Алексей Александрович Овчинников – опытэн комбайнёр

Школаын дышетскыкуз ик музъем уж борды кыстӥськем,  гужемзэ комбайнэн ужась Вова агаеныз (сюратаез) Арборын ужам. Вова агаез комбайнэн ужам ке, Алексей солэн юрттӥсез луэм.

- Школаын дышетскыкум ик трактор нуллон понна праволы дышетски, техникаен егит дырысен ик тунсыкъяськи. Соин школаез йылпумъяме бере но Урнякын водительлы дышетски, - вера Алексей агай. – Техника борды кыстӥськи бере, Вова агай сьӧры кыстӥськыны кутски. Со монэ сьӧраз басьтӥз, озьы мон солэсь ужамзэ адӟыса, ачим но та уж борды дышыны, кыстӥськыны кутски.

Кык ар ӵоже армиын служить каремез бере, 1997-тӥ арын Алексей гуртаз берытскыса, “Труд” колхозын ужаны кутске. Сельхозтехникаын ремонт карыса ваем СК-5 «Нива» комбайн кызь аресъем Алексейлы оско. Та комбайнэн дас арлы матэ аръёс ӵоже кутсан, аран ужъёсты быдэсъя со. Толалтэзэ пӧртэм ужъёсты ужа, нош гужемзэ комбайнэ пуксе. Нош 2006-тӥ арын Алексей Ципьяысь коммунальной хозяйствое ужаны интыяське. Отын но солэн быдэстоно ужъёсыз техникаен герӟасько – со слесарь луэмез сяна, экскаваторен но, тракторен но ужаны вутске. Алексейлэн верамезъя, коммунальной хозяйствоын ужакуз но колхозын со сярысь уг вунэто – дырен-дырен комбайнэн ужаны ӧтё. Алексей Александрович, валамон, талы шумпотэ гинэ – кельшытэм ужаз кинлэн ужамез уз поты, со сяна уксё но мултэс уг луы. 2015-тӥ арын «Труд» колхозэ выль КЗС-812 комбайн басьто, соин ужаны Алексей Александровичез ӧтё. Алексей, кема малпаськытэк, соглаш луэ. Со дырысен куатетӥ сезонзэ ини со комбайнэныз уг люкиськы.

- Ужме яратӥсько, кельшытӥсько. Зэмзэ ке верано, уксёен но уг люкето, техникаез но матын карисько.  Арлы быдэ комбайнэн ужам бере, опыт но люкаське ини. Со сяна пичи дырысен техникаен выреме но ас бервылъёссэ сётӥз, дыр – кызьы луиз ке но, котькуд ужын опыт, стаж кулэ ук, - маде механизатор.

Опытэз бадӟым луэмысь-а, трос тыршемысьтыз-а – Алексей Овчинников арлы быдэ азьмынӥсьёслэн радъёсазы луэ. Тани республика масштабен арлы быдэ ортчись конкурсэ пыриськыса но, куинетӥ арзэ коньдон премия басьтэ ини со. “Тыршыса ужам механизаторъёслэсь ужзэс дунъяны, кулэезъя данъетаны быгато бере, шумпотымон. Вылаз ик ми понна вуонояз эшшо но бадӟымгес вормонъёсы, умойгес показательёсы вутскыны умой стимул луэ со”, - шуэ Алексей. Алексейлэн кышноез, Ольга, кузпалзэ ваньмыз ласянь поддерживать каре. Ужа Ципьяысь социальной реабилитацияя «Наз» центрын. Кузпалъёслэн куинь нылпиоссы будо – Валерия нылзы 7-тӥ классын дышетске, Никита но Кирилл пиоссы – 4-тӥ классын.