«Нылпиосмы тодыны кулэ, мар со сыӵе — калык сям-йылолъёс»

Бадӟым Лӧзя 1-тӥ люкет гуртын улӥсь Анастасия Данилова асьмё ёросын вордскемын ӧвӧл ке но, тросэз понна тодмо мурт. Ёросысь Искусствоосъя нылпи школаын кема аръёс ӵоже нылпиослы тодон-валан сётэм кышномурт туннэ нуналэ общественной ужен выре — со Балтась ёросысь ӟучъёслэн огазеяськонэнызы кивалтэ.

Туэ со Казаньын ӟуч кыллэн нуналэзлы сӥзем Татарстанысь Президентэн пумиськонэ но ӧтемын вал. Социальной вотэс бамъёсаз Анастасия Николаевна аслэсьтыз ужъёссэ возьматыса шумпоттэ, нылпиосыныз валче лэсьтэм суредъёссэ но пӧртэм ужъёссэ интыя. Анастасия Николаевнаен вераськеммы но ӵапак ӧнер праздниказ луиз — 8 толсуре (Калыккуспо суредаськисьёслэн нуналзы). Вераськеммес тӥледлы но лыдӟыны ӵектӥсько.

— Анастасия Николаевна, ёросысь калык тӥледыз умой тодэ: шӧдскымон аръёс ӵоже тӥ Искусствоосъя нылпи школаын ужады, асьтэлэн быгатонлыкъёстылы пиналъёсты дышетӥды, трос нылпиос понна яратымон дышетӥсь луиды. Соин, малпасько, лыдӟисьёслы тӥледын матысенгес тодматскыны тунсыко луоз.

— Мон вордски 1986-тӥ арын Свердловск улосысь Североуральск городын ӟуч семьяын. Семьяе кылдытос ужен вырыны яратӥсь (творческой). Атае, Шустов Николай Михайлович, вордскемын Удмуртиысь Грак ёросын. Со огшоры ужась вал ке но (ЭВМ-ен ужанъя оператор), атаелэн быгатонлыкъёсызлэн пумыз ӧй вал. Пичи дырысеным тодам кылемын, кызьы со суредаськиз, пуэз вандылыса но сутыса чебермаз, машинкаен кроить карыса вуриськылӥз…  Тужгес умой тодэ кылемын выль арлы вурем пӧртэм чебер костюмъёсыз, фольклоръя ансамбльлы кылдытэм пӧртэм атрибутъёсыз. Соин та быгатонлыкъёсы мыным атаелэсь выжиллям, дыр. Анае, Шустова Людмила Фёдоровна (Свердловск улосысь Североуральск город), таланто но усто музыкант но кылосчи (фольклорист). Со Ижкарысь баян классъя музыкальной училищеез йылпумъяз. Ужаз музыкальной школаын. 1986-тӥ арын сӥзьыл ми семьяенымы Калуга улосвылысь Боровский ёросэ улыны выжимы. Анае отын клубе ужаны интыяськиз но нылпи фольклор ансамбль кылдытӥз. Нялтас вераса, со ансамблен соос вань Россиын гастролировать каризы — Владивостоке, Оренбурге, Вологдае, Санкт-Петербурге но мукет городъёсы вуылӥзы. Кӧня анайме тодӥсько, со котьку кияз баянэн, нош вӧзаз кырӟась но эктӥсь нылпиосыз. Мыным но пичиысен ик фольклорез яратон анаелэсь выжиз.

