Хезмәт

Ӟачча но Ӟӧня шай сярысь

Туала музъем шаерлэн карта вылаз пусйылэмын сюрслэсь трос интынимъёс. Соос пӧлысь одӥгъёсыз — яркыт, тунсыко, нош мукетъёсыз — аспӧртэмлыко, секыт яке серемо.

Асьме Шошма удмуртъёслэн улон котыръёсазы но вань сыӵе яркыт, тунсыко интыос. Тани соос: Муйбор шур, Дьӧльмен нюк, Чола, Салья, Пӧшъя, Муньылон, Ӟямбек нюк, Бошла нюк, Ӟуння нюк, Тӥллячи нюк, Акылба нюлэс, Гожон шур, Тимо шур нюк, Пыжна шур, Бисырян нюк но мукетъёс. Карта вылэ тодмо каремын ог 200-лэсь трос сыӵе тунсыко интыослэн нимъёссы. Али дыре интернетын «ВужМем» группаын шедьтыны луоз та картаез.

Сизьныр (Сизнер — ред.) гуртын но вань кык тунсыко интыним: огез Ӟачча (Ӟатча, Ядча) мукетыз Ӟӧня. (Верам кылъёсыз гожтэмын воштытэк)

   Тани мар вераса кельтэм Леонид Дмитриевичлы улэп дыръяз Байкей Насьта апай.

«Мон Байкова (Михайлова) Анастасия Павловна, вордӥськи 1933 арын Сизьныр (Сизнер) гуртын. Гуртамы нимаз Бельгы уг ортчыто вал, нош вань Ӟачча (Ӟатча) но Ӟӧня шайёсмы. Ӟачча шаймы интыяськемын Урбор дурын Тархан (Сизнер гурт дорын интыяськем бигер гурт, туннэ нуналэ отын улӥсез ӧвӧл ини — ред.) шорын. Арборка шурез ми Урбор шуиськом. Мон уг тодӥськы, кинъёсты отчы ватӥллям, мынам анае но уг тоды вал. Анае, пичи дыръяз, аслаз песяез сьӧры отчы ветлэм вылэм али. Семык дыръя шай вылысь бертэм бере, вазьвал арын, ми отчы куать ӵошен люкаськыса буре вайыны мынӥм. Яким кышно, Дуня, Гавырла, мон, Акзам Марья (Доут Юриклэн абиез-варманаез), Эшмак Олёна (Алёна).  Акзам Марья вӧсяськон книга нуиз, отын мон книга чырдӥ али. Мон кышкасько, милям Васьлей тышкаське вал, тон ветлӥськод котькытын шуыса. Отысь кырӟаса- кырӟаса вӧсяськон сямен бертӥмы. Тани нош мыноно вал но, командовать карисез ӧвӧл ни. Мон уг тодӥськы, кинъёс отын ватэмын. Поча песяй Парасковьялэсь верамзэ гинэ тодӥсько. Со вера вал, 7 арес дыръяз песяез сьӧры отчы ветлэм шуыса. Эшмак Олёна (Алёна) но вераз: солэн анаез песяез сьӧры отчы ветлэм шуыса, анае но отчы ветлӥз, табере мон ачим мынӥсько ини. Димитровский субботае сямен ик мынӥськод отчы. Тэгыз возь кадь ӧвӧл со инты, колёко-колёко шоръёсыз но вань. Со шайлэн уллапалаз анайёслы, апайёслы турнан дыръя сиён нуиськом вал. Шыд но пӧзьто вал. Гурезь шортӥ васькыку, дас одӥг-а, мар-а адями сӧсырмиз со шорын.

   Нош Сизьныр гуртлэн шоразгес нюлэс пушкын но шай вань. Нюлэс нюртӥз ини, сыӵе чебер инты вал, шундыя гурезь. Ӟӧня шай шуо сое. Пичи Зоя нимо нылэз нырысь ватӥллям но Зоя шуыны тодымтэзы Ӟӧня шай шуиллям. Кинлэн нылпиез крашине пыртытозь кулэ вал, отчы ватӥллям. Соос отын 10-а, мар-а. Бадӟымъёсыз куинь вал. Жугиськон дыръя ватыны вал но ӧз сётэ. Валъёс жугиськон дырья туж начар улӥзы, кормаськонэн но висизы соос. Вал тэрымон бӧльмеын, валлэсь йырзэ педло поттыса, сера ӝуатыса бурмыто вал кормаськонлэсь. Со секыт аръёсы Гранялэн ӵужапаез Онся (Анисья) кулӥз. Со ӵужапаез нылкышноос гудӟыса ватӥзы. Нырысетӥ нуналаз ватыны ӧз быгатэ ини сое, кыкетӥ нуналаз мыныса гудӟыса ватӥзы. Валлян начар улӥсь гинэ нылкышно. Гуртын пиосмуртъёс ӧй вал. Кӧня ке бабай луэм меда? Ӧвӧл меда? Четушкаен ву нуыса ке но, бамзэ миськизы, миськытэк ик ватӥзы. Салазкиен нуизы меда? Валэн нуизы меда? Чаддюа (Ципья гуртэ) нуыны кужымзы ӧвӧл, валъёссы начаресь. Азьло отчы Пильмон кышноез ватӥллям, собере берен поттыса Чаддюа (Ципья гуртэ) нуиллям. Кыкетӥзэ Койык Катьырна шуо вал, сураськысагес ветлэ вал ини, сое отчы понӥзы. Куиньметӥез Койык Васьлей ӧй вал меда? Мынам нокинэ ӧвӧл ке но отын, мон но мынӥсько отчы. Милям бускель Расин Клинлэн (Герасимов Клим) выныз кулэм вал, сое отчы ватӥзы. Гурьян кудолэн кык-а, мар-а. Онтон Мишалэн кык-а, мар-а. Гранялэн Дуняезлэн пичиез но отын ӧвӧл меда? Cоос но отчы мыно. Киросъёс отын ӧвӧл.

