Пичи дырысеныз удмурт кыл матын луэм

Мухина Валентина Леонидовна вордскем Новая Гора гуртын ӟуч семьяын. Бырем гуртын ӝыныез калык луиллям ӟучъёс, мукетъёсыз — удмуртъёс.

— Гуртмы ноку но бадӟым луымтэ. Мон пичи дыръя отын тямыс семья гинэ луэм ини — куатез семья удмуртъёс, кыкез — ӟучъёс. Валамон, сыӵе пичи гуртын ог-огзэс тодыса, гажаса, ог-огзылы юрттыса уло, нылпиос но валче шудыса будо. Соин мон но, ачим ӟуч луисько ке но, пичи дырысен удмурт кылэз тодыса будӥ, малы ке шуоно эшъёсы, гуртоосы тросэз удмуртъёс вал, — веранзэ кутске Валентина Леонидовна.

Вордскемын нылкышно трос нылпиё семьяын. Валентина апай семьяяз самой покчиез нылпизы луэ, тямысэтӥез. Солэн агайёсыз но, апайёсыз но ӟеч тодӥллям удмурт кылэз, доразы удмурт кылын вераськымтэзы ке но.

— Атае умой тодӥз удмурт кылэз но, ӟучсэ но, бигерзэ но вала вал. Нош тани анай удмурт кылэз нокызьы дышетскыны ӧз быгаты (но тазэ пусъеме потэ — анай гуртоосыз ӟуч кыллы дышетӥз), соин дорамы ӟуч кылын гинэ вераськимы. Со понна ик удмурт кылэз ваньмы но — мон но, агай-апайёсы но — урамысен дышетскимы шуыны луэ. Мынам ньыль эшъёсы но удмуртъёс вал, мон огнам ӟуч. Удмуртъёсын эшъяськем бере, валамон ини, удмурт кылэз тодытэк уг луы шуыса. Али кылэз гинэ ӧвӧл, удмурт кырӟанъёсты но дышетски, соосты но тодӥсько вал, — маде Валентина Леонидовна.

Удмурт кылэз тодэмез Валентина Леонидовналы но улоназ юрттэ, малы ке шуоно туннэ нуналэ со Вылын Ушма гуртысь школа-нылпи садын ужа. Арчаысь педучилищеез йылпумъям, Казаньысь педагогикая институтысь физико-математической факультетын дышетскем кышномурт ассэ нылпиосын ужанлы сӥзе. Куамын ар ӵоже ини со нылпиослы тодон-валан сётэ. 1986-1993-тӥ аръёсы со Покчи Лӧзя школаын ужам, 1993-1997-тӥ аръёсы Улын Ушма гуртысь покчиёзо школаын нылпиосты дышетэм, 1997-тӥ арысен 2016-тӥ арозь  нош ик Покчи Лӧзя школаын тыршем.

— Али мон школае ужаны мынӥсько но паймисько: удмурт гуртын будыса, нылпиос удмурт кылэз умой уг тодо. Анай-атайёсынызы но ӟуч кылын верасько, соосыз удмуртъёс ке но. Ведь нылпилэн кыл тодэмез (ӟуч-а со, удмурт-а, бигер-а, пор-а, англи яке кыӵе ке мукет кыл-а) нырысь ик анай-атай бордын луэ, тае вунэтыны кулэ ӧвӧл, — валэктэ Валентина Леонидовна.

Синмаськытӥз аслыз Валентина Леонидовна. Ачиз ӟуч, кузпалыз но солэн ӟуч луэм (жаляса верано, со улэп ӧвӧл ини), но удмурт кылэн чылкак удмурт нылкышно кадь вераське. Бадӟым Лӧзя 1-тӥ люкет гуртын улыса, бускельёсыныз но ӟуч кылын но, удмурт кылын но вераське. Бигер кылэз гинэ уг тодӥськы шуиз, но отын ик пусйиз, аслыз кулэзэ валасько шуыса.

— Пиосы но удмурт кылэз валало, но верасько ӟуч кылын. Соин соосын ӟуч кылын вераськисько, нош тани Алина кенэным удмурт кылын вераськисько, малы ке шуоно со удмурт нылаш. Нылылэн картэз, кылсярысь, бигер. Соин солы «улым» шуыса но вазисько. Семьяын трос калыкысь адямиос вань бере, озьы ини со — «улым» но, «пие» но, «сынок» но шуыны быгатыны кулэ. Дышид ке, номыр секытэз ӧвӧл, — пальпотыса вера Валентина Леонидовна.

Дано дышетӥсь куинь нылпиоссэ будэтэм, пыд йылазы султытэм. Туннэ нуналэ солэн кык внукез но одӥг внучкаез вань ини. Табере нылкышно внуксэ удмурт кыллы дышетон понна сюлмаське. «Мынам потэ, внуке но удмурт кылэз мед тодоз шуыса. Кылъёсты тодон нокинлы уг люкеты, юрттэ гинэ», — шуэ со.

Вераськонмы кыстӥськиз. Валентина Леонидовнаен вераськимы вордскем кыллэн нылпи понна кулэлыкез сярысь но, кылъёсты дышетскыны туннэ нуналэ луэм трос луонлыкъёс сярысь но. Жаляса гинэ вераны кулэ, вань сыӵе анай-атайёс, песяй-бабайёс, кудъёсыз нылпиосызлы но внукъёсызлы туала дыре вордскем кылзэ дышетон кулэ ӧвӧл шуыса малпало. Но умоезлы но оскон уг кысы: куке Валентина Мухина кадь кылъёсты гажась адямиос вань, асьмелэн кылъёсмы азьпалан но уз вунэ, уз быре.