Татарстанда кыярлар бер атна эчендә 9,66% ка кыйммәтләнде

Татарстанда кыяр һәм ак кәбестә 8 июньнән 14 июньгә кадәрге атнада иң нык кыйммәтләнде. Бу хакта Татарстанстат хәбәр итә.

Кыяр бәясе 9,66 процентка, килограммы 143,01 сумга кадәр арткан. Кәбестә 4,06 процент өстәде, 46,18 сумга кадәр. Шулай ук суган (+2,92%, 48,2 сумга кадәр), чөгендер (+2,03%, 43,8 сумга кадәр), помидор (+2,28%, 180,57 сумга кадәр), бәрәңге (+2,85%, 49,66 сумга кадәр), кишер (+1%), ипи, кефир һәм атланмай кыйммәтләнде.

Бананнар 1,4 процентка, 125,96 сумга кадәр арзанайган. Макароннар — 1,72 процент (77,14 сум), тавык йомыркалары 1,43 процент (87,04 сум) югалткан. Каймак һәм сосискаларга бәяләр төште.

Вести Татарстан