«Коррупция — со коррозия. Кызьы сынэм сие кортэз, озьы ик коррупция быдтэ кун аппаратэз но калыклэсь улон радзэ»

Трос лыдӟиськеме бере, валай… Та кыл коньдонэн герӟаськемын вылэм. «Вылӥын» пукисьёс асьсэлэн, уждунзы сяна, палэнысь коньдон пыртыны быгато. Нош кызьы? Асьме вакытэ катъёсты тӥяны туж кышкыт, дыр, мон сямен. Сыӵе адямиосты пытсало ук. Но озьы ке но, шедё вылэм взятка басьтӥсьёс но сётӥсьёс. Туала вакытэ чебер дуно машинаен ветлэмзы потэ, 2 этажъем коркан улэмзы, чебер дӥськут нуллэмзы. Ваньмызлы коньдон поттоно луэ. Соин ик «дӥсьтӥсьёсыз» шедё. Та ваньмыз коррупциен герӟаськемын луэ. Нош мар ке но карыны луэ-а коррупцилэсь мозмытскон понна?

Асьмелэн шаермы туж бадӟым, шулдыр, чебер... Соин трос туристъёс лыкто асьме доры. Ӵем дыръя, кордон сопалась лыктэм адямиос ветло Москваын яке бадӟым каръёсын. Мукет каръёс но гуртъёс адскытэк кылё, соосты радъяны коньдон но уг висъяло. Озьы кырсез, уродэз трос на асьмелэн.

Пичи дырысен ик ми пӧяськонэ пыроно луиськомы… Малы-о, шуоды тӥ? Малы ке шуоно анай кун нылпи ваён юртын пиналзэ вайыкуз ик, сое пумитало «тӧдьы халатэн адямиос». Соослы анай-атайёс нош ик коньдон сётоно луо. Нош малы? Малы соос коньдонзэс огшоры быдто, та ужзы эмъясьёслэн дунтэм ке?

Вордскемез бере нылпилы нош ик нылпи сад утчано. Ӵем дыръя ик верало: «Инты ӧвӧл ни, мынэ мукет сад утчаны». Тазьы ик вералозы мукет интыосын но. Кема ветлэмзы бере гинэ анай-атайёс валалозы, коньдонтэк уг луы шуыса. Ӧд тыры ке коньдон, нылпи вылын ултӥялляськозы. Озьы нылпи ас пушказ борӟаськыны быгатэ, психологтэк эмъяны уз луы ни.

Нош дышетсконэз йылпумъяку кыӵе шуг-секытъёс луо... Веранэз ик ӧвӧл. Тросэз ЕГЭ сётэм нылпиос вылӥ дышетскон интыосы пырыны уг быгато. Татын но трос коньдон сётоно институтэ мед басьтозы шуыса.

Тани нылпи дышетскыса быдтӥз. Табере солы ужан инты утчано. Ӟеч уже пырон понна, кужмо «связьёс» кулэ. Нош ӧвӧл ке со «связьёс»? Котьку но ас поннад пыремед уг луы, уже басьтӥсьёс туж трос мугъёс шедьто: «Ужам интыед ӧвӧл…», «Егит али…» но мукет. Коньдонэн та улонын ваньзэ лэсьтыны луэ.

Быдэ вуэм бере но, нош ик та вамышъёс кутско, выльысен. Малы со нош озьы? Мон малпамъя, ваньмыз но кутске власть бордысен, малы ке шуоно чиновникъёс возьыттэк басьто казнаысь коньдон. Та шимес уж понна соослы номыр но уг луы — бадӟым юрттӥсьёссы  вань. Нош калык, тае валаса, малпа: «Малы-о бен соослы тазьы возьыттэм улыны яра, нош милемлы уг? Мон бен маин уродгес?» Со бордысен ик кутске катъёсты тӥяса улон.

Тужгес но коррупциен черломем удысъёс, мон сямен, медицина, ГИБДД, военной служба, судебной система, чиновникъёс но вылӥ дышетскон.

Озьыен, та удысъёс коррупциен герӟаськем бере, огшоры улӥсь калыклы но секыт луэ. Кызьы сыномем выль, вольыт кортэз сие, озьы ик коррупция но асьмелэсь улон радмес, каньыл улонмес тарка, быдтэ.

Мар карыны луэ та «висёнэз» быдтон понна? Нырысь ик, законъёслэсь ужзэс юнматыны но соослэсь быдэстӥськемзэс чакланы. Кыкетӥез, калыкез дышетоно юридической грамоталы но взяткаостэк улыны. Куинетӥез — тросгес верано СМИ-тӥ та ужрад сярысь. Калыклы валаны тыршоно, коррупция — урод уж шуыса. Калык пӧлын тросэз чигиське улон урод шуыса, нош малы меда со сыӵе? Адями бордын ик ӧвӧл меда со? Азьло ик воштӥськоно адямилы аслыз, витёно ӧвӧл «вылӥсь эксэйёслэсь» ужаны кутскемзэс.

Улонын адями трос пӧртэмлыко югдуръёсы шеде, нош котьку но адямилыко луыса кылёно.

Евдокимова Ульяна,

Шор Кушкет школаысь 9 классысь дышетскись

Фото:https://pixabay.com/