Кинлэн Гырон быдтон, нош соослэн Аран быдтон

Праздникез шулдыртӥзы Киров улосвылысь, Удмурт Элькунысь, Башкириысь, Пермь шаерысь но Татарстанысь творческой коллективъёс. Бигер Элькунысь вуэм куноос пӧлын асьме ёросысь Турья гуртысь «Вуюись» ансамбль но луиз. Асьсэды туж умоен возьматыса, трос шуныт но таукарон кылъёсты кылыса, шулдыр мылкыд басьтыса бертӥзы соос Полянаысь. Со гинэ но ӧвӧл, «Аран быдтон» улосвылкуспо удмурт фестивальлэн валтӥсь ужрадаз – дегустация амалэн радъям «Урожай -2019» адӟытонын – турьяос нырысетӥ инты но басьтӥзы али. «Шулдыр гинэ ветлыса бертӥмы. Куинетӥ арзэ та ужрадэ пыриськиськом ини.Туж шуныт пумитаз милемыз Полянкаысь «Победа» Культура юрт но Надежда Моисеевна Исаеваен кивалтэм «Чипчирган» ансамбль. Бадӟым тау соослы. Бакча сиёнъёсын ӝӧк дасяммес но вылӥ дунъязы – самой узыр ӝӧкен лыдъязы но 1-тӥ инты сётӥзы. Жюрилы но, люкаськем калыклы но сӥзьыл урожаймы туж кельшиз, ушъяса-ушъяса, ваньзэ веръязы. Со но мылкыдмес ӝутӥз. Таин валче «Вуюись» ансамбльысьтым нылъёсты пусъеме потэ. Бакча сиёнъёслэсь адӟытон дасяны туж юрттӥзы, ваньмы ӵош кенешыса, сыӵе узыр ӝӧк дасяны быгатӥмы. Бадӟым тау соослы. Сцена вылын куинь номерен выступать каримы, нош кыӵе выступление мызганчитэк. Мызганчи шедьтон туала дыре – ачиз одӥг шугъяськон. Яра, Алёша ( Кушкетысь Павлов Алексей – О.П. ) вань. Огпол но отказ уг сёты, мынэ, калыкез шулдыртэ. Сюлмысь тау карисько мон солы но», - мылкыдъёссэ ӧръяз

Турья гурт клублэн кивалтӥсез Ирина Исьмекова фестивальысь бертэмзы бере.

Фото: автор