Балтачның Гарифуллин урамы халкы: "Машина үткәндә җәяүлеләр коймаларга эленеп тормаса ярый инде" (+фото)

"Балтач бистәсендә берьяклы гына юл ясаганнан соң, күпчелек машина безнең Гарифуллин урамыннан йөри башлады, - дип мөрәҗәгать итәләр безгә.- Ул урам Һади Такташ урамыннан менгәндә, уң якка кереп китә торган тыкрык. Менә шул тыныч кына тыкрык хәзер әйтеп, аңлатып бетермәслек мәхшәргә әйләнде, аннан колхоз транспорты да йөри, автомобильләр дә берөзлексез агыла. Тәрәзәләрне ачып булмый, тузан тула, төн йокылары да качты. Зур машиналар узганда шул кечкенә тыкрыкка көчкә сыешалар. Мәктәпкә йөрүче балалар өчен шундый да тыныч тыкрык иде, ул рәхәтлекләр дә бетте, уку башлангач нишләр ул балалар?.. Ярар, боларын инде аның беркем дә үзгәртә алмас, хет ичмасам юлын ремонтласыннар иде, йөреп булырлык түгел бит. Кыш көне нәрсә булыр, күз алдына китерүе кыен. Машина үткәндә җәяүлеләр коймаларга эленеп тормаса ярый инде, ди бер күршебез. Ышанмасагыз, килеп карагыз әле Гарифуллин тыкрыгына, сүзләребезнең хаклыгына инанырсыз..."