Асьме пичи Чебераймы (фото)

«Ми Удмурт Элькунлэн палэназ улӥсь удмурт нылпиос пӧлын вормись луимы. Милемлы сётӥзы туж бадӟым кузьым — лудкеч (небыт шудон), таукарон грамота но нимысьтыз выль ар кузьым, — шумпотон мылкыдъёссэ милемын люкиз Кристиналэн анаез, со дыре ик кивалтӥсез, Анна Владимировна Григорьева.

Вормисьёсты сӥлы карон ужрад 19-тӥ толсуре Ижкарын Калыкъёслэн эшъяськон юртазы ортчиз. Кызьы ивортэ «Удмуртия» агентство, отчы Удмуртиысь но бускель улосвылъёсысь 54 пиналъёс но соослэн дышетӥсьёссы, визьнодасьёссы но анай-атайёссы ӧтчамын вал. Туэез вожвылъяськон Россиын улӥсь калыкъёслэн лулчеберет мерассылэн арез улсын ортчем.

Ужрад куинетӥ арзэ ини онлайн амалэн нылпи садэ ветлӥсь но покчиёзо школаын дышетскись пиналъёс пӧлын радъяськем. Жюрилэн ёзчиосыз, пыриськисьёслэсь видео ужъёссэс эскерыса, вормисьёсты шараяллям. Озьы, нылпи садын визьнод басьтӥсь но покчи классъёсын дышетскись пиналъёс пӧлысь Удмуртилэн уйпал, шор, лымшор ёросъёсысьтыз, каръёсысьтыз но бускель улосвылъёсысь «Пичи Чеберайёсты» но «Пичи Батыръёсты» бырйиллям. Со сяна, пӧртэм номинациосын вормем пиналъёсты но пусйиллям. Сӥё-дано ужрадэз но пиналъёсты Тол Бабай но Лымы Ныл, «Ӟечбур!» газетысь Гири но Капа нимо геройёс  шулдыртӥллям.

Нялтас вераса, «Удмурт нылкышно кенеш» огазеяськонлэн кичӧлтэмезъя удмурт нылпиос понна радъям та вожвылъяськон 20 арлэсь тросгес историеныз но ушъяськыны быгатэ вылэм ини.