Ожгарчиосмы понна сюлэммес сётӥськом! (3-тӥ люкет)

Кезьытъёс дыръя ик Починкаын но юрттэт сётон борды басьтӥськизы. Калыкез ӝутӥз Наталья Шестакова. Со ачиз Балтасьын дышетскыса, бератаз видеоосты учкыса, маскировочной сеть керттон ужлы дышетскиз. 

— Гурт калык та малпанэз шумпотыса пумитаз. Наталья Сергеевна ачиз ик сеть керттон понна Балтасьысь инъет вайиз, солэн верамезъя ваньзэ лэсьтӥм. Ужез гуртысь клубын интыямы, татын инты трос, вань кадь лыктэмъёслы «сэрег» но сюриз, уж но шедиз. Нокин ужтэк ӧз пукы: пичиез но, пересез но, ваньзы тыршизы. Таӵе ужъёс адямиосты котьку огазеяло ук, — валэктӥз гурт клубен кивалтӥсь Зоя Никитина.

— Нимысьтыз ожгар операци нокинэ мылкыдтэм кельтыны уг быгаты, дыр. Мыным но ваньмыз аслам мур куректонэ кадь йӧтӥз. Малы ке шуоно ӵыжы-выжыос пӧлын но та операцие пыриськисьёс вань. Аслам пие но улонзэ ожгар ӧнерен герӟаз. Асьмелэн самой пичи люкетмы — кужымъя юрттэт сётыны. Гуртоосын вераськыса, ваньзы соглаш луизы маскировочной сетьёсты керттыны. Айдарен герӟаськи но, со ваньзэ валэктӥз, кулэ луись арбери но сётӥз. Тау сыӵе адямиослы! Быгатонлык кулэ ӧвӧл — ваньмызлы дышетӥзы. Тау шуэме потэ Починка гуртысь калыклы, ӝытъёсы ваньзы потӥзы, керттӥзы. Жаляса верано, гужем вакытэ дорын ужъёс трос, вань ужъёсты толалтэ гинэ лэсьтыны луиз. Али коньдон ыстыны гинэ луэ, — мылкыдъёссэ шараяз ачиз но Наталья Сергеевна.

Тӥни озьы видео учкыса но ваньмызлы дышетскыны луэ, мылкыд гинэ медло. Кичӧлтӥсь адямиос котькуд гуртын тросгес луысалзы ке, ужъёс но чальгес мынысалзы. Соин пӧртэм амалъёс утчано ӧвӧл, юрттӥсько шуэм адямилы нокыӵе мугъёс уг люкето. Со понна али кыӵе гинэ площадкаос ӧвӧл, лыдъянтэм.