Мылкыдъёс али но тулкымъясько

5 коньывуонэ «зарни» песянай-песятайёсты сӥлы карыса, Ципья гуртын концерт радъяськиз. Концерт аспӧртэмлыко ортчиз: чай юон но со улсын лулчеберетъя юртэ ветлӥсьёсын радъям творческой номеръёс. Арлыдоосты ӟечкыланы вуизы гуртысь «Калыкъёслэн эшъяськонзы» шаертодонъя музейлэн кивалтӥсез Сайдаш Нурмиев, Ципья шоръёзо огъядышетон школалэн директорез Раниф Ахатов, «Труд» возёслэн кивалтӥсез Рашид Хадиев, Ципья гурт поселенилэн кивалтӥсез Азат Нотфуллин. 

Арлыдоос — будӥсь поколение понна пумтэм визьлюк. Соос, секыт вакытэ будэмъёс, троссэ адӟемъёс, улонлэн котькуд нуналэзлы шумпотыса уло.

Озьы ик 8 коньывуонэ Ципья лулчебертъя юртысь ужасьёслэн но мылкыд карисьёслэн тыршеменызы концертной программа пуктӥськиз Тагашур гуртын. Учкисьёс понна туж тунсыко ужрад пӧрмиз, соос шулдыртыны лыктэм куноосты шуныт кичабонъёсын пумитазы. Бератаз, гурт калык понна мызган гуръёсын эктонъёс ортчытӥськизы. Тагашур гуртын улӥсьёслэн мылкыдъёссы ӝутскизы, тау карон кылъёссэс Нина Константинова, Ирина Конькина, Нина Кумаева веразы. 

Справка понна: Тагашур гуртысь клуб арлэн кутсконаз ворсаськиз. Ужаны мылкыд карисьёс ӧвӧлэн, гуртын лулчеберет удысын ортчытӥськись ужрадъёс быризы.