— Сыӵе семьяын вордскем бере, валамон ини, тӥ нокызьы но творчестволэсь палэнэ кыльыны ӧй быгатысалды шуыса…   

— Озьы. Пичи дырысеным мынам хоббиосы пӧртэмесь вал. Покчи классъёсын дышетскыкум, кык ар ӵоже эктонъя кружоке ветлӥ. Дышетӥселы бадӟым тау шуыны кулэ, со туж творческой адями вал. Аслэсьтыз тодэмъёссэ со нылпиосызлы но вуттыны тыршиз, милемыз калык творчестволэн пӧртэм амалъёсызлы дышетӥз. Солэсь сётэм тодон-валанъёссэ мон дорам ачим дышетскыса юнматӥ. Анае мыным трос пӧртэм книгаосты басьтэ вал, мон соосъя дышетски. Суредаськыны яратӥ. Краскаен гинэ ӧвӧл, пичи дырысеным карандашъёсын но суредаськи. 5-6-тӥ классъёсын милям Жанна Дмитриевна нимо дышетӥсьмы вал. Со туж чебер суредаськиз, мынам самой яратоно дышетӥсе вал со. Мон котьку со шоры синмаськыса учкисько но ас поннам малпасько вал: мон но бадӟым будӥ ке, со кадь художник луо!

— Татарстанэ улыны выжемды бере но, художник луон сярысь малпанъёсты ӧз вунэ. Асьтэлэсь малпанъёстэс улонэ пыӵатыны быгатӥды.

— Ӧз вунэ, быгатӥ. Талы мон пумтэм шумпотӥсько. Татарстанэ ми 1998-тӥ арын улыны выжимы. Соин 11-тӥ классэз мон Покчи Лӧзя школаын йылпумъяй. Нялтас вераса, мон Покчи Лӧзяын удмурт классын дышетски. Соин удмуртъёс мон понна матысь адямиос кадь. Али но удмурт кылын уг вераськиськы ке но, куд-ог кылъёсты тодӥсько. 2004-тӥ арын Елабугаысь культурая училищее «ДПИ (декоративно-прикладное искусство) и социально-культурная деятельность» отделение дышетскыны пыри. 2007-тӥ арын заочно дышетскыны пыри Казаньысь культурая университетэ декоративно-прикладной творчествоя отделение.

— Дышетскондэс йылпумъямды бере, басьтэм ӧнердыя ужаны кутскиды-а?

— 2008-тӥ арысен ёросысь Искусствоосъя нылпи школаын ужай. 11 ар ӵоже отын тырши. Со аръёс куспын кызь дышетскисьёсы вылӥ дышетскон юртъёсы дышетскыны пыризы но ас улонзэс художественной искусствоен герӟазы (дизайн). Туннэ нуналэ куинетӥ арзэ ини уг ужаськы. Но со шоры учкытэк, яратоно ужме уг кельтӥськы, уг куштӥськы. Лэсьтӥсько пӧртэм декоративной арбериосты, вӧй буёлэн суредъёсты. Кылдытос ужен вырон — со мынам улонэ, мынам ӧнере, мон сое номаин но уг вошты.

— Кузпалдэс но асьме ёросысь гинэ шедьтӥллямды.

— 2007-тӥ арын шуркынмон толэзе мон Кускем гуртэ картлы кошки. Кузпалэ Данилов Николай Юрьевич, со удмурт. Со «Кап Стройын» газоэлектросварщик луыса ужа. Улӥськомы Бадӟым Лӧзя 1-тӥ люкет гуртын. Кык нылпиосмы вань. Артём пимы Покчи Лӧзя школаын дышетске, солы дас одӥг арес. Анисия нылмылы куать арес, со Покчи Лӧзя гуртысь нылпи садэ ветлэ али.

— Асьтэос тӥ ӟуч, кузпалды удмурт. Куспады кыӵе кылын вераськиськоды? Нылпиосты кыӵе кылын верасько? Школаын кыӵе кылэз дышетско?

