«Ограбление по-удмуртски яке кин кызьы узырме»

Кин кызьы узырме яке «Ограбление по-удмуртски» — тазьы нимаське удмурт кылын потэм выль фильм. Нимыз ик тунсыко, шонер-а? «Кинозэ ӧвӧл, трейлерзэ ке но учкем потэ, нимзэ кылыса ик» — тодмоосы пӧлын тазьы верасьёс ӧжыт ӧй вал.

Фильмлэн премьераез 15-тӥ тулыспалэ ортчиз. Но шонерзэ вераса, со 2022-тӥ арын гужем снимать каремын вал ини, тросэз сценаосыз — Пичи Пурга ёросын. Фильм 1 час но 47 минут дыр ӵоже мынэ. Удмурт кылын снимать каремын ке но, солэн ӟуч кылын субтитръёсыз вань (талы удмурт кылэз тодӥсьтэм учкисьёс туж шумпотӥзы). Режиссёрез — Дмитрий Могучев, шудӥсьёсыз — Удмурт йоскалык театрысь артистъёс.

Дмитрий Могучев — режиссёр-постановщик, актёр. Фильмографияз 50-лэсь тросгес ужъёсыз вань, соос пӧлын «Рюриковичи», «Арт и Факт», «Большой дом» выллем тодмо проектъёс. Дмитрий 10-лэсь тросгес вакчи метражъем фильмъёсты снимать кариз (соосты интернетысь шедьтыны луэ). Нош «Ограбление по-удмуртски яке кин кызьы узырме» фильм — Могучевлэн нырысетӥез полнометражной фильмез.

Тунсыко-а пӧрмиз выль удмурт кылын потэм фильм, тунсыко-а солэн сюжетэз, матын луиз-а со учкисьёслы — та юанъёслы валэктон ӵошен шедьтыны тыршомы.

Фильмлэн сюжетэз

Пичи гуртын ужась участковой Шальтрамов раскрываемостьсэ ӝутон вылысь мыло-кыдо ужаны тырше. Нош Удмуртиын банкъёсты «сузян» ужен вырись кык профессиональной грабительёс кузёяськыны кутскем бере, солы каньыл улонэз сярысь вунэтоно луэ. Кышкасьтэм полицейской та йыртэмасьёсты кутыны малпа. Чурыт куронъёсты пуктӥсь кивалтэтэз, та ужез быдэстон понна, полицейскойлы ваньзэ-ӧвӧлзэ куинь нунал гинэ сётэ. Но солы «шуд усе»: грабительёс та полицейскойлэн участоказ интыяськем банк шоры синзэс поно. 

Та дыре ик сюжетын возьмато одӥг гуртысь куинь воргоронъёслэсь улон-вылонзэс. Одӥгез соос пӧлысь аслаз техникаеныз комбайнёр луыса ужа, кыкетӥез скалъёсты возьма, нош куинетӥез миллионер луон сярысь малпаса улэ. Одӥг нуналэ улон соосты огазея: комбайнёрлы кредитэ басьтэм техникаез понна тырыны, нош скал возьмасьлы совхозлы коньдон берыктыны кулэ луэ. Та муген соос миллион сярысь малпась гуртозы доры лыкто. Озьыен, куинь воргоронъёс огазеясько. Коньдон поттон понна соос кыӵе гинэ амалъёсты уг малпало: бутылкаосты вузанысен кыедлэсь асфальт поттонозь... Но бератаз банкез грабить карыны верасько. Со ик банкез, кудзэ вылӥын верам грабительёс синйылтӥзы. 

Тӥни озьы геройёсмы серемес, интыен кышкыт, интыен паймымон учыръёсы шедё. Вань сюжетсэ уг вера — соку тӥледлы фильмез учкыны тунсыко уз луы. Но верало огзэ: вань фильм сэрттон-пертчон атмосфераен, уйиськонэн, экшн-сценаосын (огшоры кылын вераса, со туж лэчыт сценаос, куке геройёслы кылдэм югдурысь туж ӝог потон амал шедьтыны кулэ) пыӵатэмын, но со дыре ик возьматӥське удмурт калыклэн аспӧртэмлыкез но.

Фильмлэн аспӧртэмлыкъёсыз

Калык таӵе выль сюжетэн удмурт фильмлы паймиз, лэся — фильмез кинотеатрын учки бере, адямиослэсь реакцизэс эскерыны быгатӥ. Малы паймизы, шуиськоды-а? Та ласянь аслэсьтым малпанме гожтыны дӥсьто: удмурт калык таӵе сюжетэн кинолы дась ӧй вал на. Бен, ӟуч яке кунгожсьӧр фильм ке луысал — нокин ӧй но паймысал, дыр. Но удмурт кылын таӵе... аспӧртэмлыко сюжетэн но жанрен снимать карем фильм — со учкисьёс понна чылкак выль маке вал кадь. Режиссёрлы, сценаристъёслы та понна нимысьтыз тау.

