Починкаысь комбайнёръёс – асьмелэн данъяськонмы!

Вормисе потэм комбайнёръёс асьсэлэсь шумпотэмзэс уг вато. «Казаньын собыдӟа сцена вылын сылыса диплом басьтон – туж шумпотымон. Эшшо но шумпотымон, сцена вылэ удмурт комбайнёръёс но шедизы шуыса. Сомында ар ужай ке но, собыдӟа сценае потэме ӧй вал али, луо вал конкурсъёс комбайнёръёс пӧлын арлы быдэ но, но соиз Балтасьын гинэ ортче вал», - шуэ Николай Михайлович Асаков. Конкурсын вормем уксёзэ но кытчы кутыны тодэ ини Николай Михайлович. «Гуртын уксёез отчы но, татчы но карыны луэ. Одӥгзэ лэсьтӥськод ке, кыкетӥез ёмыра. Созэ но, тазэ но утялтоно, лэсьтоно. Соин но эн пайме, шедёз интыез», - пе. Пичи дырысеныз музъем ужлэсь шӧмзэ валаса будэм бере, туж яратэ вылэм ужзэ Николай Михайлович, куд-ог дыръя секыт луэ ке но.  Кыкетӥез удмурт комбайнёр но, Владимир Александрович Якимов,  аслэсьтыз ужзэ яратэмзэ уг ваты. «Бен, кызьы уд яраты? Тани ини 22 ар ужасько. Ужмы сезонной бере, толалтэ сварщик луыса тыршисько. Бусыын уж секыт ке но, одӥг ужез ужад ке, дышиськод. Милемыз нокин кужмысь уг ужаты, асьмелэн мылкыдмы луыса ужаськомы, - шуиз Владимир Александрович. «Ужмы капчи ӧвӧл ук, соиз нокин понна секрет ӧвӧл. Асьмелы комбайнмес утёно, ремонт карыны быгатоно. Котькин но озьы уз быгаты, дыр… Ужлэсь кышкасьтэм, музъемез яратӥсь адями гинэ та уж борды басьтӥськыны быгатоз», - вераз комбайнёр.

Чылкыт сюлмын ужзэс быдэсъясь комбайнёръёслы сӥзисько азьланьын но сыӵе ик азинлыко ужаны.