«Песни военного подвига» — Быдӟым Вормонлэн 73-тӥ арезлы сӥзем конкурс

Жюрилэн составаз пукизы культура центрысь методистъёс Габдрахманова Рахима Рахимзяновна но Гарипова Гульнара Гаделевна, культура центрысь специалист, директорлэн воштӥсез Ситдикова Мунира Габдрахмановна.

...Вормон асьмелы туж секытэн сётӥськиз. Гитлеровецъёс сюосын городъёсты, сюрсъёсын гуртъёсты быдтӥзы. Кин ке пизэ, кузпалзэ ыштӥз, кин ке атайзэ яке анайзэ, кин ке агайзэ но апайзэ... Озьы, одӥг юртэз но война йӧтытэк ӧз кельты. Соин ик вормон но асьме калыкмы понна тужгес секыт сётӥськиз, но со дыре ик вераса быдтонтэм шумпотонэн вормонэз пумитазы. Бӧрдыса, войнаысь бертэм солдатъёсты — отын кин тодмоед, кин ӧвӧл ӧз но учке ни — ваньзэсты ӟыгыръязы, асьсэлэсь самой матысь адямиоссэс кадь пумитазы. Со дырысен ини 73 ар но ортчиз. Но аръёс ортчыса, та война сярысь уг вунэто. Арысь аре трос военной киноос возьмато, Вормон нунал вуон азьын котькуд городъёсын но, гуртъёсын но пӧртэм военной тематикаен ужрадъёс ортчыто. Асьме районамы но арысь аре войналы сӥзем ужрадъёс радъяло. Туэ «Песни военного подвига» шуыса нимаськем конкурс та ужрадъёслэн одӥгез луэ. Шуд усиз адӟыны та творческой вожвылъяськонлэсь Вуж Кушкетын ортчем зональной этапсэ. Но конкурс сярысь гинэ уг гожтӥськы, нырысь ик клубзэ вераме потэ, малы ке шуоно татын нырысьсэ луи. Пичи гинэ ке но, туж чылкыт но шулдыр вылэм вужкушкетъёслэн клубзы. Мар шуид ке но, выль клуб — выль клуб ни со. Соин ик татчы адямиос но шумпотыса люкасько, луоз. Но клуб бордын гинэ ӧвӧл ук со — тросэз клублэн заведующиез бордын но луэ. Калыкез люканы, соосты ужрадъёс борды кыскыны быгатыны кулэ. Щербакова Светлана Петровна ( Вуж Кушкет клублэн заведующиез) та ласянь ассэ туж умой заведующий кадь гинэ ӧвӧл, умой адями кадь но возьматӥз — ваньзэсты лыктэмъёсты куноосты кадь ачиз пумитаз. Аслаз дырыз ӧй вал ке но, сцена вылэ потыны дасяськонэз вань вал ке но, котькуд гуртысь лыктэм коллективез шуныт кылын пумитаз.

Клублэн пичи луэмысьтыз-а, адями трос люкаськемен-а (валаса ӧй вутты) залын воксё инты ик ӧй вал. Султыса сылӥсьёс но вань вал, мазэ ватонэз. Но та чыры-пырыос гинэ, концерт кутскем бере со сярысь малпаны но клублэсь чеберлыксэ учкыны дырмы ӧз луы ни — быдэсак саклыкмы сценаын выступать карись артистъёс борды выжиз. Вуж Турьяысь, Вуж Кушкетысь, Ӟаныысь, Сырьяысь, Вукогуртысь, Тагашурысь, Сизнерысь, Починкаысь вуэм коллективъёс огезлэсь огез чебересь кырӟанъёсынызы но эктонъёсынызы шумпоттӥзы. Дасям номеръёс ваньмыз шуымон военной тематикаен герӟаськемын вал, соин ик вань ӝыт сӥземын луиз войнаын быремъёслы, ожысь вормонэн бертэмъёслы но шуыны луэ. Котькуд гуртэз нимаз висъяса ушъямон — шӧдске вал, ваньзы туж умой дасяськиллям. Сое ик висъяз Янгул гурт поселенилэн главаез Гарипов Ринат Гарафутдинович но. Со ваньзылы таукарон кылъёссэ вуттӥз, отысь Светлана Петровнаез но ушъяз.

Таӵе ужрадъёс, мон малпамъя, туж кулэ. Арысь аре война ветеранъёслэн радзы кулэсме, туннэ нуналэ соос районамы 14 кузя гинэ кылемын ни... Соин ик асьмеос эшшо но тросгес тунсыкъяськыны кулэ со дыръёсын, со аръёсын, со нуналъёсын.

P.S. Нырысь серем потӥз, ваньзылы учкисьёслы  кадь ик, сырьяослэн «Катюша» кырӟанэз быдэстыкузы, удмурт кылын кырӟан интые, ӟуч кылын кырӟаны кутскемзы. Бертыкузы асьсэос но вань сюресэз серекъяса бертӥзы: «Ма кызьы озьы луоз ни со, кызьы озьы кырӟалод, сомында репетировать карыса». Кызьы? Ответэз туж огшоры но валамон. Та кырӟан адямилэн йыраз но, сюлмаз но пыӵамын, дасяськытэк но, кырӟанлэсь гурзэ гинэ кылыса но, потэ-а уг-а — кырӟаськод сое. Сюлэм кырӟаны косэ. Серем но ӧвӧл вылэм, малпад ке. Адями та кырӟанэз котьку тодаз возе. Данъяськымон.