Һаман 18дә

Гомеркәйләр аккан сулар кебек,
Үтте-китте көзләр, язлары.
Тик күңелләр һаман 18дә,
Җанга тансык иркә-назларың.

Бер җан, бер тән булып гомер иттек,
Бүләк иттек гомер кыз-улга.
Иркә-назың,"сөям" дигән сүзең
Йөрәгемне күмде гел нурга.

Тагын сине сайлар идем, сине,
Кабатланса җирдә язмышлар.
Һич туктатмас иде бу адымнан
Язмышларга язган ялгышлар.

Гомеркәйләр аккан сулар кебек,
Язлар үтә, килә көзләре.
Тик күңелләр һаман 18дә -
Бирешми һич көзгә үзләре.

Флера Габдуллина