Бервылтэк уг кыльы

Нокин понна секрет ӧвӧл, туннэ семьяын нылпиосынызы вераськон понна дыр тырмымтэ самой бадӟым проблемаослэн одӥгез луэ шуыса. Куд-ог анай-атайёс, тужгес но атайёс, нылпиосынызы кыӵе ке проблема кылдӥз ке, ужысь кошкыны луымтэез, ужлэсь трос луэмзэ, дыр тырмымтэез муг карыны ярато. «Мон - пудо, уксё шедьтӥсь, семьяе коньдон пыртон сярысь сюлмаськись» шуэм малпан вылэ инъяськыса, нылпи воспитать каронэз анай муртлэн ужпумез шуыса лыдъясьёс ӧжыт шат пӧламы? Но туж жалямон: семьяе коньдон пыртон но, нылпи визьнодан сярысь но сюлмаськытэк, вань шуг-секытэз нылкышно пельпумъёс вылэ куштыса улӥсь пиосмуртъёсты но улонын ӵем пумитаськомы.

Нылпи садын воспитатель луыса ужам бере, мыным пӧртэм дунневаланэн атайёсын пумиськыны тупа. Ужан опытысьтым басьтыса вераны быгатӥсько: 3 аресъем пиналъёс ини троссэ валало, пӧртэм юанъёс сётыса, асьсэ сямен улонэз валаны кутско. Со, семья, анай-атай кусыпъёсты адӟыса, аслыз но сыӵе сямъёс пыӵатэ. Нылпилэн начар сямъёслы дышемез, ассэ радтэм воземез тросаз учыре атаезлэсь адӟем каронлэн бервылыз луэ. Юись, тамакы кыскись, даллашыса улӥсь, жугиськись атайлэсь нылпилы кыӵе ӟеч сямъёс пыӵалозы? Пичиысен ужась атаез вӧзын вырыса, ужаны дышыса будэм, анай-атаеныз ӵош пайдаё шутэтскыса, яранозэ ярамтэлэсь люкыны быгатӥсь ӟеч сямо нылпи олокытысен висъяськыса улэ. Веранэз ик ӧвӧл, семьяын авторитетэз луыку гинэ атайлэн нылпиезлы верам кылыз валамон, воспитаниез бервыло луэ.

Милям нылпи садлэн коллективез трос аръёс ӵоже та ӧрын бервыло ужа. Анай-атайёслэн люкаськоназы адӟем карымон атайёслэн улон сяменызы, воспитание сётон амалъёсынызы тодматон, соосын со яке та ужпумъя нимаз вераськонъёс ортчытъян, пӧртэм адӟытонъёс радъян, нимысьтыз праздникъёс ортчытъян - та одӥгез но воспитание сётон ужын бервылтэк уг кыльы.