Хезмәт

Балтач районы

18+
2024 - Гаилә елы
Азьлане

Сюресъёссы бен, сюресъёссы… мукетъёслы вожъяськымон

Гуртын вань юртъёс юнэсь, эскерем улсын возисько, но буш сылӥсьёсыз но ӧжыт ӧвӧл, куд-огзэ дача карыса но возё вылэм.

Кыӵе гинэ гуртэ эн поты, бадӟым-а со, пичи-а, котькудаз шуымон одӥг шуг-секыт — сюрес ӧвӧл. Нош тани кызь котыр хозяйствоез луэм Бадӟым Лӧзя 2-тӥ люкет гурт милемыз асфальт сюресэн пумитаз.

Татын туннэ нуналэ одӥг гинэ но социальной объект ӧвӧл, но гуртэ вуытозь асфальт сюрес лэсьтэмын, гурт урамъёсы но асфальт вӧлдэмын. Сюресъёссы вожъяськымон.

Бадӟым Лӧзя 2-тӥ люкет гуртэ вуттӥсь сюресэз 2019 арын пичи гуртъёсы сюрес лэсьтон программая тупатыны кутско. Туннэ нуналэ куинь арлы чаклам ужъёслэн кык куиньмосэз йылпумъямын ини. Туэ со уже кутӥськыны кутскоз. Та дырозь гурт калык бусы сюрес кузя ветлэм яке сюрессэс вакчиятон понна выж вамен потаса улэм, соин та 130 миллион манет тыр усем лэсьтӥськон ужъёс соослэсь сюресэн герӟаськем шуг-секытъёссэс чылкак быдтӥллям шуыны луэ. Но, сюресъёс лэсьтэмын ке но, выж али но ас ужзэ быдэстэ. «Арлы быдэ ас коньдонэнымы ремонт кариськом», — шуэ поселенилэн главаез Раиф Музипов. Тулыс тудву нуыса кошкон дыръёс но ӧжыт луымтэ. Туж тунсыко потӥз ке но, кык ярдуръёсты огазеясь исторической выж вамен потыны мон ӧй дӥсьты.

— Сюресъёсты лэсьтон таин гинэ ӧз йылпумъяськы. Тыкырыкъёсы, шай вылэ нуись сюресъёсы грант коньдонэн векчи из вӧлдыны быгатӥмы. Шубан гурт поселение, муниципал кылдытэтъёс куспын ортчем конкурсэ пыриськыса, 1,5 миллион манет грант утӥз вал. Солэн 1 миллионэз Бадӟым Лӧзя 2 люкет гуртлы кутӥськиз, — шуиз поселенилэн кивалтӥсез.

Чебер Шошма шур дурын интыяськем синмаськымон инкуазен Бадӟым Лӧзя 2-тӥ люкет гурт Шубан поселение пыре. Татын 25 хозяйство лыдъяське, ваньзэ 57 адями улэ. Соослэн 27-ез пенсионер, 12-ез ужась аресэн мурт луэ, 18 аресозь 16 нылпи лыдъяське.

Школа, ферма ке быриз, гурт быре шуыса вераны яратӥськом. Нош огез но ӧз ке луы, улон азьланьтӥське меда?

— Мон Шубан гурт поселенилэн кивалтӥсез луыса ужаны кутскыкум, татын магазин гинэ ужа вал. Дас ар талэсь азьло со но пытсаськиз. 2001 арын ву скважина лэсьтӥськиз, кык ар ортчыса, юртъёсы ву пыртэмын вал, — шуэ Раиф Музипов.

Гуртэн тодматскыса ветлыкумы, урамъёсысь ву колонкаос синме йӧтӥзы, соос али но ужало вылэм. Телефон пыр вераськыны мылкыд карем муртлы гурт шорын таксофон но вань. Самообложение коньдонэн нылпиослы шудон площадка но лэсьтӥллям. Шайлэсь заборзэ тупатыны кутскиллям. Электроез юбоосты вошъяса, урамысь тылъёсты выльдӥллям.

Гуртэ арнялы быдэ кык пол лыктыса, нимаз ужбергатӥсь вузкаре вылэм. Медициная юрттэт сётэ Людмила Кузьмина гуртозы. Оген улӥсь пересьёсты но эскерем улсын возё, социальной ужасьёслэн учкемзы соослы туж кельше, пе, шуэ поселенилэн главаез.

Сергей Иванов, Александр Широков выллем гуртын улыны интыяськем егит семьяос вӧзы Казаньысь лыктэм Мавринъёслэн семьязы но ватсаськем. Егитъёс ас тыршеменызы юрт пукто.

Бадӟым Лӧзя 2-тӥ люкет — удмурт гурт, удмуртъёс пӧлын со Удмурт Лӧзя нимын тодмо. Но гуртын ӟучъёс но вань. Нылпиоссы ӵемысь Покчи Лӧзя нылпи садын визьнодасько, Покчи Лӧзя школаын тодон-валан басьто.

Гурт калык сям-йылолъёссэ, осконзэ утьыса улэ. Черке бускель Покчи Лӧзя гуртэ ветло. 2019 арын гурт кутсконын бадӟым кирос пуктӥллям. Территоризэ котыртыса, сяська мерттӥллям, дораз ик ӟус но сылэ, черке мыныны быгатымтэ муртъёс татчы лыкто.

Гуртысь тужгес арлыдо адями — Мария Никитина. Со доры но вуылӥмы. Мария апайлэн юртъерез сяська пӧлы выемын, ӧс азяз милемыз правнукъёсыз пумитазы. «Гужем арлы быдэ тазьы гуртэ бертӥськом», — шуыса вераз анайзы. Мария апай туннэ нуналэ Алевтина нылыныз но Регина внучкаеныз улэ.

— Туннэ улонмы — узьмаг, туж секыт дыръёсты адӟимы ведь. Луэмезлэсь Инмар медаз люкы, — мылкыд каре песянай.

Гуртын улон азьпал мынэ. Сэрттоно-пертчоно шуг-секытъёс, кенешоно ужпумъёс но кылдо. Сыӵе дыръя калык кытын люкаське шуыса тунсыкъяськисько поселенилэн главаезлэсь. Вань пумиськонъёс Галина Иванова дорын ортчо вылэм. Галина апайлы ӝоген 83 арес тырмоз. Ми лыктыку, со бакчаяз выре вал. Сяськаен шобыртэм бакчазэ, узыр урожайлэсь куасалскыса сылӥсь емышо писпуоссэ, чылкыт утялтэм ӧс азьзэ, юртсэ адӟыса, сюлмысь синмаськи.

Гуртын вань юртъёс юнэсь, эскерем улсын возисько, но буш сылӥсьёсыз но ӧжыт ӧвӧл. Куд-огзэ дача карыса но возё вылэм. Анай-атайзы кулэм бере вордскем юртазы бертыса улӥсьёс но вань татын. Калык уногес пудо-живот вордыса улэ. Гуртын 9 скалзы вань, соос пӧлысь витез Виталий Фёдоровлэн. Йӧлэз Шубанысь лыктыса люкало вылэм.

Тӥни озьы, луэмезлы шумпотыса уло та гуртын. Арлыдоос татын шӧдскымон тросгес ке но, урамын шудӥсь нылпиосты адӟыса, вуоноезлы али оскон вань шуыса валаськод.

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Галерея

Оставляйте реакции

2

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: Бадӟым Лӧзя II люкет гурт гуртъёс