Али ке но ужасал

Тагашур гуртын вордскыса будэм, огъёзоосыз кадь ик секыт улон сюрес ортчем Лидия Александровалы 90 арес чик но сётыны уг луы (син гинэ медаз усьы). Куинь - удмурт, ӟуч, бигер - кылын туж чылкыт вераське, пельыз кылэ, синъёсыз адӟо, сюлмыз таза. Капчи мылкыдо, паймымон усто вераськись. Ачиз кылызлы быдэ сямен: «Инмар мыным тазалык сётӥз» шуыса вера.

«Гумыры ӵоже ужай, ужлэсь чик но ӧй жадьы. Али но ужасал» шуыса, паймытӥз со куноосты. «Лыктэмды понна тау тӥледлы!» шуыса, бӧрдыса но басьтӥз. «Мукетъёс кадь будыны ӧй быгаты, мугорын лапег луэмысь, возьдаськыса, картлы но ӧй бызьы» шуыса, сюлэмзэ но усьтӥз. «Улонлы уг ӝожтӥськиськы, ӵыжы-выжыосы трос, ваньзы но умоесь, кальме тодыса, юрттыса уло» шуыса, сюлмысен тау каремзэ но вераз.

Со туннэ нуналэ сузэрезлэн Зоя нылызлэн семьяяз улэ. Огназ кылемез бере, Зоя апай, пиосыныз-кенъёсыныз вераськыса-кенешыса, сое асьсэ доры вае. Внукъёсыныз ӵош, бадӟым одӥг семья луыса, троссэ синмаськытыса уло. Улонзы тыр, юртъерзы таза, пудо вордыса, асьсэ тыршеменызы уло. Дырын-дырын кытын, кинъёсын улэмзэ вунэтыса, сураськыса вераське ке но, Лидия апай та юртын кадырлы адями. Туж кулэез - со аслэсьтыз кадырлы луэмзэ вала.

Нош Зоя апай милемыз сабырлы, лякыт сямо луэменыз синмаськытӥз. «Аслам коркам бертӥсько» шуыса сюлэмшугъяськыса улэм песяйлэсь мылкыдзэ валаны, соя тупатскыса улыны солы но капчи ӧвӧл, дыр. Но Зоя апай уг ӝожтӥськы, со милям ужпуммы шуыса, озьы кулэ шуыса лыдъя. Тагашурын улӥсь Катя апаезлэсь но кальзэ тодыны вутске со. Ми мынон нуналэ но куное ӧтем вал сое. 82 арессэ тырмытэм Катя апай ачиз одӥг «паймымон маке» луыса потӥз. 12 адямиен (!) бадӟым семьяезлэн эшлыко, куспазы тупаса улэмзы сярысь шумпотыса вераз со. Ми кошкимы, Катя апайлэн - 85, нош Лидия апайлэн 95 аресъем юбилеязы нош ик лыктыны кыл сётыса.

P.S. Одӥгез сюлмам умойтэм мылкыд кельтӥз: «Меховщик» эштос гинэ, кыӵе мугъёсын сэрен, дыр, аслэсьтыз ветеранзэ ӟечкыланы дыр шедьтыны быгатымтэ. Верано ке, дуно кузьым но, трос дыр но кулэ ӧй вал. Мӧйы мурт понна шуныт кыл, саклык висъян ачиз дуно кузьым, вунонтэм тодэ ваён уга.