Гондыргуртын черк лэсьтыны малпало (+фото)

- Отец Рафаэл, Гондыргуртысь калыклэн кемалась ини черк лэсьтэмез потэ вылэм шуыса тодӥсько. Озьы-а со? Тӥледлы трос адями вазиське, дыр, та юанэн?

- Мон та черкын куинь ар гинэ ужасько али, но калык верамъя, озьы ик вань. Кемалась сыӵе малпанъёссы луиллям. Азьло та гуртын черк луэм ук, соин но гурт калыкез валаны луэ. Соослэн та черкез выльысь ӝутэмзы потэм. Адямиос мон доры но сыӵе куронъёсын лыктӥзы, ойдолэ, черкез лэсьтомы шуыса. Соин но та уж борды кутскимы.

- Озьыен, ужъёс али кутско гинэ, ваньмыз азьпалан… Финансовой юрттэттэк но уз луы…

- Соиз озьы, озьы, конечно. Юрттӥсьёс котьку но кулэ, тужгес но сыӵе бадӟым ужез быдэстыку. Нош али дыре со сярысь вераны вазьгес, дыр. Малы ке шуоно али проектмес юнматыны кулэ, собере трос пӧртэм кагаз ужъёс быдэстоно…

- Туннэ нуналлы бен кыӵе ке ужъёс быдэстэмын а ни?

- Черклэсь вуж фундаментсэ сэрттыса, выльзэ лэсьтӥмы. Черкмы азьло кытын луэм, со шорын ик интыяськоз, кылдэм ке. Трос ӧм ке но ужалэ али, инъет понэмын.

- Мон тодэмъя, котькуд черк кыӵе ке святой адямилэсь нимзэ нуллэ. Гондыргуртысь черк нош кыӵе святойлэсь нимзэ нуллоз?

- Азьло Гондыргуртын луэм черк Николай Чудотворецлэсь нимзэ нуллэм. Соин но выль черк та святойлэн нимыныз ик луоз.

Сергей Анатольевич Григорьев, Гондыргуртын черкез лэсьтонъя староста:

- Гуртамы черк лэсьтэмез калыклэн кемалась потэ вал. Покчи Лӧзя черкын отец Александр ужаку ик та юанэн вазиськисьёс луизы. Али отец Рафаэл ужа ни, туж тыршись батюшка со. Ваньзэ радъяны тырше, котьмазэ но ужаны вутске. Черкмы туннэ нуналэ али лэсьтыны кутскымтэ ке но, кагаз ужъёс нуисько ини. Лэсьтӥськонъя проект радъяське (Тюнтерысь архитектор проектэз дася), вераськонъёс мыно… Гуртоос пӧлын уксёен юрттомы шуисьёсмы но вань ини, шумпотымон. Ужасьёс сярысь ке верано, соос профессиональной луыны кулэ. Азьло ик кагаз ужъёсты быдэстоно, собере вань кадь кужымез черк ӝутонлы сётомы.