— Тросгес ӟуч кылын куспамы вераськиськомы, нылпиосын но озьы ик. Пимы вордскыку, али Кускемын улӥськомы вал бере, удмурт кылэз кылыса, тодыса будӥз. Песяез, бабаез, атаез но куспазы удмурт кылын верасько ук. Татын но, Бадӟым Лӧзя 1-тӥ люкет гуртын улыкумы, кузпалэ Артёмен удмурт кылын вераськылэ. Нылмы тани уг тоды удмурт кылэз, соин ӟуч кылын вераськиськомы. Мед тодоз кадь потэ вал удмурт кылэз но, кылдэм ке школае мынӥз ке, отын удмурт кылэз дышетскоз шуыса оскиськомы. 

 — Тӥ асьтэос гинэ кылдытос ужен уд выриське, нылпиостэс но со борды кыскиськоды…

— Зэмзэ но озьы. Нылпиосыным мон вырыны тыршисько. Тыршисько соосты калык творчество борды кыскыны. Пие ини, кылсярысь, туж умой пуэз сутыса чеберманы быгатэ, покчи классъёсын дышетскыкуз ик машинкаен вуриськыны дышетӥ. Суредаськыны тыршиськомы. Артём республика масштабен ортчись ужрадъёсын но суредъёсыныз призо интыосын пусйиськиз.

«Век Татарстана» конкурсын кык ар радысь призо интыосты басьтылӥз. Нылмы но суредаське, та уж солы кельше. Соин но вырыны тыршисько. Туж яратэ Анисия кырӟаны, эктыны, фольклор ласянь быгатонлыкъёсыз шӧдско. Ӵужанаез но дышетыны тырше, тупась репертуар шедьтэ. «Эшъяськонлэн ошмесэз» конкурсын, кудзэ ёросысь удмуртъёслэн НКА-енызы валче радъяса ортчытӥмы, кыкетӥ инты басьтӥз, отын со ӟуч кырӟан быдэстӥз. Огъя вераса, аслэсьтым быгатонлыкъёсме, тодон-валанме, сям-йылолъёсты мынам нылпиосылы выжтэме потэ. Ёросысь ӟучъёслэн обществоязы пыриськись мукет адямиос но озьы ик тыршо. Ымусьтон празднике мынӥмы ке, ымусьтон святкаосты ортчытыса, коркаос кузя ветлӥськомы, кырӟанъёсты кырӟаськомы. Но асьме понна гинэ ӧвӧл, котьку сьӧрамы нылпиосмес басьтӥськомы, соос мед тодозы, мед адӟозы шуыса, мар со сыӵе калык сям-йылолъёс. Соослы костюмъёс но дӥсятӥськомы. Кин кырӟа, кин пуньыен шудэ, кин кияз балалайка кутэ — огъя вераса, ваньзы маин ке выро.

— Анастасия Николаевна, ку тӥ ёросысь ӟучъёслэн  огазеяськонзылэн кивалтӥсьсы (председательзы) луиды? Кин тӥледлы со ужез нуыны ӵектӥз?

— 2015-тӥ арын 12 куартолэзе выль егит объединение кылдытӥське — «Балтасинское отделение Региональной общественной организации «Русское национально-культурное объединение» (Балтасинской отделение РОО РНКО). Нырысь ик та объединение кивалтӥсь луыса мынам анае, Искусствоосъя нылпи школаысь дышетӥсь Людмила Шустова, тодмостӥське. Солэн мукет интые улыны выжеменыз сэрен, 2016-тӥ арын председатель интые монэ тодмосто. Вить ар ӵоже та общественной ужез нуисько ини.

— Трос-а асьме ёросамы ӟучъёслэн лыдзы? Кыӵе гуртъёсын соос тросгес уло? Кыӵе ужъёсын тӥ выриськоды?

— Мынам тодэмея, Балтась ёросын 588 ӟучъёс лыдъясько, со луэ 1,7 процент (Казаньысь сётэм даннойёсъя). Тросгес соос Бадӟым Лӧзя 1-тӥ люкет гуртын уло, озьы ик Покчи Лӧзяын. Но ӟучъёс мукет гуртъёсын но вань, котькуд бадӟымгес гуртъёсын одӥг-кык ӟуч адями шедёз, дыр. Ми, ёросысь ӟучъёслэн огазеяськонзы, вань ёросэн ужаны тыршиськомы — клубъёсын, школаосын, библиотекаосын, нылпи садъёсын. Ӟуч гожъяськисьёсын, суредаськисьёсын герӟаськем кыӵе ке ужрадъёсты ортчытъяны малпаськомы. Кылсярысь, юбиляръёсын герӟаськем датаослы сӥзьыса. Дышетонъя, лулчеберетъя ёзэтъёсын валче кенешыса, радъяны тыршиськомы кыӵе ке конкурсъёсты, адӟытонъёсты но. Нялтас вераса, ёросысь кивалтэтлы таукарон кылъёсты вуттэме потэ. Ку гинэ эн вазиськы, огазеяськонмылы юртто, пӧртэм ужрадъёсты ортчытон ласянь но, кузьымъёсты, спонсоръёсты шедьтон ласянь но. 

— Анастасия Николаевна, тӥ, общественной ужез нуон сяна, пӧртэм фестивальёсы, конкурсъёсы мыло-кыдо пыриськиськоды…

— Зэмзэ верано ке, азьло, куке мон ужасько вал али, капчигес вал. Нылпиосты дышетыку но тырши, пӧртэм калыкъёслэсь творчествозэс мед дышетскозы, мед тодозы шуыса. Асьме ёросын ведь бигеръёс но, ӟучъёс но, удмуртъёс но, поръёс но, мукет калыкъёс но вань. Бен, школаын дышетско ке но вал соос пӧртэм калык творчествоосты, но, мынам малпамея, 45 минут куспын нылпилы трос сётыны уг луы. Милям вал асьмелэн ансамбльмы, куке мынам анае али татын улӥз. Куке ми татчы улыны выжимы, со татын но ансамбль кылдытӥз. Соин школа дырысен ансамбле мон но пыриськи. Эктӥ, кырӟай. Огъя вераса, пичи дырысеным пӧртэм ужрадъёсы активно пыриськыны тырши, мыным со кельше вал котьку.

— Нош туннэ нуналэ ансамбльды кыӵе югдурын?

 — Жаляса вераны кулэ, анае мукет интые улыны кошкем бере, проблема кылдӥз — ансамбльлэн крезьгуръёс кивалтӥсез ӧвӧл. Крезьгуро инструментэн шудӥсез ӧвӧл. Соин ансамбль но ӧвӧл ини. Али ми асьмеос кӧня ке ӵошен (мон, мынам юрттӥсе Анна Филипова, Галина Павлова но гуртысьтымы мукет кӧня ке нылкышноос) маин ке вырыны курадӟиськомы, гуртын пӧртэм ужрадъёсты радъяськомы. Ымусьтон, Вӧй выллем праздникъёсын шулдыръяськиськомы. Та праздникъёсты гурт калык, нылпиосмы медаз вунэтэ шуыса тыршиськомы. Милемыз телевидение но уськытыны вуэм вал. Азьло, ансамбльмы луыку, пӧртэм конкурсъёсы но фестивальёсы пыриськыны тыршиськомы вал. Лаишын ортчись «Каравон» конкурсэ арысь аре пыриськыны тыршиськомы.

— Оло, куке но ансамблез выльысь улӟытыны луоз?..

— Туж умой луысал. Ансамбльмылэн луымтэез — со бадӟым проблема. Ӧвӧл сыӵе адями, кин та уж борды басьтӥськысал. Ачим мон кырӟасько ке но, крезьгуро инструментъёсын шудыны уг быгатӥськы. Зэмзэ верано ке, туала дыре адямиосты выртыны секыт, котькин аслаз малпанъёсаз улэ. Оскыны гинэ кыле, куке но быгатӥсь но та ужез кулэ карись адями шедёз шуыса.