Балалар агулануы турындагы хәбәрдән соң Роспотребнадзор белгечләре килгән

Татарстанның Лаеш районындагы «Инноватика» лицеена мәктәп укучыларының күпләп агулануы турындагы хәбәрләрдән соң Россия Кулланучы хокукларын яклау буенча күзәтчелек хезмәтенең Татарстан буенча идарәсе (Роспотребнадзор) белгечләре барган.

«Россия Кулланучы хокукларын яклау буенча күзәтчелек хезмәтенең Татарстан буенча идарәсе мәгълүмат алуга, лаборатор тикшеренүләр өчен үрнәкләр алып сәбәпләрне ачыклау өчен, кичекмәстән белгечләр җибәрде», – дип хәбәр иттеләр «Татар-информ»га санитария ведомствосында.

Элегрәк «Татар-информ» хәбәр иткәнчә, укучыларның агулануы турындагы мәгълүматны ТР Лаеш районы прокуратурасы тикшерә башлаган. Соңрак Тикшерү комитетының «Иминлек таләпләренә җавап бирми торган хезмәтләр күрсәтү» маддәсе буенча җинаять эше кузгатуы билгеле булды.