Хезмәт

Бадӟым ужъёсты азьпалан али

Гумыр шуонэд туж ӝог ортче вылэм. Нуналмысь ужъёсын, пӧртэм сюлмаськонъёсын, шумпотонъёсын аръёслэсь ортчемзэс шӧдытэк но кылиськод. Ма, тани, али ку гинэ вал, Ӟаны гуртысь Люба апаелэн покчи пиезлы Лёвалы Кутешысь Галя нимо нылэз кышно вайимы, шулдыр сюан каримы. Утёд ке, со дырысен кык дасо арлэсь уно дыр ортчем ини. Нош...

Зарни юбилей... Одӥг малпано ке, улонэдлэн бадӟым но вунонтэм праздникез ини со. Нош мукет ласянь, ӧжытак ӝожомытӥсь, ортчемзэ тодэ уськытӥсь, ортчемезлы йылпумъян лэсьтытӥсь но азьпал улон сярысь малпаськытӥсь гумырлэн одӥг точкаез со. Тани Галина Германовна Николаева но со точкае вуэм.
Галина Пор.Кутешысь туж тодмо, вань гуртоосызлы гажамон семьяын вордскиз но будӥз. Анаез Вера Федотовна вань гумырзэ пиналъёслы тодон-валан сётонлы сӥзиз (соиз гинэ жалямон, секыт висён улонзэ вазьгес куспетӥ кариз. Вылысьтыз сюез небыт мед луоз). Нош атаез - Герман Семёнович - трос аръёс ӵоже «Дружба» колхозын инженерын ужаз, «Татарстан Республикаысь заслуженной механизатор» шуэм дано нимез нуллэм адями. Валамон ини, таӵе семьяын будэм Галина школаын дышетскыкуз но уноезлы адӟем карымон луиз, школалэн общественной улоназ туж активно пыриськылӥз. Тазьы малпано ке, школаез туж умой отметкаослы гинэ йылпумъям ныллы азьпал сюрес одӥг гинэ вал кадь, со - дышетӥсьлэсь ӧнерзэ басьтыса, анаезлэсь ужзэ азинтон. Галиналэн атаезлэн но малпанэз сыӵе луэм. Нош анаез, малы, дыр, талы пумит луэм. Тӥни озьы Галя 1981-тӥ арын Казаньысь гурт хозяйствоя институтлэн экономикая факультетаз дышетскыны пыре. Дышетсконын луэм шуг-секытъёсты ортчыса, 1986-тӥ арын институтэз Горд дипломен йылпумъя. Со арысен ик «Дружба» колхозын валтӥсь экономист луыса ужаны кутске. 1990-тӥ арын «Дружба» колхоз кыклы люкиське, Галина выль кылдэм «Искра» (Ѓаны, Кутеш, Кисаль гуртъёс) колхозэ ужаны выже. Татын одӥг ар мында валтӥсь бухгалтерлэсь ужзэ быдэсъямез бере, 1992-тӥ арысен аслаз тодмо ужаз - валтӥсь экономистэ тодмояло но 2009-тӥ арозь та удысын тырше. 2009-тӥ арын та кык колхозъёсты выльысь огазеямзы дырысен Галина Германовна «Дуслык» эштосын валтӥсь бухгалтерын ужа.
Экономистлэн, бухгалтерлэн ужез капчи уж со, шуисьёс но луозы. Озьы луысал ке, дышетскем но кулэ ӧй луысал, кинэ вуиз сое тодмоясалзы. Котькуд ужлэн аслаз шуг-секытъёсыз вань ук. Сое валан понна та удысын Галина Германовна выллем куамын арлы матэ ужаны, опыт люканы кулэ, дыр. Собере, аслэсьтыд удыстэ ӟеч тодэм сяна, калыкен ужаны тодон но нимысьтыз инты басьтэ, дыр. Татын куддыръя куд пала луыны ёрмымон. Кивалтӥсьёс бухгалтерлы одӥг куронъёс пукто, нош ужась калык - мукетсэ. Сыӵе дыръя бухгалтерлы мар кароно, куд пала луоно? Тӥни отысен пото ини изьытэк ортчытэм уйёс, пӧртэм висёнъёс. Тӥни кыӵе со бухгалтерлэн «капчи» ужез.
Кӧня ке кыл вераме потэ Галиналэн уноезлы адӟем карымон луэм семья улонэз пумысен но. Со аслэсьтыз улонзэ Ӟаны гуртысь Лев Николаевен герӟаз. Нырысетӥ нылпизы Олег но анаезлэн сюрестӥз кошкиз - экономистлэсь ӧнерзэ бырйиз. Али дыре Казаньысь химзаводын бухгалтер луыса ужа. Нош Маша нылзы КФУ-лэн Елабугаысь филиалаз дышетске. Быръем ӧнерез - филолог но журналист.
Пизэс но нылзэс будэтон ужпумлэн бадӟым люкетэз Галина вылэ усиз. Малы ке шуид атайзыез но анайзыез арлыдоесь вал ини, нош картэз, нылпиоссы будыку, шофёрын ужаз, уно дыръя вазь ӵукнаысен бер ӝытозь руль сьӧрын вал. Озьы луэм бере, юрт ужъёслэн уноез Галина вылын луизы. Картэзлэсь анай-атайзэ берпуметӥ сюресэ келян дыръя но Галиналы капчи ӧз луы, котькытчы вутскыны тупаз. Картэзлэн агаез, апаез но сузэрез кемаласен ини Ижевскын уло. Анай-атайзы ӧвӧл ке но, вордскем юртсэс уг вунэто, Галинаен Лёва доры ӵемысь куное бертыло. Атай юрт ке но, отын сайкыт ымныр, шуныт кыл луыку гинэ бертэм потэ ук со. Со паласен Галина уг раньӟы, шуныт кылзэ но уг жаля, куно карыны но быгатэ, сьӧразы саламъёс но лэзе. Тӥни, Витя агайзы Галиналэсь пыжем табаньзэ анаелэн пыжем табанез выллем ческыт потыса сиисько шуэ, пе.
Витьтон арес уно кадь потэ ке но, нокинлэн но мӧйымон пала кошкисько, лэся, шуэмез уг поты. Нош Галина Германовналы таӵе малпан йыраз но медаз лыкты али. Вазь али солы таӵе малпанъёсын улыны. Аръёс каньыл луыса, нылдэс дышетонды, пидэс семьяё каронды, соослэсь нылпиоссэс утьыны юрттонды но мукет бадӟым ужъёсты вань али азьпалан.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: