Егит куараосты шараязы

2017-тӥ арын Кукмор удмуртъёслэн НКА-зы бордын ужась егитъёслэн ёзэтсы, Кукмор районысь Калыкъёслэн эшъяськон юртсы но ёросысь спортъя но егитъёсын ужанъя управление тыршемен кылдэм та конкурс. Кык ар радысь со ёрос масштабен гинэ радъяськем, нош туэ ёроскуспо статус басьтэм, малы ке шуоно Кукморысь егит кырӟасьёслэн но творческой коллективъёслэн вожвылъяськоназы пыриськыны мылкыд кариллям палэнысьёс но — Балтасьёс. Озьы, та конкурсын асьсэ быгатонлыксэс возьматӥзы но пӧртэм степенен дипломъёсын пусйиськизы Ӟаныысь фольклоръя «Шулдыр ӝыт» удмурт калык ансамбль (вокал номинациын 2 степенен диплом) но Михайлова Динаен (вокал-соло, 1 степенен диплом) Анисимова Алёна (вокал-соло, 3 степенен диплом), Починкаысь Иванов Алексей (крезьгур инструментэн шудыса 1 степенен диплом), Покчи Лӧзяысь Волков Александр (вокал-соло, 2 степенен диплом) но Ефремова Анна (вокал, дипломант). Дипломъёсын пусъем сяна, дипломантъёсты коньдон кузьымъёсын но шумпоттӥллям.