн одӥгаз. Нош атаймылэн кыкетӥ выныз, Илья, кулэ Ленинградской областьысь госпитальёслэн одӥгаз. 

Анае ялан вералля вал вить нылпиен Ӟаны гурт но Киров улос куспын пыдын ветлэмзы сярысь. Ондрышкаез потыса, Киров улосэ пырем бере, дасо иськемъёсты «сьӧд нюлэс» пыр потӥськомы вал шуыса вералляз анаймы. Одӥг аресъем Гришаез пичи нуны уробое поныса ветлытӥллям. Татын паймымон учыр сярысь но вераме потэ (та сярысь мыным вераз Леонид агае). Люба апае бере кыкетӥ нылпизэс, Аркадийез, гуртын улэм Анисия апай матынгес карем. Тӥни соин, оло, дас аресъем Аркадий, Киров улосысь нюлэс сюресъёс кузя пегӟыса, Ӟаные бертэм. 

Тӥни озьы кыкнапала ветлыкузы, Ондрышкаысь пиналъёссы луымтэ кузпалъёс доры кӧлыны пырало вылэм. Соос Леонидэз вордыны басьтыны вераськиллям. Со палъёсын жугиськон аръёсы ӟечгес улӥллям. Озьы Леонид Пор шаере вордос пи луыса улыны кылем. Леонид агаймы гумырзэ отын ортчытӥз (кулэмезлы куинь арлэсь уно ини). Ёрмон, сютэм улон ӧй ке луысал, сётысал меда анай аслэсьтыз пизэ вордыны? Со дыре анаймылэн самой бадӟым сюлмаськонэз пиналъёсызлы сиён шедьтон луэм. Николай агайлэн верамезъя, Люба апаен ӵош соос бускель Тюнтер гуртэ кӧня ке пол кураськыны но мынӥллям. Тюнтерын но сиёнлы ёрмон луэм, дыр. Кин ке но кык-куинь шорем нянь сётэ вылэм, уноез кӧня ке картофка сётэм. Анаелэн верамезъя, одӥг нуналэ кулон югдуре вуэм казазэс вандӥллям, солэн сӥленыз кык арня ӵоже шыд пӧзьтӥллям. Одӥг-кык кырым пызез вуштэм картофкаен, поттурынлэн кидысэныз сураса пыжем няньлэсь, сисьмем картофкалэсь пыжем кӧмечлэсь но ческыт сиён луымтэ со дыре. 

Атаймы ожысь 1945-тӥ арын сӧл-таза бертэ. Бертыны бертэ, нош пырыны нимаз корказы уг луы. Атаймы, вербовкаен Финляндия пала нюлэс ужъёсы кӧчыса кошкем Абызъёслэсь пичигес вуж корказэс радэ пыртэ но соос отын улыны кутско. Мон со коркаез али но ӟеч тодӥсько. Мон ачим, Геня выны отын вордскиськеммы. Отын сизьым ӵошен улӥмы (Аркадий агай Анисия апай дорын улӥз). Пичи пиналъёс гужем но, толалтэ но гурвыл дорысь сэндраын изизы. Толалтэ кезьытъёсы укноосы чиньы зӧкта йӧ кынме вал. Бадӟым гурез я сусыпуэн, я пашпу шылёен эстылӥзы.

