Гаеп тану штрафтан коткармый

Кукмара районының бер авылында туып үскән, бүгенге көндә районыбыз бистәсенә якын урнашкан авылларның берсендә яшәүче 1985 елгы ир-ат 23 апрель көнне спиртлы эчемлекләр кулланган соң бистә урамына юл тота. Гаиләле, тәрбиясендә өч баласы булган бу ир-ат ул вакытта әлеге батырлыгының нәтиҗәсен уйламагандыр күрәсең, тик ерак китәргә туры килми, аны ЮХИДИ инспекторы туктата.

Инспектор шоферның алкоголь кулланган булуын сизеп, аның барлык хокукларын аңлатып, ДПС автомобиленә утырырга чакыра, махсус прибор белән тикшерәчәген әйтә. Шофер каршы килми, алкоголь кулланган булуын инкарь итми, судта да ул үз гаебен таный, башка алай итеп машина белән идарә итмәячәген әйтә.

Район җәмәгать судьясы шоферны РФ Кодексының 12.8 маддәсенең 1 өлешенә нигезләнеп, гаепле дип таба һәм 1 ел да 6 айга машина йөртү хокукыннан мәхрүм итәргә, 45 мең сум штраф түләтергә дигән карар чыгара.