Балтач мәктәбе кызлары Будапешт шәһәрендә узачак Европа чемпионатында катнашачак

9-14нче март көннәрендә Орел шәһәрендә кул көрәше буенча Россия беренчелеге булды. Татарстан Республикасының җыелма командасында Балтачтан 10 кеше иде, алар арасында минем классташларым булу — тагын да шатлыклы күренеш. Алар — Хөснетдинова Фирүзә, Субаева Мария һәм Галиев Зөфәр. Безнең мәктәптән барлыгы 5 укучы катнашты. Әлеге сыйныфташларым һәм 8 нче сыйныфтан Зәмирә Мөхәммәтгалиева белән 7 нче сыйныфтан Хәялиева Сафия.

Чемпион кызыбыз Зәмирә белән булган әңгәмәне без экраннардан күрдек инде, ә менә мин үземнең сыйныфташ кызларым белән әңгәмә корып алдым. 

— Кызлар, бу ярыштан алган хисләрегез белән бүлешегез әле. Мария, бу ярыш синең өчен ничек узды?
— Бу ярыш минем өчен иң күләмле һәм мөһим ярышларның берсе булды. Без монда күп тәҗрибә җыйдык, дуслар таптык, гомумән, онытылмаслык хисләр кичердек.

— Фирүзә, син кул көрәше белән күптәннән шөгыльләнәсең бит, әйеме?
— Әйе, мин инде 2 ел кул көрәше түгәрәгенә йөрим. Бу минем дүртенче тапкыр мондый зур ярышка баруым. Мин дә бу ярыштан бик күп уңай энергия, онытылмаслык хисләр алып кайттым.

— Кызлар, ярыш ничек үтте, бераз тәртибе белән таныштырыгыз әле.
Мария: Ярыш 3 көн барды. Һәр көнне үз яшь категориясе һәм авырлыгы буенча бүләкләү булды. Ә соңгы көнне үз категориясендә иң яхшылар бүләкләнде. 
Фирүзә: Шуны дә әйтәсе килә, бу елны Россия беренчелегенә үткәрелгән ярыш иң күләмле булып тарихка кереп калды. Биредә 62 илдән вәкилләр килгән иде.

— Уңышларыгыз белән дә бүлешегез әле, кызлар.
Мария: Безнең районнан 5 кеше призлы урын алды. Шуның дүртесенә Европа чемпионатына барырга мөмкинлек бирелде. Фирүзә белән мин дә шулай арасында. Мин уң кул буенча 2, гомуми очколар буенча 4 нче урында.
Фирүзә: Ә мин уң кул белән 1, сул кул белән 2, гомуми очколар буенча 2 нче урында.

Кызлар бертавыштан үзләренең тренерлары Сафиуллин Ранил Дамир улына, әти-әниләренә бик тә рәхмәтле. Без дә кызларыбыз Мариягә, Фирүзәгә һәм Зәмирәгә май аенда Будапешт шәһәрендә узачак Европа чемпионатында уңышлар теләп калабыз. 

Әңгәмәдәш –  Гайшә Камалиева, Балтач урта мәктәбенең 8-в сыйныфы укучысы
 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.