Кудӟем муртлы руль эн сёты

Ӝыт 21 час 30 минут котырын Ципья урамын дугдыса сылӥсь машина борды мырӟиське. Аслаз «Киа Рио»-ысьтыз потыса, сэзъяськыса, паймыса учкыса сылэ но берен машинаяз пуксьыса кошке. Дугдыса сылӥсь машиналэсь кузёзэ Рамилез кылзӥськыса но уг пукы. Рамильлы, ГИБДД-е жингыртон сяна, номыр уг кыльы ни. Пегӟем шофёрез утчаса шедьто, вирысьтыз алкогользэ эскеро. Кызьы машина нуллыны быгатэм со?! Алкоголез нормалэсь (0,16 промилле) 7,5-лы тросгес луэ! Озьы Ципья гуртын улӥсь Анатолий Васильевлы, кудӟыса машинаен ветлэмез понна, протокол гожто. Эшшо одӥгзэ авария кылдытэм интыысьтыз пегӟыса кошкемез понна. Со сяна, куинетӥез но вань али: со ик нуналэ таӵе учыре шедемезлэсь азьло, машиназэ алӥськем интые пуктэмез понна, протокол гожтӥллям, штраф но понӥллям вылэм. Суд, кудӟыса машина нуллэмез понна, эшшо 30 сюрс манетъем штрафе кыске но кык арлы транспорт нуллон правозэ басьтэ. Со сяна, авария кылдытэм интыысь кошкемез понна 5 сутка пытсэт сьӧрын пукон наказание сётэ.

- Кышнояськемын, кык нылпиез вань. Ужез но транспортэн герӟаськемын. Жаляса верано, законэз тӥяса нокинэ но наказанитэк кельтыны уг луы, - шуэ Балтась районъя судлэн кыкетӥ номеро участокысьтыз мировой судья Авзал Хайруллин.

Судлэн нырысетӥ номеро участоказ таӵе ужъёс нимаз ик трос пыро.

- Таксист луыса ужась пи но юыса руль сьӧры пуксе бере ини, тужгес но паймоно кадь, - шуэ судлэн нырысетӥ номеро участокысьтыз мировой судья Зухра Мухамметзянова.

А.Гибадуллин кудӟем йырыныз одӥг нуналлы кык авария лэсьтэм. Азьло ик со дугдыса сылӥсь машинаез шукке, нош соиз интыысьтыз вырӟе но азяз сылӥсь машина борды мырӟиське. Собере Гибадуллин пегӟе, нош ӧжыт улыса берен та интые ик вуэ но эшшо одӥг машина борды шуккиське.

- Номыр но уг тодӥськы, - шуэ со судын. Гибадуллинлы 30 сюрс манет штраф сётӥзы, 2 арлы транспорт нуллон правозэ басьтӥзы. Со сяна, авария кылдытэм интыысьтыз кошкемез понна, эшшо 1,5 ар ватсазы. Нурмаысь А.Ризвановлы но, кудӟыса машина нуллэмез понна, 30 сюрс манет штраф тыроно но арен ӝынылы машина нуллон удостоверениеныз люкиськоно луоз.

Руль сьӧрын курыт юонъёсты юыса ветлӥсьёсты алонъя ялан ортчытӥськись рейдъёслэн но влиянизы луиз меда. Туэ руль сьӧры кудӟыса пуксем ответственной ужын ужасьёс но ӝегатэмын.