Нош ик вераме потэ валлян ик валлян Петроу дыръя асьме песяйёсмы но бабайёсмы ветло вал Гыркес шур нюклэн шораз вӧсяськон кыз доры. Така вандыса шыд пӧзьто вал туж бадӟым пуртыен, туж шулдыр луэ вал. Со кызэз паджа-паджа карыса коразы, сыӵе тустэм пуке али. Собере анга пушкын векчи кызьпу вань вал. Сое агроном милям быдэсак гырыса шальтрак уксёез кисьтӥськем. Отысь писпуэз корад ке, визьтэм, пе, луиськод шуо вал. Отысь пу ваисько шуыса гуртысьтымы гыжлояськыса со пузэ берен нуыса мынэм. Агроном, висьыны усьыса, со кызьпу доры така вайыса вандэм».

Мар шуэм кыл со Ӟачча?

Кытын ке но вань

                             Сочи лымшорын,

Зарезь тулкым миське

                                            отын ярез.

Нош вань Ӟачча

                         асьме пал шаерын,

Реклама

Вань Ӟаччалэн чебер

                                      Варӟи шурез.

Малы ке но со мусо мыным гурт.

Оло кырӟась Варӟи-а вунонтэм?

Яке отысь шулдыр

                                          Ӟачча курорт

Чалмыт мӧзмон

                        кельтӥз-а мылкыдэ?

Алнаш ёросысь Варзи-Ятчи (Ӟачча) гуртлы сӥзьыса гожтэ та чуръёссэ Александр Белоногов «Вуберганъёс» кылбур бичетаз (1977 ар). Варзи-Ятчи но Кузюм гуртъёс куспын интыяськемын Ӟачча шай. Грак (Граховской) ёросын, Старые Ятчи (Вуж Ӟачча) — Карман гурезь котырын бигер ясак люкасьёсын ожмаське Чирккей батыр. Эгра (Игринской) ёрос Мучи гуртын — Ӟатчатэль инты тодматэмын. Эгра ёросын ик Ильяпи гуртын улӥсьёсызлэн верамзыя, вашкалаоссы Ӟачча ошмес дорын сылӥсь куалаязы Воршудзылы (выжылэн утись инмарез) вӧсяськиллям. Шаркан ёросын Ӟаччакуа (куала) — инты пумиське Кельдыш гуртын. Сюмси ёросын Зятцы (Ӟачча) гурт. (М. Атаманов «Удмурт музъем куара», 2015 ар). Вераса быдтонтэм трос интыос герӟаськемен Ӟачча нимын. Тодосчиос валэктэмъя (Атаманов М.Г., Чураков В.С., Владыкин В.Е. но мукетъёс),  Ӟачча тужгес но вашкала удмурт выжы ним. Та пӧлын ик асьме котырын пумиськыло таӵе выжы нимъёс: Ӟуння (Тылогурт), Сэрья (Сэрья, Янгурчи), Чипья (Ципья, Тагашур), Турья (Вуж Турья, Карык-Серма, Удмурт Китяк (по речке Китяк), Чола-Пӧшъя-Салья (Вуж Кушкет, Средний Кушкет, Киселево, Сала-Кушкет, Пор-Кутеш, Б. Карлыган, Малый Карлыган, Н.Шолдынер), Уча — (Сизнер, Сизнер Починка), Лӧзя (В.Ушма, Н. Ушма, Шуйгурт, Ярак-Чурма, Гондырево, Большие и Малые Лызи), Дурга — (Дурга). Киськем, Кургем, Вукогурт (Юбек), Порез, Лельвиж гуртъёслэн выжы нимъёссы тодмо ӧвӧл.

Асьме котырысь вашкала удмурт интынимъёс медаз быре, герӟаське та телефон номерья +79119564065 (Алексей Шмелёв).

Алексей Шмелёв,

Санкт-Петербург

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (2)
Осталось символов:
  • 7 октябрь 2021 - 11:49
    Без имени
    Мон
  • 1 октябрь 2021 - 17:16
    Без имени
    Туж тунсыко материал. Тау бадзым!