Ас калыкез понна сюлэмзэ сётыны дась

Котькуд йӧскалыкысь адямилы тужгес чеберез но самой дуноез луэ аслаз вордскем кылэз, кырӟанэз-эктонэз, сямъёсыз но йылолъёсыз.

Калык праздникъёс, кырӟанъёс но эктонъёс, сямъёс одӥг йӧскалыкысь адямиосты огазеяло, кусыпъёссэс юнмато. Соос калыклэсь данлыксэ, лулчеберетсэ азинтыны гинэ уг юртто, со мылкыдъёсты шӧдэм адямиослэн лулзылы но сюлэмзылы шумпотон кузьмало, лулпуш узырлыксэс йылэто, атай-анаенызы но песяй-бабайёсынызы данъяськон мылкыд кылдыто. Праздникъёсыз, кырӟан-эктонъёсыз ышизы-быризы ке, калык но улэмысь дугдэ шуыны луэ. Тужгес ӝожомытӥсез — калык сям-йылолъёсты, шулдыръяськонъёсты, эктон-кырӟанъёсты люкасьёс, егит поколенилы тодэмзэс кельтӥсьёс ӧвӧл шуымон.

Асьме палъёсын улӥсь удмурт калык али асьсэ эктонъёссэс-кырӟанъёссэс сценаын возьматыса, сюанъёсын но шулдыръяськонъёсын быдэсъяса ке но утьыны тырше. Озьы ке но вашкалаысен вуэм кырӟанъёсты-эктонъёсты егитъёслэн киосазы, вуоно поколенилы  воштытэк сётон понна самой ӟеч амал — соосты одӥг книгаен но цифровой форматэн гожтыса кельтон.

Таӵе уж борды ас калыксы понна лулзэ сётӥсь, солэн азьланьын улонэз сярысь сюлмаськыса улӥсьёс гинэ басьтӥськыны дӥсьто. Ӵапак сыӵе  адями асьме палан но вань. Со — Сапожников Леонид Дмитриевич. Шушма шур кузя улӥсь удмуртъёслэсь шулдыръяськонъёссэс но праздникъёссэс, кырӟанъёссэс-эктонъёссэс люкан но эскерон амалэн Марий Эл Республикаысь, асьме ёросысь но Киров улосысь гуртъёсы вуылыса узыр материал дася, соосты видеое уськытэ, туспуктэмъёс люка. Со секыт ужлэн бервылыз — 732 бамен, 800 туспуктэмен «Шошма удмуртъёслэн кырӟанъёссы, эктонъёссы но шудон-шулдыръяськонъёссы: Удмурт шыкысысь ваньбуръёс» шуэм 10 экземплярен книга потэ. Нош книга лыдӟись доры вуытозяз макем бадӟым уж лэсьтэмын. Кытчы но вуымтэ, кинлэн но ӧсъёсаз йыгаськымтэ, куара кылзӥсез но луэм, мылкыдтэмез но. Но Леонид Дмитриевич могӟетъёслэсь но шуг-секытъёслэсь кышкась адями ӧвӧл, книгазэ ӧжыт тиражен ке но поттыны быгатэ.

Книгалэн нырысетӥ лыдӟисьёсыз, мазэ веранэз, Леонид Дмитриевичлэн гуртоосыз. Книгаезлы презентация карыса, гуртооссэ, куноосты ӧтьыса, гуртаз бадӟым ужрад ортчытӥз. Ципья гуртлэн библиотекаяз но Леонид Дмитриевич та книгаезлы презентация кариз. Узыр пуштросо, яркыт суредъёсын, туспуктэмъёсын, эктон-кырӟанъёссын дискен тырмытэм книгаен ми но тодматскимы. Поттэм книгаоссэ ини кемалась вузамын-кузьмамын, асьме палан но, кыдёкысен но курисьёс туж трос, нош тани выльысен книгазэ поттыны юрттэт гинэ шедьтыны уг луы вылэм али.

Тӥни сыӵе ас калыкез понна, солэн вуоноез понна сюлэмзэс сётыса улӥсь адямиослы юрттӥсьёс но, ужзэс адӟыса кулэ дунъет сётӥсьёс но мед луысалзы.

Гульсина Животникова

Ципья черкогурт