Пенсия баллары җитмәгән очракта нәрсә була?

Картлык буенча иминият пенсиясе алу өчен 400-ФЗ номерлы закон нигезендә пенсия яшенә җитү генә түгел, ә минималь хезмәт стажы һәм тиешле күләмдә индивидуаль пенсия коэффициентлары (баллар) булу да кирәк. Бу хакта Татар-информ яза.

2025 елга түбәндәге таләпләр (минималь стаж – 15 ел, минималь баллар саны – 30) билгеләнгән.

Әгәр пенсиягә чыккан вакытта бу күрсәткечләр җитмәсә, картлык буенча иминият пенсиясен рәсмиләштереп булмаячак. Бу очракта гражданин социаль пенсиягә генә дәгъва итә ала, әмма аны пенсия яшенә җиткәннән соң 5 ел узгач кына алырга мөмкин.

2025 елда социаль пенсия күләме апрель индексациясеннән соң 8 824,08 сум тәшкил итәчәк. Төбәктә яшәү минимумы күләмендә социаль өстәмә дә алырга мөмкин.

Шуны да истә тотарга кирәк: социаль пенсия эшләмәүче гражданнарга гына түләнә (166-ФЗ номерлы законның 11 маддәсе). Әгәр кеше хезмәт эшчәнлеген дәвам итсә, аңа түләүләр билгеләнми.