Балтачның «Интер» командасы 1 урын яулады

25-26нчы март көннәрендә Буа шәһәрендә Татарстан кубогына футбол буенча 2016 нчы елгы балалар арасында ачык турнир узды. 

Балтачның «Интер» командасы 1 урын яулады. Әлеге җиңүдә егетләрнең тренерлары Илһам Василович һәм Фәрдүс Фәритовичларның өлеше бик зур! Аларга барлык әти-әниләр исеменнән олы рәхмәтебезне җиткерәбез! Үз эшен оста белүче тренер кулына эләккән бала гына күз алдында үсә, үзгәрә. Бу җиңү дә шушы сүзләргә дәлил булып тора.

Егетләргә җиңү җиңелләрдән бирелмәде. 25нче март көнне дүрт команда белән уйнасалар, 26нчы мартта аларга тагын өч команда белән көч сынашырга туры килде. Әмма «Интер» командасына каршы тора алучылар табылмады. Безнекеләр ярышның җиңүчеләре дип билгеләнде!

Балаларыбызның һәр җиңүе, хәтта һәрбер җиңелүе дә безнең өчен бик мөһим. Чөнки җиңелүләр егетләребезне тагын да  рухландырып, киләчәктәге җиңүләргә канатландырып җибәрә. «Интер» командасының җиңүләре күп булсын иде дигән теләктә калабыз һәм безнекедәй тренерлар барында җиңүләргә чын күңелдән ышанабыз! 

Олы рәхмәтләр белән барлык әти-әниләр исеменнән «Тургай» балалар бакчасының физик тәрбия инструкторы Гөлнара Закирова