Тодэ ваёнъёс

Юнгес ке малпад, со сюлмысен верам кылъёс, оло, соин ик но, дыр, нуналлы быдэ киям кутӥсько «Кырӟалэ, эшъёс, кырӟалэ!!!» книгаез, котькуд ньыль чуръёс ваньмыз но тодмо, соин ик аслам вордӥськем палъёсам вуисько кадь потӥсько. Тани али но лекрут юмшан кыл сюриз. Та кылэз пинал калык гинэ ӧвӧл, мӧйыос но тросэз уг тодо ни, дыр. Улон чутрак воштӥськиз, соин ик трос асьмелэн удмурт ужрадъёс но вуныса мыно, дыр. Туннэ нуналэ кин армие кошке, сое но ум тодӥське ни. Нош азьло дыре лекрут юмшан гурт калык понна туж бадӟым юмшан луоз вал. Гуртысь нылъёс но пиос 2-3 пар валэн юмшаса ветлӥзы. Нырысь ик валъёсты чеберъяло вал, букозэ бамкышетэн, буколэн вылаз жон вазись гырлы ошылӥзы. Эктыса-кырӟаса, мызганэн пиналъёс ортчо урамез. Кышномуртъёс, юн тазалык сӥзьыса, озьы ик эктыса, букое нош ик бамкышет думылӥзы. Пияшез келян ӝытэ ӵыжы-выжыоссы люкаськылӥзы, пияшлы сюрес вылэ сюлэмез буйгатӥсь кылъёс вераллязы, тазалыкен бертыса вуыны мылкыд карылӥзы, мумыкоре коньдон шуккыны косӥзы. Нош ӵукна гурт калык армие келяны люкаське, сюрес вылэ сюлэмез буйгатӥсь кылъёс верало, ӟечкын бертыса вуыны сӥзё. Пичи нылъёс но пиос возьмало ни урамын, пияш кисыяз трос коньдон дасяз вал, пиналъёслы пазьгыны, со коньдонзэ пазьгем бере пичиос шумпотыса бичаллязы. Тазьы ик матын удмурт гуртъёстӥ но юмшазы. Туннэ нуналэ бусы капка юбоез но ум тодӥське ни, нош азьло дыръя котькуд гуртын бусы капка юбо луоз вылэм, вот со юбое кутӥськыса кошкоз вылэм пияш, ӟечкын мед бертом шуыса. Одӥг кылын вераса, трос йылолъёс вуныса мыно ини, мар карод, улон аслэсьтыз ӧрзэ басьтыса азьлань мынэ. Шумпотӥськом, асьме пиналмы ӟучен гинэ вераське ни, озьы ик но кулэ, дыр, со пиналлы, нош аслэсьтыд анай-атай вераськон кылдэ но вунэтоно ӧвӧл, дыр, со асьмелэн вашкала дырысен вераськон кылмы. Кызьы вераз Ашальчи Оки, «Аслэсьтыд кылдэ ӧд ке тоды, мукетсэ но умой уд тоды». Асьмелэн но удмурт кылмы туж узыр, улон шоры шонер но валаса учкыны дышетэ. Соин ик трос мед луозы асьме удмуртлыкмес данэ ӝутӥсьёс, соос понна сюлмысен ик тау кылме верасько, котькуд вордӥськем нунал умойзэ гинэ мед кузьмалоз.

Мария Александрова

(Кондӥ Мани)

Подпись под фото.     1959 ар. Балтась РВК. Ярак-Чурма гуртысь егитъёс Петров Николаез лекрутэ келяло.

Фото.   Л.Сапожниковлэн архивез.