Татарстанда диабетка каршы көрәш программасын 2030 елга кадәр озайттылар

Татарстанда шикәр чире белән көрәш буенча төбәк программасын 2030 елга кадәр озайттылар, дип аңлашыла хокукый мәгълүматның рәсми порталында бастырылган республика Министрлар Кабинеты карарыннан. Программаның икенче этабы 2025 елда старт алды һәм 2030 елга кадәр исәпләнгән, финанслауның гомуми күләме 580,4 млн сум тәшкил итә.

Документ нигезендә, 2024 елда чараларга 272,8 млн сум җибәрелгән, 2025 елда — 192,2 млн сум. Алдагы елларда финанслау тигез бүленмәячәк: 2026 елда — 97,6 млн сум, 2027 елда — 9 млн сум, 2028 елда-8,4 млн сум каралган, шул ук вакытта 2029 һәм 2030 елларга чыгымнар планлаштырылмаган.

Программа шикәр чире белән авыручы пациентларга медицина ярдәменең сыйфатын яхшыртуга һәм аларның гомер озынлыгын арттыруга юнәлдерелгән. Аның кысаларында медицина үзәкләрен җиһазлау һәм йөкле хатыннар һәм балалар өчен глюкоза дәрәҗәсен мониторинглау системаларын кертү планлаштырыла. 2030 елга диспансер күзәтүе һәм глюкоза дәрәҗәсенә даими тест узучы пациентлар өлеше артачак дип көтелә.

Татарстанда шикәр диабетына каршы көрәшнең якындагы өч елга төбәк программасын гамәлгә ашыруга 115 млн сум акча бүлеп бирү планлаштырыла — 2024-2025 елларга караганда дүрт тапкыр азрак. 

Реальное время