Николай агай 1954-1956 аръёсы Мурманск городын служить кариз. 30-40 градус кезьытъёсы сурон сапеген, автоматэн караулын луэмъёссэ ялан вера вал. Армиысь бертэмез бере, Высокая Гора ёросысь Усадыысь гурт хозяйствоя училищеез йылпумъяса, механизаторлэсь ӧнерзэ басьтӥз. Тӥни со дырысен вань улонзэ колхоз ужен герӟаз. Пӧртэм ужъёсын тыршиз, октон-калтон вакытэ комбайнэн ужаз. Ципьяысь шоръёзо школаын дышетскыкум кык сезон мон солэн юрттӥсез луи. Адӟымтэзэ адӟиз ини Николай агай вуж комбайнъёсын ужакуз. Тракторен кыскаса ветлытоно «Сталинец» шуэм комбайнэн ужакуз, Ӟаны палась бусыысен Кисаль палась бусые шур вамен потон понна ӝыны нунал дыр ортче вал. Трактор сьӧрын комбайн, со сьӧрын комбайнлэн копнителез, со сьӧрын — жатка. Собере араз вуж «СК-4» комбайнэ пуксиз. Малы пуксемезлы ӧкынэ вал. Нуналлы быдэ сямен я одӥг интыез тӥяське, я мукет ёзэз ужысь потэ. Вожез потэменыз тӥяськем ёззэ кыдёке сэрпалтэ вал. Ӧжытак улыса, со ёзэз доры мыныса ӝутыса вае вал. Вылын нюлэс палась бусыын ужаку, оло куинь, оло ньыль нунал кутсаны ӧм быгатэ. Оло, соин меда колхозлэн со дырысь председателез Г. Гузаиров со бусыез «Кунаев басуы» (Кунаевлэн бусыез) шуэм. Та сярысь мон гуртоелэсь Михаил Папаевлэсь кылӥ.

Витьтонэтӥ аръёслэн пумъёсаз, улыно-вылыно корка ӝутэм бере, Николай агай Ярак-Чурма гуртысь Лиза нимо нылэн семья кылдытэ. Ӵошен кык нылзэс но пизэс пыд йылазы султыто. Покчи нылзы Светлана аслаз тыршеменыз вылӥ тодон-валан басьтэ, ёросысь ӟуч кылъя но литературая дышетӥсьёс пӧлын адӟем карымон педагогъёслэн одӥгез луэ.

Николай агайлы тужгес но секыт шуккет луиз кузпалэзлэн дырызлэсь вазь югыт дуннеысь кошкемез. Сюлэмыз туж вӧсь луэм, дыр, арен ӝыны мында секыт висёнэн висьыса инты вылаз кыллем яратоно адямиез шоры учкыкуз...

Николай агайлэн колхозын тыршем аръёсыз пӧлысь тужгес но секыт луизы, дыр, бригадир луыса ужам аръёсыз. «Пиналъёслэн пиналъёссылы но ужаны медаз кылды та ужын», — шуэ вал со. Бен, адямиосын ужан капчи уж ӧвӧл со. Вазь ӵукна ик вырӟыса, адямиосты колхоз уже ӧтчано. Адямиос пӧлын кыӵеосыз но ӧвӧл. Ведь со аръёсы уно ужъёсты ки кужымен быдэсъязы. Одӥгзэ со яке та уже ӧтиськод, соиз кыӵе ке муг шедьтыса, уже мыныны пумит луэ. Мукетсэ ӧтиськод, соиз но соглаш уг луы. Кӧня нервъёссэ тӥяны тупам, дыр, бригадирлы со аръёсы. Созэ ачиз гинэ тодэм, дыр. Оло, ӵапак со аръёслэн бервылзы луыса, тямыстон арессэ тырмытэмез бере куинь пол инсульт луиз ини солы. Нош берло аръёсы тазалыкез туж лябӟиз. Али куинь-ньыль ар талэсь азьло гинэ солэсь капка выжыысьтызы скамья вылын пукемзэ ӵемысь адӟиськод вал. Нош туннэ сое коркасьтызы поттыны но кышкало. Али яра нылъёсыз, пиез, кенэз вань: ассэ, кыллён интызэ утялто, сюдо, кулэ эмъюмъёс сёто, мугорзэ мисько. Мар бен карод, аръёс асьсэлэсьсэ басьто...

Та дырозь милям выжыямы 90 арессэс тырмытэмъёс ноку луымтэзы. Оло, пичи дырыз туж секытэн ортчемысь, оло, адямиослы секыт карымтэысьтыз Инмар солы кузь гумыр кузьмам, дыр. Котьма шуид ке но, солэн гумырыз ӧкынымон ӧз ортчы. Улон даураз выль корка ӝутӥз, нылпиоссэ пыд йылазы султытӥз, писпуос но мерттэм, дыр... 

Александр Кунаев

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Галерея

Оставляйте реакции

1

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: 90 аресъем юбилей арлыдоос