Фильмез снимать каризы Удмуртиысь Йӧскалык театрысь актёръёслэн пьесазыя. Нялтас вераса, со пьеса «драматическое произведение» номинациын удмурт кылын гожтэм тужгес умоез литературной произведение луэ. Озьы ик соя радиоспектакль но пукто. Тунсыко факт: та фильмез снимать каризы 14 (!) нунал ӵоже. Картиналэн режиссёрез Дмитрий Могучев ватытэк вера, та выллем полнометражной фильмъёсты сыӵе вакчи дыр куспын снимать уг каро — со понна ӧжытсэ 28 нунал кулэ шуыса. Но киноез снимать карись команда таӵе вакчи дыр куспын но тунсыко сюжетэн, туала учкисьлы кельшымон фильм кылдытыны быгатӥз. Туж усто. 

Аспӧртэмлыкъёсыз пӧлысь тани мае но пусъеме потэ: фильмын трос жанръёс сурасько — татын пумиське детектив но, мюзиклысь эктонъёс но, комедия но. Фильмез кылдытӥсьёс нош жанрезъя сое комедийной боевик шуо. Валамон но: фильмын геройёс серекъямысь но уг ик дугдо кадь, со сяна весь кыӵе ке учыръёсы шедё.

Шудӥсьёс сярысь нимаз гожтэме потэ ке но, нокинэ висъяме уг луы. Малы ке шуоно котькудӥз шудӥсь — валтӥсь героез возьматэ-а со, кыкетӥ планысь шудӥсь луэ-а — туж валаса, рос-прос быръемын.

Эшшо одӥгез тунсыко факт. Вань съёмочной группа, актёръёсты но лыдэ басьтыса, трос бадӟым уж лэсьтэм. Фильмез снимать карон понна соос асьсэос локациосты бырйиллям, съёмкаосты радъяллям, улон интыен герӟаськем ужпумез сэрттӥллям-пертчиллям, сиён-юон сярысь гинэ но асьсэос сюлмаськиллям. Со сяна, асьсэос ик сценаристъёс но, продюсеръёс но вал.

Кызьы дунъя калык?

Фильмез учкем вань калык понна вераны уг быгатӥськы, но Можгаын учкисьёслы та фильм туж кельшиз. Учкисьёс пӧлын вал пӧртэм арлыдэн нылкышноос но воргоронъёс, нылпиос но бадӟымъёс. Шонер ке тодӥсько, республикая но статистика сыӵегес ик. Та сярысь интернетысь асьтэос но ивор шедьтыны быгатоды. Учкисьёслэсь фильм сярысь верам кӧня ке малпанъёссэс гинэ вуттэме потэ:

«Зэмзэ верано ке, удмурт кылэз мон воксё уг тодӥськы. Но та фильмез пумозяз туж сак учки, та понна тау титръёслы — одӥг кылзэ но валатэк ӧй кыльы. Туж умой! Та фильмын выллем сюжетъёсты мон туж уг яратӥськы ке но — соос ӟуч кылын потӥсь фильмъёсын но тырмыт — таиз картина туж матын потӥз. Асьмелэн ук...» — Ирина Ш. 

«Ӧй но малпа, удмурт кылын сыӵе умой, рос-прос снимать карем фильм потоз шуыса. Туж чебер пейзажъёс, валаса быръем актёръёс, интыяз тупась крезьгур... Ватытэк верасько, та фильм понна возьыт ӧвӧл» — Людмила И. 

«Паймымон кадь, но фильм туж тунсыко потӥз. Кельшиз ваньмыз: сюжетэз, пейзажъёсыз, актёръёслэн шудэмзы. Съёмкаез но туж профессионально радъямын — бадӟым но пичи планъёс трос, пӧртэм тунсыко ракурсъёс вань, квадрокоптерен гинэ снимать карем интыосыз но шедьыло» — Артём М. 

Зэм верало: зэмлык понна, одӥг ке но фильмез кельшытымтэ адямилэсь малпанзэ гожто шуисько вал (малпай, сыӵеос шедёзы). Гожтысал, малы но маиз солы кельшымтэ, мар со витиз выль удмурт фильмлэсь. Но мон сыӵе адямиез ӧй шедьты...

Нялтас вераса, Татарстанын улӥсь тросэз удмуртъёс «Ограбление по-удмуртски или кин кызьы узырме» фильмен тунсыкъясько вылэм. Та сярысь гожтӥзы фильмлэн «Вконтакте»-ысь официальной сообществояз. Отысь ик тодӥ, фильмез онлайн-кинотеатръёсын но учкыны луоз шуыса. Но ку сыӵе луонлык кылдоз — али тодмо ӧвӧл на.

Наталья Жукова

Туспуктэм: udmurtfilm