Хезмәт

Мытэм уж азинтэмын луоз

Районысь социальной дурбасьтонъя отделлэн кивалтӥсеныз Алсу Гатиятуллинаен одӥг концерт бере вераськон мытӥмы. «Быгатэ ик та Чулпан (Карелино гуртысь, районын тросэзлы тодмо луэм Чулпан Габделганиева - ред.), ортчытӥськись котькуд ужрадэ лыктыны тырше. Районын со кадь коляскаен ветлӥсьёс ӧжыт ӧвӧл, но соос таӵе ужрадъёсын воксё уг адско», - шуиськом.

Огъя вераса, асьмеос соосты, таӵе праздникъёсын гинэ ӧвӧл, Балтась урамъёсын но чылкак ум адӟиське ӧвӧл-а? Нош сыӵеос районъя сизьымдонлэсь трос. Мугез ма бордын? Сыӵе адямиос асьсэос калыклэсь палэнско-а, яке соослы асьме урамъёстӥ, юрттэт сётон организациосын, общественной интыосын ветлон, пырон-потан условиос, луонлыкъёс ӧвӧл-а? Таиз муг зэмлыклы тросгес тупа, дыр. Зэм, берло аръёсы республикаын кичӧлтон басьтэм «Доступная среда» программа асьме районын но та ӧрысь «йӧэз вырӟытӥз», коляскаен ветлӥсьёс, ичи луонлыкъёсын адямиос понна юртъёсын но сооружениосын каньыллыкъёс кылдытонын нырысетӥ вамышъёс лэсьтэмын. Кылсярысь, 2011-тӥ арын со программая Балтась центральной больницаын кык миллион манет тыр ужъёс быдэстӥськизы: лифт интыямын, отделениосы, кабинетъёсы пырон понна луонлыкъёс кылдытэмын. Регистратураын, нимаз туалетъёсын но табере соослы каньыллыкъёс вань. Нурма шор ёзо школаын (одӥг миллион 678 сюрс манет тыр уж быдэстэмын) но ремонт ортчытэм мукет тодон-валан юртъёсын но та ужпумлы бадӟым саклык висъяське. Нош Бурбаш шор ёзо школа та ласянь вань куронъёсты быдэстэм одӥг гинэ выль юрт луэ.
Мазэ веранэз, социальной юрттэт сётон учреждениос нырысь ик та категориысь адямиос сярысь сюлмаськыны, умой условиос кылдытон сярысь малпаськыны кулэ. 2012-тӥ арын Ципьяысь реабилитацияя «Наз» центрын ӵапак тани сыӵе ужпумен кык миллион укмыс сю сюрс манет тыр бадӟым уж быдэстэмын. Нош 2014-тӥ арын сыӵе воштонъёс калыклы социальной юрттэт сётонъя отделлэн юртаз ортчытыны чаклаське. Озьы ик ужъя центрын - кык миллион, Балтась шор ёзо школаын кык миллион сю сюрс манет тыр лэсьтӥськон ужъёс быдэстэмын луозы.
Быдэстэм но быдэстоно ужъёслэн ужпумзы - котыр ёросмес котькин понна умой карон. Та ласянь аслэсьтыз малпанъёссэ вераз Карелино гуртысь Чулпан Габделганиева: «Та ужпумъёс пумысен мон но сюлмаськыса улӥсько, каньыллыкъёс, Инмарлы тау, адскыны кутскизы ини. Пыр-поч, пумаз-йылаз вуттыса ужамтэ луэмзы гинэ сюлэмез вӧсь каре. Тросаз магазинъёсын пандусъёс вань ке но, кутэтъёссы ӧвӧл, со ик центральной универмаг юртэ пырон но шуг-секытъёс кылдытэ. Уг валаськы, малы пандусъёсты лэсьтоно, куке магазинэ пырыны луонлык ӧвӧл. Трос адями ветлэм юртъёсы, пандус лэсьтыны быгатымтэ учыре, коляскаысен гинэ нюртыны быгатымон нимысьтыз кнопка интыяны кулэ, дыр. Пандусъёс сярысь вераку, эшшо одӥг пол эскерыса потысалзы ке, коляскаын пукись адямиосын кенешыса ужасалзы ке, туж умой луысал».
Озьыен, та ӧрын быдэстэм ужмы асьмелы паймымон луыса адскиз ке но, али азьпалан ужаноез эшшо но бадӟымгес но ответственнойгес вылэм. Предприятиослэн, учреждениослэн, калыклы юрттэт сётӥсь организациослэн кивалтӥсьёссылэн огъя кылэ вуэменызы, законэз утёнын сылӥсь органъёслэн юрттэменызы но Рифат Закировлэн, Рафаэль Габдрахмановлэн, Наиль Сафиуллинлэн, Фагиль Шафигуллинлэн кивалтэмзы улсын ужась лэсьтӥськонъя организациослэн тыршеменызы та ӟеч малпанъёсмы но улонэ пыӵалозы, зэмалозы шуыса оскиськомы.

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Теги: 250
Нравится
Поделиться:
Реклама
Комментарии (0)
Осталось символов: