Нырья гуртын ортчем «Жингырты, удмурт кырӟан!» фестивале пыриськеммы сярысь

«Узьмаге шедимы оло!» — сыӵе мылкыдъёс-малпанъёс чилекъязы фестиваль кутскыку но, мыныку но, йылсаськыку но. Со понна коллективмылэн нимыныз тау кылмес вуттэммы потэ: Ципья гурт поселенилэн тӧроезлы — Азат Газизуллович Нотфуллинлы, ёросысьтымы культурая отделэн кивалтӥсь Ильдар Фуатович Насибуллинлы, ёрос тӧролэн социально-культурной ужпумъёсъя воштӥсезлы Ильгам Фидаелевич Гайнутдиновлы. Туала дыре, паймод но ини, концертъёсы ветлымон автобусъёс ӧвӧл шуымон. Ярам, «валмес» Карлыганысь шедьтӥмы, «сезьызэ» та эшъёсмы сётӥзы. Соос юрттытэк ми отчы ӧм вуысалмы...

Туала дыре лэсьтэм клуб но сыӵе вӧл-вӧл луоз вылэм, паймимы! Калыклы ярамон мед луоз шуыса, уксё шыръян сярысь вунэтыса, проектсыя лэсьтӥллям. Сомында коллективез интыяны тырмымон бӧльмеоссы! Асьме Балтась культура юртлэсь но ортчытэ, дыр. Клубзы чебер, залзы бадӟым. Озьы ке но, концерт учкыны мылкыд карисьёс ваньзы ӧз тэре. Сомында люкаськем удмуртъёсын пумиськон — ачиз праздник ини. Нош мыло-кыдо кузёос кунооссэс сюдо-вордо, сектало ке, праздник узьмаген тэгыз луэ!
Пыд йылын ке но, йыръёс вискытӥ ке но, куаныса учки концерт: огзылэсь огзы кужмоесь коллективъёс, чебересь кырӟанъёс, эктонъёс! Эшшо но мылкыды лӧптӥз асьме коллективъёсмылы зол чабемысьтызы! Зэмзэ но «Тӥ — Балтась ёросысь удмуртъёс, кужмоосыз!» — шуыса пуйсизы ни фестиваль йылсаськем бере жюриын пукисьёс но. Куаныса но паймыса учки Балтась культура юртысь выль кылдэм «Зангари» коллективлэсь сцена вылын поръямзэ. Кивалтӥсьсы — Ӟаны клублэн сцена вылаз, кӧкыын сямен веттаськыса будэм но али ёрос культура юртын ужась ӧнерчи Татьяна Ишмурзина. Балтась ёрос культура юртын таӵе усто коллективлэн ванез — асьме Балтась удмуртъёс понна туж бадӟым шумпотон луэ! Молодцы «Балтась» удмуртъёс! Та учыр ласянь одӥг гинэ мылкыд каронэ — «Балтась» удмуртъёс шуэмысь — отын тросэз Ѓаны умортоысь лобӟыса потэм васьыл (пчелиный рой) мушъёс — артистъёс. Таин сэрен медаз лябӟы вал Ӟаны клубысь Калык нимез нуллӥсь «Инвожо» ансамбльлэн коллективез! Балтась культура юртын кылдэм удмурт ансамбльын балтась палъёсгес мед луысалзы!

Узьмаге вуылэммы понна, лулысь-сюлмысь тау кариськомы Нырья кузёосмылы, фестивалез радъясьёслы: Кукмор ёросысь райисполкомзылы, культурая кивалтэтсылы, Эшъяськон юртсылы но Татарстанысь удмуртъёслэн автономизылы!

Сырья клубен кивалтӥсь Леонид Сапожников
Туспуктэмез Михаил Прокопьевлэн