Культура юртын праздник

Инкуазь сайкан, тулыс шундылэн бамъёсты гинэ ӧвӧл, лулсюлэмез но эркиям, мылкыдэз бурдъям вакытэ культура удысын ужасьёслэн профессиональной нуналзэс пусъемзы юнме шорысь ӧвӧл, дыр, малы ке шуоно соос улонлэсь шӧмзэ валаны дышетӥсь лултыллэн ошмессинэз, лулчеберет дуннее нырысетӥ вамыш лэсьтыны юрттӥсьёс. Нылпиос понна анай-атай но, арлыдоослы - кенеш сётӥсь но матысь эш. Улонысь шуг-секытъёсын сэрен куашкам мылкыдэз ӝутон но культура удысын тыршисьёслэн уженызы герӟаськемын. Котькыӵе вакытэ мед уломы, нош культура удысын ужасьёс калыклэсь лулчеберлыксэ узырмытон понна жадёнэз тодытэк, сюлмысь тыршо. Министерстволэсь, районлэн главаезлэсь но районысь культура отделлэсь Таукарон гожтэтъёссэс, Данъян грамотаоссэс басьтыны сцена вылэ ӝутскем адямиос та малпанэз юнмато ик. Амалтэк весь утчаськонын, творческой ужын луэм адямиослэн семьязылы дырзы кыле меда шуэм малпан кылдэ. Дырен лыдъяськытэк, гурт калыклэсь шутэтскон часъёссэ тунсыко, сюлме пыӵамон карыса ортчытӥсь культура удысын ужасьёс семьяязы но адӟем карымон луо. Оскымон кузпал, сюлмаськись анай-атай луыса улыны но, ужаны но быгато соос.

Шулдыр ужрад ӟырдыт ӟечкыланъёслы, сяська керттэтъёслы но синпель кузьымъёслы туж узыр луиз. Районлэн кивалтӥсез но, шоркарысь лыктэм куноос но культура удысын ужасьёслы творческой азинсконъёс, шудбуро улон мылкыд каризы, Балтасьлэсь азьло дырысен культураез яратӥсь, гажась луэменыз мукетъёслэсь висъяськемзэ пусйыса, азьпалан но та вырйылын возиськыны быгатозы шуыса, оскемзэс веразы.

Берло аръёсы трос гуртъёсын культура юртъёсты тупатӥзы, выльёссэ усьтӥзы. Сырья, Комзавод, Атня, Алан гуртъёсын туннэ нуналэ туала куронъёслы тупась клубъёс ужало. Кня, Тавзар гуртъёслы но ӝоген таӵе шумпотон вуоз. Али дыре Вукогурт но Покчи Лӧзя клубъёсын ремонт ужъёс мыно. Нош тани Бурнак, Янгул, Нурма культура юртъёс туннэ нуналэ туж жалямон югдурын, соос но ремонт ужъёсты витё. Районысь кивалтӥсьёс та проблемаез быдэстон амалъёсты утчало. Праздникын та ужпумъёс шара возьматӥськизы. ӝоген, туж ӝоген котькуд гурт поселениын югыт, чебер, эркын клубъёс асьсэлэсь ӧсъёссэс паськыт усьтозы. Оскыны гинэ кулэ.