Бадӟым Лӧзя II люкет гуртысь Мария Никитиналы 90 арес тырмиз

Мария Ивановна Вылын Ушма гуртын 1930-тӥ арын трос нылпиё семьяын вордске. Бадӟым агаез, Василий, жугиськонын кулэ. Атаез но, туберкулёзэн висьыса, 1941-тӥ арын сопал дуннее кошке. Озьыен, вить кузя кылем пичи нылпиоссэ огназ будэтоно луэ Евдокиялы, Мариялэн анаезлы. Шутэтсконэз тодытэк, кызьы ке но нылпиоссэ утёно-вордоно, пыд йылазы султытоно шуыса, гуртысь колхозын тырше со. Мария быгатэ 7 классэз йылпумъяны (покчи классъёсты дышетске Ушмаын ик, собере — Покчи Лӧзя школаын). Но мукет интые дышетскыны кошкыны луонлык кылдымтэ ини. Озьы со кыле вордскем гуртаз ик ужаны — анаез кадь, колхозэ интыяське. Нюлэс корамъёсыз, Шеморданысь пыдын ю нуллэмъёсыз, тэльмырыса сютэм улэмъёсыз солэн али но тодаз но син азяз. Секыт адӟемъёс уг вуно, вылды... Но котькинлэн улоназ пеймыт нуналъёсыз сяна, сайкыт нуналъёсыз но луо. Мария Ивановналэн но секыт нуналъёсыз бере шундыё нуналъёсыз кутско — 1953-тӥ арын со Ярак-Чурма гуртысь Юрий нимо пиосмуртэн семья кылдытэ (жаляса верано, кузпалыз кулэмын ини). Но та картлы кошкем бераз улоназ ваньмыз умой но лад-лад луэ шуэм кыл ӧвӧл — солы капчигес гинэ луэ, вӧзаз юрттӥсез — кузпалыз луэ ук. Картлы кошкемез бере мукет уже интыяське кышномурт. 1953-тӥ арысен дано шутэтсконэ потытозяз — 1985-тӥ арозь — Мария Ивановна ужа Балтасьысь мех фабрикаын. Тани пенсиын луэмезлы но туэ 35 ар луэ ини.

Никитинъёс будэто куинь нылпиосты, куинь нылъёссэс — Лидияез, Алевтинаез но Маргаритаез (Маргарита улэп ӧвӧл ини). Мария Ивановналэн вить внукъёсыз но вить правнукъёсыз вань.

Туннэ нуналэ Мария Ивановна улэ Алевтина нылыныз но Регина внучкаеныз Бадӟым Лӧзя II люкет гуртын. Ачиз али каллен ветлыны быгатэ, юртаз гинэ ке но. Синмыз но адӟе али. Йырсазез гинэ лябгес вылэм ини. Жаляса верано, шаерамы но республикаямы кылдэм югдурен сэрен районысь кивалтэт Мария Ивановнаез юбилееныз  ӟечкыланы мыныны ӧз быгаты. Но озьы ке но песянайлы кузьмазы РФ-лэн Президентэзлэсь ӟечкылан открытказэ, район главалэсь Таукарон гожтэтсэ но кӧня ке мукет кузьымъёс.

Матысь адямиосыз но юбилярез бадӟым лыдпусэныз ӟечкылазы (Лидия нылыз но нылпиосыныз ӟечкыланы вуиз), сӥзизы солы тазалык но кузь гумыр.

— Анаймылы, милемыз утемез-вордэмез, будэтэмез понна, сюлмысен тау кариськомы но со азьын йыбырттӥськомы. Куинь нылпиоссэс пыд йылазы султытӥзы атаен ӵош. Милемлы лэсьтэм ӟечлыкез анайлы аслыз мед берытскоз. Али кема-кема улыны мед кылдоз солы, таза но шудо мед луоз. Нош ми сое котьку утёмы но котьку вӧзаз луомы, — шуиз Мария Ивановналэн Алевтина нылыз.

Мария Ивановна самой матысь но самой оскымон адямиосыныз ӵош улэ. Туннэ нуналэ семьяяз со яратоно анай но ӵужанай, пересь ӵужанай. Гуртаз — гажамон кышномурт. Со бордын ик луэ, дыр, шудо пересьмонлэн секретэз.